Ndlela Leyi Hi Nga Khorwisaka Van’wana Ha Yona
1 Muapostola Pawulo a a dume hi ku va mutirheli la khorwisaka. (Mint. 19:26) Hambi ku ri Hosi Agripa u te eka yena: ‘Ku nga ri kungani u ta ndzi khorwisa leswaku ndzi va Mukreste.’ (Mint. 26:28) I yini lexi endleke leswaku Pawulo a kota ku khorwisa van’wana? A a hlamulana na vayingiseri vakwe hilaha ku twisisekaka hi Matsalwa, a endla leswaku timhaka ta yena ti pfumelelana na vona.—Mint. 28:23.
2 Na hina hi fanele ku tekelela Pawulo, hi khorwisa vanhu evutirhelini bya hina. Njhani? Hi ku twisisa ndlela leyi vayingiseri va hina va ehleketaka ha yona. (Swiv. 16:23) Hi ta pfuniwa hi magoza manharhu ya nkoka leswaku hi endla tano.
3 Rhiya Ndleve: Loko munhu loyi u vulavulaka na yena a ri karhi a vulavula, n’wi yingisele u twa loko ku ri ni leswi mi pfumelelanaka ha swona. Loko a kaneta mhaka yo karhi, ringeta ku twisisa leswaku ha yini a yi kaneta. Swi ta ku pfuna ku tiva leswi a swi pfumelaka, ni leswaku ha yini a swi pfumela, ni lexi n’wi khorwiseke leswaku a swi pfumela. (Swiv. 18:13) Ringeta ku n’wi cela hi vutlhari leswaku a tiphofula.
4 Vutisa Swivutiso: Loko munhu a pfumela eka Vunharhu-un’we, u nga ha n’wi vutisa u ku: “Xana i khale u ri karhi u pfumela eka Vunharhu-un’we?” N’wi tlhandleke xivutiso lexi landzelaka: “Xana u tshama u endla ndzavisiso wa rixaladza malunghana ni leswi Bibele yi swi vulaka emhakeni leyi?” U nga ha n’wi vutisa ni lexi nge: “Loko Xikwembu xi ri xiphemu xa Vunharhu-un’we, xana a hi nga ta rindzela leswaku Bibele yi hi andlalela mhaka leyi erivaleni?” Tinhlamulo leti u nga ta ti kuma ti ta ku pfuna leswaku u hlamulana ni munhu yoleyo hi leswi Matsalwa ma swi vulaka.
5 Hlamulana Na Yena Hi Ndlela Leyi Twisisekaka: Mbhoni yin’wana yi tshama yi vutisa wansati la pfumelaka leswaku Yesu i Xikwembu, yi ku: ‘Loko wo ringeta ku kombisa leswaku vanhu vambirhi va ringana, i vuxaka bya njhani lebyi vanhu volavo va nga na byona, lebyi u nga byi tirhisaka?’ Wansati yoloye u hlamule a ku: “Ndzi nga tirhisa vanhu vambirhi lava nga vamakwavo.” Mbhoni yi engetele yi ku: “Kumbexana u nga tirhisa lava nga mahahlwa lama fanaka lerova swi tika ku ma hambanisa. Kambe, loko Yesu a hi dyondzisa leswaku Xikwembu i Tatana kutani yena i N’wana, a a hi byela yini?” Wansati loyi u yi kumile yinhla ya leswaku un’wana hi lonkulu naswona u ni vulawuri lebyi tlulaka bya un’wanyana. (Mat. 20:23; Yoh. 14:28; 20:17) Mianakanyo ni mbilu ya yena swi fikeleriwile hi ku tirhisa vuswikoti bya ku khorwisa.
6 I ntiyiso leswaku a hi vanhu hinkwavo lava nga ta amukela ntiyiso, ku nga khathariseki ndlela leyi rungula ra hina ri twisisekaka ni ku pakanisa ha yona. Kambe, ku fana na Pawulo, a hi hisekeleni ku lavisisa vanhu va timbilu to tshembeka ensin’wini ya ka hina, hi va khorwisa leswaku va amukela rungula ra Mfumo.—Mint. 19:8.