Xana U Tshame U Va Phayona Ra Nkarhi Hinkwawo?
1. Xana i lunghelo rihi leri vo tala va tiphineke ha rona kambe i yini leswi van’wana va voneke swi fanela?
1 Emalembeni lama hundzeke, vanhu va magidi va tiphine hi lunghelo ro “dyondzisa ni ku chumayela mahungu lamanene” va ri vatirheli va nkarhi hinkwawo. (Mint. 5:42) Hambiswiritano, van’wana va boheke ku tshika ku phayona hikwalaho ka swivangelo swo hambana-hambana. Loko ku ri leswaku na wena a tshame u va phayona ra nkarhi hinkwawo, xana u swi kambisisile swiyimo swa wena sweswi ku vona loko u nga tlhela u phayona?
2. Ha yini lava a va phayona enkarhini lowu hundzeke va fanele va anakanyisisa hi swiyimo swa vona sweswi?
2 Ku Cinca Ka Swiyimo: Swi nga ha endleka leswaku leswi endleke leswaku u tshika ku phayona a swa ha ri kona. Hi xikombiso, loko u tshike ku phayona hi leswi a swi ku tikela ku fikelela tiawara ta 90 hi n’hweti, xana u nga tlhela u phayona sweswi leswi tiawara ti hungutiweke ti va 70? Xana swilaveko swa ntirho wa wena kumbe vutihlamuleri bya ndyangu byi hungutekile ku sukela loko u ta va u tshike ku phayona? Makwerhu un’wana wa xisati loyi a tshikeke ku phayona hikwalaho ka rihanyo, u tlhele a phayona a ri ni malembe ya 89. Se a a hete lembe a nga si ya exibedlhele naswona a a vona onge rihanyo rakwe ri ta n’wi pfumelela leswaku a kota ku tlhela a phayona!
3. Xana swirho swa ndyangu swi nga khomisana njhani leswaku swi pfuna xirho xin’we leswaku xi kota ku phayona?
3 Kumbexana a wu nga ri phayona kambe un’wana endyangwini wa wena u tshike ku phayona leswaku a ta khathalela xirho xa ndyangu, ku nga ha va mutswari la dyuhaleke. (1 Tim. 5:4, 8) Loko swi ri tano, xana wena kumbe van’wana endyangwini ku na leswi va nga swi endlaka leswaku loyi a a phayona a tlhela a phayona? Ha yini mi nga buli hi mhaka leyi swin’we? (Swiv. 15:22) Loko swirho swa ndyangu swi khomisana lerova xirho xin’we xi phayona, hinkwaswo swi ta titwa swi hoxe xandla.
4. Ku vuriwa yini loko sweswi u nga swi koti ku tlhela u phayona?
4 U nga heli matimba loko swiyimo swa wena swi nga ku pfumeleli leswaku u tlhela u phayona. Ku tiyimisela ka wena ku phayona swi tsakisa Yehovha. (2 Kor. 8:12) Loko u ri ensin’wini, tirhisa ntokoto lowu u wu kumeke loko wa ha phayona. Khongela hi mhaka leyi naswona xalamukela nkarhi lowu nga ku pfulekelaka leswaku u antswisa swiyimo swa wena. (1 Yoh 5:14) Kumbexana hi ku famba ka nkarhi, Yehovha u ta ku pfulela ‘nyangwa lowukulu lowu yisaka entirhweni’ leswaku u tlhela u kuma ntsako wa ku va phayona ra nkarhi hinkwawo!—1 Kor. 16:9.