‘Ku Rhandza Ka Xikwembu A Ku Endleke’
1. Xana yi ri yini nhloko-mhaka ya nongonoko wa nhlengeletano ya siku ro hlawuleka ya lembe ra ntirho ra 2012 naswona ha yini swi fanerile ku kambisisa nhloko-mhaka leyi?
1 Hi vumbiwe hikwalaho ka ku rhandza ka Yehovha. (Nhlav. 4:11) Xisweswo, a hi nge swi koti ku hetisisa xikongomelo xa vukona bya hina handle ko dyondza ni ku endla ku rhandza ka Xikwembu. Leswi a swi olovi hilaha swi nga vonakaka hakona hikuva hi fanele hi lwa ni mboyamelo wo endla “swilo leswi rhandziwaka hi nyama ni miehleketo” kumbe ku endla “ku rhandza ka matiko.” (Efe. 2:3; 1 Pet. 4:3; 2 Pet. 2:10) Handle ka mpfuno wa Xikwembu, a hi ta va ekhombyeni ro ‘phasiwa hi Diyavulosi hi ri karhi hi hanya leswaku hi endla ku rhandza ka yena.’ (2 Tim. 2:26) Nongonoko wa siku ra nhlengeletano yo hlawuleka wa lembe ra ntirho ra 2012, wu ta pfuna un’wana ni un’wana wa hina ku tirha hi ku pfumelelana ni xin’wana xa swikombelo swinharhu leswikulu leswi Yesu a hi dyondziseke leswaku hi swi khongelela, ku nga leswaku “ku rhandza ka wena a ku endleke.”—Mat. 6:9, 10.
2. Hi swihi swivutiso leswi nga ta hlamuriwa hi nkarhi wa nongonoko?
2 Swivutiso Leswi Nga Ta Hlamuriwa: Loko u ri karhi u yingisela nongonoko, languta tinhlamulo ta swivutiso leswi: Hi wihi nchumu wun’wana wa nkoka lowu hi faneleke hi wu endla handle ko yingisa Rito ra Xikwembu? Xana hi nga ya emahlweni njhani hi vona leswi ku rhandza ka Xikwembu ku nga swona eka hina? Ha yini hi fanele hi tiyimisela ku pfuna vanhu va tinxaka hinkwato? Xana hi nga byi kuma njhani vutomi lebyi enerisaka? Vantshwa, i yini leswi mi faneleke mi swi endlela Yehovha? Hi byihi vuyelo lebyi tisiwaka hi ku endla ku rhandza ka Xikwembu? Ha yini swi ri swa xihatla leswaku hi aka van’wana ni ku va khutaza?
3. Xana hi nga vuyeriwa njhani hi ku helela eka nongonoko wa siku ra nhlengeletano yo hlawuleka?
3 Tiyiseka leswaku u va kona naswona u rhiya ndleve eka nongonoko. Swi nga endleka leswaku muyimeri wa Bethele kumbe mulanguteri la famba-fambaka a va kona tanihi xivulavuri lexi endzeke. Emahlweni ni le ndzhaku ka nongonoko, titwe u ntshunxekile ku vulavula na yena kumbe nsati wakwe, loko a tekile. Loko mi tlhelela ekaya, mi nga vi “vatwi lava rivalaka,” kambe pfuxetani nongonoko tanihi ndyangu kutani mi bula hi ndlela leyi mi nga tirhaka ha yona hi ku pfumelelana ni ku rhandza ka Xikwembu.—Yak. 1:25.
4. Ha yini swi ri swa nkoka leswaku hi rhangisa ku endla ku rhandza ka Xikwembu?
4 Lava landzelaka ku navela ka vona naswona va alaka ku endla ku rhandza ku Yehovha va ta lovisiwa ku nga ri khale. (1 Yoh. 2:17) Hikokwalaho, hi nkhensa leswi Yehovha a hi lunghiseleleke rungula leri nga enkarhini leswaku a hi pfuna leswaku hi rhangisa ku endla ku rhandza ka Xikwembu!