Na Wena U Nga Kuma Mintokoto Leyinene!

Vahuweleri van’wana va vonaka va ri ni mintokoto leyi tsakisaka ni leyi khutazaka yo yi hlamusela minkarhi hinkwayo mayelana ni laha va ngheneke kona kumbe riendzo ro vuyela ro tsakisa leri va tiseleke ntsako lowukulu. Mintokoto leyinene hi ntolovelo a yi tiendlekeli ntsena. Yo tala yi vangiwa hi ku hiseka ni matshalatshala lama tiyeke. A yi kumiwi ntsena hi vahuweleri lava vulavulaka hi ku khuluka swinene kumbe lava nga ni vuswikoti swinene.

Hi leswi swilo swin’wana leswi xiyiweke eka lava humelelaka swinene: (1) Va hlanganyela entirhweni wa nsimu nkarhi na nkarhi, hi ntolovelo va va kona minkarhi yo hlayanyana vhiki rin’wana ni rin’wana, leswi swi va nyikaka nkarhi wo tala wo vulavurisana ni vanhu lava tsakelaka; (2) va hlayisa langutelo lerinene eka vini va miti, a va heti hi ku vula ka ha ri emahlweni leswaku a va nge tsakeli; (3) va vulavula va ntshunxekile, va kombisa ku tsakela loku kufumelaka ka xiviri eka lava yingiselaka; (4) va hiseka ni ku hambeta va ya eka maendzo yo vuyela ni le ka lava nga riki kona ekaya; naswona (5) va ni pakani yo sungula tidyondzo ta Bibele.

Endzhaku ko kambisisa ntirho wa wena, kumbexana u nga vona ndlela leyi u nga yi kumaka ha yona mintokoto yoleyo yo tala leyi tsakisaka leyi endlaka nsimu yi va ni mihandzu ni ku enerisa swinene.