Ndzi nga vulavurisana njhani ni vatswari va mina hi milawu leyi va yi vekeke?

“Milawu ya vatswari va mina a yi ri kahle loko ndza ha ri ni malembe ya 15 kambe sweswi ndzi ni malembe ya 19 naswona ndzi lava ntshunxeko lowu engetelekeke.”—Sylvia.

Xana u titwa ku fana na Sylvia? Loko swi ri tano, nhlokomhaka leyi yi ta ku pfuna leswaku u burisana ni vatswari va wena hi xiyimo lexi.

• Leswi u faneleke u swi tiva

• Leswi u nga swi endlaka

• Leswi tintangha ta wena ti swi vulaka

Leswi u faneleke u swi tiva

U nga si vulavurisa ni vatswari va wena hi milawu ya vona, rhanga u kambisisa leswi landzelaka:

• Loko a ku nga ri na milawu vutomi a byi nga ta famba kahle. Ehleketa hi gondzo leri nga ni mphensamphensa ngopfu. A ku ta va ku ri njhani loko a ku nga ri na milawu ya le magondzweni, tirhoboto, mpimo wa rivilo lowu u faneleke u chayela ha wona? Milawu ya le kaya yi fana ni milawu ya le magondzweni yi endla leswaku swilo swi famba kahle.

• Milawu yi kombisa leswaku vatswari va khathala hi wena. Loko va nga veki milawu sweswo swi nga vula leswaku a va khathali hileswi nga ta ku humelela. Ku ta va ku ri vatswari va njhani?

XANA A WU SWI TIVA? Vatswari na vona va ni milawu! Loko u nga tshembi hlaya, Genesa 2:24; Deteronoma 6:6, 7; Vaefesa 6:4; na 1 Timotiya 5:8.

U nga ku yini loko u titwa onge milawu ya vatswari va wena a hi yinene?

U nga endla yini

Rhanga u ehleketa mi nga si vulavurisana hi swona. Loko swi ta eka ku yingisa milawu ya vatswari va wena, xana ndhuma ya wena yi njhani? Loko yi nga ri yinene swi ta vula leswaku a hi nkarhi wo va kombela mpfumelelo. Ematshan’weni ya sweswo vona nhlokomhaka leyi nge, “Ndzi Nga Endla Yini Leswaku Vatswari Va Mina Va Ndzi Tshemba?”

Loko mahanyelo ya wena ma ri manene, rhanga u lunghiselela leswi u tsakelaka ku swi vula eka vatswari va wena. Ku rhanga u ehleketisisa ka ha ri emahlweni swi ta ku pfuna u kambisisa swivangelo swa xikombelo xa wena. Xin’wana kombela vatswari va wena va veka nkarhi ni ndhawu laha u nga ta va u ntshunxekile ku vulavula na vona. Kutani loko u hlangana ni vatswari va wena tsundzuka leswi landzelaka:

Va xiximi. Bibele yi ri: “Rito leri tlhavaka ri pfuxa ku hlundzuka.” (Swivuriso 15:1) Hikwalaho va byele ka ha emahlweni: Loko u holova ni vatswari va wena kumbe u va lumbeta hi ku va va nga ku khomanga kahle swi ta va hlundzukisa.

“Loko ndzi xixima vatswari va mina na vona va ndzi xixima. Swa hi olovela ku endla ntwanano loko hinkwerhu hi xiximana.”—Bianca, 19.

Yingisa. Bibele yi hi byela ku ‘hatlisa emhakeni yo twa, hi nonoka emhakeni yo vulavula’ (Yakobo 1:19) Tsundzuka, u vulavurisana ni vatswari va wena ku nga ri ku va byela mhaka yo karhi.

“Loko hi karhi hi kula hi nga ha titwa hi ri ni vutivi byo tlula vatswari va hina kambe sweswo a hi ntiyiso. Hi ta va hi endla kahle loko hi yingisa swiletelo swa vona” —Devan, 20.

Vana ni ntwelavusiwana. Ringeta ku vona mhaka hi ku ya hi langutelo ra vatswari. Landzela xikombiso lexi humaka eBibeleni lexi nge, “mi nga veki tihlo etimhakeni ta n’wina ntsena, kambe ni le timhakeni ta van’wana” eka xiyimo lexi i vatswari va wena.—Vafilipiya 2:4.

“A ndzi tshamela ku vona vatswari va mina tanihi valala ku nga ri vanghana va mina. Kambe sweswi ndza swi xiya leswaku na vona a va dyondza ndlela yo ndzi khathalela tanihi leswi na mina a ndzi dyondza ku ti khathalela. Hinkwaswo leswi va swi endleke a va swi endla hi rirhandzu.”—Joshua, 21.

Tana ni xintshunxo. A hi nge hi xikombiso vatswari va wena va veke nawu: a va swi lavi leswaku u chayela awara laha u lavaka ku ya kona. Kumisisa lexi endlaka va titwa hi ndlela yoleyo, va vilerisiwa hi ku chayela kumbe hi laha ku nga ni ntlangu kona?

• Loko ku ri ku chayela, xana va nga pfumela leswaku u famba ni munhu un’wana loyi a nga ni ntokoto wo chayela?

• Loko ku ri mhaka ya ntlangu lowu u yaka eka wona, u nga va tiyisekisa njhani leswaku ku ta va na va mani ni loyi a nga ta va a langutela entlangwini?

Tsundzuka leswaku u fanele u vulavula hi ndlela ya xichavo ni ku va lehisela mbilu loko va vulavula na wena. Kombisa leswaku u “Xixima tata wa wena ni mana wa wena” hi marito ni swiendlo. (Vaefesa 6:2, 3) Xana va ta ku pfumelela? Kumbexana. Kumbe swi nge vi tano. Kumbe ha swimbirhi ka swona.

Hi musa amukela xiboho xa vatswari va wena. Leri i goza ra nkoka kambe mikarhi yo tala a ri tekeriwi enhlokweni. Loko u nga swi kumi leswi u swi lavaka kutani u holova ni vatswari va wena, sweswo swi nga ha endla swi ku tikela enkarhini lowu taka loko u vulavurisana na vona. Hi ndlela yin’wana loko u tiyimisele ku va yingisa hi mbilu hinkwayo, swi ta endla va olovisa milawu yin’wana leyi va ku vekeleke yona.