Xana Tinyiko Ta Khisimusi Ti Fanerile?

MALI yi tirhisiwa swinene hi Khisimusi hi mhaka ya leswi ku nyika hi nkarhi wolowo ku nga nchumu lowu languteriwaka. Loko munhu a nga hanani ha nchumu, u va a tlule mukhuva lowu simekiweke. Kambe James S. Henry, mutivi wa ikhonomi, loko a tsala eka The New Republic, u vule leswaku “ku nyika hi ku sindzisiwa” ka muxaka lowu, ku heta ntsako naswona i ku tlanga hi mali.

U ri: “Xikombiso xa ku tlanga hi mali, hi leswi ku hananiwaka hi tinyiko leti nga n’wi faneriki la nyikiwaka. Hi ku ya hi switolo leswikulu swa le New York, lembe na lembe, tiphesente ta 15 ta swilo swo durha leswi xaviweke hi Khisimusi swi tlheriseriwa exitolo. Hi nkarhi lowu fanaka tinyiko to tala leti lahlekelaka vanhu van’wana a ta ha vuyisiwi . . . , ku ringana n’we-xa-nharhu xa swixaviwa leswi a swi va tsakisi lava swi amukelaka.”

Xana hakunene swa twala ku hlayisa mali lembe hinkwaro ivi u xava tinyiko leti van’wana va nga ta ka va nga ti rhandzi kumbe leti va nga ti pfumariki? Xana swa twala ku ringeta ku tsakisa vanhu hi ku va xavela tinyiko to durha?

Henry u ri: “Nchumu lowu vavisaka ngopfu eka nhundzu leyi xaviwaka hi Khisimusi, i ‘ku hananela ku voniwa hi vanhu,’ tinyiko ta manyunyu, ti endleriwa lava va nga ti pfumaliki nikatsongo (‘munhu la nga na xin’wana ni xin’wana’). Tinyiko to tano to durha ti nyikiwa vanhu hi Khisimusi; hi ku ya hi muyimeri wa switolo leswikulu swa le New York, hi kotara yo hetelela ya lembe ku xavisiwa dayimani, tiwachi ni voya, swo tlula hafu ya leswi xavisiweke hi lembe.”

Hambi swi ri tano, na tona tinyiko to durha, hakanyingi a ti endli leswaku lava ti amukelaka va tsaka, ngopfu-ngopfu loko va nyikeriwa ku tumbeta rivengo leri nga kona. Hi ku ya hi dokodela wa le Canada, Richard Allon, “loko u nga swi koti ku hanyisana ni munhu lembe hinkwaro, a wu nge swi koti ku lulamisa sweswo hi nyiko yo durha. A wu nge wu herisi nandzu wa wena, naswona swi nga ha endleka u endla lowun’wana a ti vona nandzu.”

Lexi vavisaka, timiliyoni ta vanhu lava nga ematikweni lama ha hluvukaka ti hava swo tihanyisa ha swona, kasi lava nga ematikweni lama hluvukeke hakanyingi va na swilo hinkwaswo, kambe va tsandzeka ku tlangela leswi va nga na swona. Tinyiko ta Khisimusi a va ti tsakeli loko va ti kuma—“ndzi endla yini ha yona?”—kumbe hi ku nyangatseka—“lexi a ndzi xi lavi nikatsongo”—kumbe nkarhi wun’wana hi ku hlundzuka—“nyiko leyi ndzi hananeke ha yona yi durha swinene ku tlula leyi!” A swi hlamarisi leswi ntlawa wo sirhelela vana le Jarimani wu vuleke leswaku hi Khisimusi, ku hananiwa swilo swo tala ku tlula mpimo naswona hakanyingi swi endliwa hi vusopfa.

Ku tlula kwalaho, Khisimusi yi kurisa ku nga ringani ka vanhu, yi vanga ntshikilelo lowukulu ni ku pfumaleka ka ntsako. Van’wana va hava mali yo xava tinyiko, naswona le United States, leswi swi vanga vukhamba byo tala hi nguva ya Khisimusi ku tlula nkarhi wihi na wihi wa lembe. Henry, mutivi wa ikhonomi, u vikile a ku: “Maphorisa ma anakanya leswaku ku yiviwa loku ka nhundzu ku vangiwa hi leswi makhamba na wona ma lavaka ku nyika mindyangu ya wona tinyiko.”

