Ku Antswisa Vutshila Bya Hina eNsin’wini—Ku Tsala Vanhu Lava Tsakelaka

“Nyikela nyingiso lowu hambetaka eka wena ni le ku dyondziseni ka wena.” (1 Tim. 4:16) Ndzayo leyi, leyi huhuteriweke leyi muapostola Pawulo a yi tsaleleke Timotiya yi kombisa leswaku hi fanele hi tikarhatela ku endla nhluvuko, ku nga khathariseki leswaku hi vahuweleri lavantshwa kumbe se hi ni ntokoto. Leswaku hi kota ku endla tano, eka Vutirheli Bya Hina Bya Mfumo ku ta va ni swihloko leswintshwa leswi nga ta tlhandlamana leswi nge, “Ku Antswisa Vutshila Bya Hina eNsin’wini.” Xihloko ha xin’we xi ta hlamusela vutshila byo karhi bya nkoka kutani xi nyikela swiringanyeto swo karhi eka ndlela leyi hi nga swi tirhisaka ha yona. Hi n’hweti yoleyo, hinkwerhu hi khutaziwa leswaku hi tikarhatela ku fikelela vutshila byolebyo. Loko n’hweti yi hela, eka Nhlangano wa Ntirho ku ta va ni nkulumo leyi eka yona hi nga ta nyikiwa nkarhi wo hlamusela ndlela leyi hi vuyeriweke ha yona hi ku tirhisa vutshila byolebyo. N’hweti leyi hi khutaziwa ku tsala vanhu lava tsakelaka.

Lexi Endlaka Swi Va Swa Nkoka: Leswaku hi hetisisa ntirho wa hina, a hi fanelanga hi chumayela ntsena. Hi fanele hi tlhelela eka vanhu lava kombiseke ku tsakela leswaku hi ya va dyondzisa, hi cheleta mbewu ya ntiyiso leyi hi yi byaleke. (Mat. 28:19, 20; 1 Kor. 3:6-9) Leswi swi lava leswaku hi tlhelela eka vona, hi bula na vona hi leswi va karhataka ni ku ya emahlweni ni mhaka leyi hi buleke na vona ha yona enkarhini lowu hundzeke. Hikwalaho, i swa nkoka ku tsala vanhu lava hi va kumeke lava tsakelaka.