Vuyela Eka Hinkwavo Lava Vonakaka Va Tsakela

¹ Vo tala va hina namuntlha hi le ntiyisweni hikwalaho ka leswi Mbhoni yo karhi yi xiyeke leswaku ha ri tsakela rungula ra Mfumo kutani yi nga heli mbilu loko yi ri karhi yi endla maendzo yo vuyela eka hina—kumbexana yo hlayanyana—leswaku yi hi pfuna hi hambeta hi tsakela. Na hina hi fanele hi tiyimisela ku vuyela eka hinkwavo lava vonakaka va tsakela. Ku vula ntiyiso, ku endla maendzo yo vuyela i xiphemu xa ntirho wa hina wo ‘endla vadyondzisiwa.’—Mat. 28:19, 20.

² Xiya Loko Munhu A Tsakela: Hambiloko munhu a nga yi teki minkandziyiso, kambe u nga swi vona leswaku wa ri tsakela rungula ra Mfumo hi ndlela leyi a langutekaka ha yona exikandzeni, hi rito ra yena kumbe hi mavulavulelo ya yena. Hi swona leswi endlaka leswaku hi endla maendzo yo vuyela. Makwerhu un’wana u vuyele eka munhu wo karhi ka ntlhanu hi mavhiki lama landzelanaka a nga si n’wi fambisela nkandziyiso. Loko a n’wi endzela ra vutsevu, munhu yoloye u wu amukerile nkandziyiso kutani a hetelela a fambiseriwa dyondzo ya Bibele.

³ Loko u vona leswaku munhu wa tsakela, hatla u vuyela eka yena kumbexana endzhaku ka masiku ma nga ri mangani. U nga pfumeleli “lowo homboloka” a simula mbewu leyi byariweke embilwini ya munhu yoloye. (Mat. 13:19) Tiyiseka leswaku wa tlhelela loko u tshembise leswaku u ta vuya hi nkarhi wo karhi.—Mat. 5:37.

⁴ Loko U Fambisa Timagazini eXitarateni: Xana u tiyimisela ku endla leswaku vanhu lava u hlanganaka na vona loko u ri karhi u fambisa timagazini kumbe loko u chumayela hi xitshuketa va hambeta va tsakela? Loko u gimeta bulo ra wena u nga ha ku: “Ndzi tsakele bulo ra hina. Xana hi nga vonana kwihi leswaku hi ta ya emahlweni ni mhaka leyi?” Loko swi fanerile, vahuweleri van’wana va nyika vanhu lava tsakelaka tinomboro ta vona ta riqingho kumbe va kombela ta vona. Loko vanhu va hamba va ku vona endhawini yin’we u ri karhi u fambisa timagazini, swi nga endleka va nga chavi ku ku nyika tinomboro ta vona ta tinqingho kumbe tiadirese. Hambiloko vo ala ku ku nyika tinomboro ta vona ta riqingho kumbe adirese, u nga ha ringeta ku endla leswaku va hambeta va tsakela loko mi tlhela mi hlangana.

⁵ Ha tsaka loko hi vona swimilana leswi hi swi cheletaka ni ku swi hlakulela swi ri karhi swi kula. Hilaha ku fanaka, hi nga va ni ntsako lowukulu hi ku endla maendzo yo vuyela ni ku pfuna vanhu leswaku va kula emoyeni. (1 Kor. 3:6) Tiyimisele ku vuyela eka hinkwavo lava vonakaka va tsakela.