Vo tala va nga pfumelelana na Tom Harpur, mutsari wa mahungu, loyi a tsaleke eka Sunday Star ya le Toronto, eCanada, a ku: “Hambi loko wu vonaka wu ri nkarhi wa ku tsaka, ndza swi tiva leswaku eka timiliyoni ta vanhu-kulorhi Khisimusi i nkarhi lowu nga tsakisiki, wa ku nga eneriseki, wa ku tivona nandzu ni lowu karhalisaka.”

Un’wana a nga ha ku, ‘ntsendze loko vana va tsaka.’ Kambe, xana tinyiko ta Khisimusi ta va pfuna vana?

Leswi Yi Swi Endlaka Eka Vana

“Hambi leswi lowu wu faneleke ku va nkarhi wa ku ‘tsaka’ wa lembe,” hi ku vula ka xirho xa huvo ya swikolo, Betty Poloway, “ku ni vana vo tala lava nga tsakiki.” Ha yini? Xana tinyiko ta Khisimusi ti nga va vavisa njhani vana?

Susan James, manana wa vana vanharhu, u vikile: “Vana va mina va pfuletela tinyiko ta vona, ndzi va langute hi mahlo ya mina. Loko va heta ku pfuletela, va yima ekusuhi ni nhulu leyi ya tona, ivi va kombela tin’wana! A hi vana lava nga ni makwanga, kambe tinyiko leti to tala, switshembiso leswi va byeriweke swona, swi va pfilunganye lerova va hetelela va va ni makwanga.”

Karen Andersson, holobye wa ta ntivo-miehleteto exibedlhele xa le Connecticut, U.S.A., u hlamusele xiphiqo lexi: “Swi heta matimba ku pfuka ni mixo hi Khisimusi u vona nhundzu leyi hinkwayo leyi xaviweke. Va pfuletela xitlangisi xin’wana ni xin’wana hi ku hatlisa lerova va pfumala ni nkarhi wo swi langutisisa kahle ha xin’we-xin’we. Eka n’wana loyi a nyanyukaka ngopfu kumbe loyi a hatlaka a khumbeka hambi loko ku nga ri na nchumu wo nyawula, Khisimusi yi nga va ni khombo eka yena.”

“Tinyiko a ta ha wu tisi ntsako lowu a ti wu tisa khale,” hi ku vula ka phepha-hungu ra le Jarimani eka xihloko lexi vulavulaka hi Khisimusi. Wansati un’wana u vilerile a ku: “Khale vana a va eneriseka loko va nyikiwe buku leyinene, swiambexa-mavoko kumbe swilo swin’wana leswitsongo. Kambe ntukulu wa mina sweswi u ri eka mina: ‘Kokwana, lembe leri ndzi lava khomphyuta!’”

Ina, tinyiko ta Khisimusi ti kurisa makwanga ni vutianakanyi. Henry mutivi wa ikhonomi u te: “Loko munhu a ta kota ku vona mpimo wa mintshikilelo yo tlula mpimo exikarhi ka vana ni vatswari hi nguva leyi, u fanele a endzela [xitolo xa switlangisi] xihi na xihi hi nkarhi lowu wa lembe: vamanana lava karhatekeke va kokakoka swihlangi leswi nga kotiki ku hanya handle ka switlangisi, swi ri karhi swi raha-raha, swi rilela switlangisi swo durha kambe leswi nga hava nkoka, swa manguva lawa.”

Kambe ku na swiphiqo swin’wana leswikulu leswi fambisanaka ni tinyiko ta Khisimusi.

Tinyiko Ta Khisimusi Ni Ntiyiso

Vutisa n’wana leswaku tinyiko takwe ti huma kwihi, xana hi ntolovelo a nga hlamurisa ku yini? Hi ku ya hi nkambisiso wa New York Times, vana va le Amerika va tiphesente ta 87 va le xikarhi ka malembe manharhu na khume va pfumela leswaku ti huma eka Santa Claus. Vatswari vo tala va yi khutaza dyondzo leyi, hi ku vutisa va ku: “Xana u lava leswaku Santa a ku tisela yini lembe leri?” Kambe vuyelo byi va byihi?

Ntokoto wa Cynthia Keeler, lowu vikiweke eka Daily News ya le New York wu swi kombisa kahle leswi. “Mhani,” i Britton, xifanyetana xakwe xa malembe ya nkombo hi vukhale lexi vutisaka, “xana Santa Claus u kona hakunene?”

Cynthia u n’wi fihlerile, hi laha vatswari vo tala va endlaka ha kona loko va vutisiwa xivutiso xexo. “U swi vona njhani wena?” i manana a vutisaka.

Britton u vule leswaku vanghana vakwe va n’wi byele leswaku a ku na nchumu wo tano, ntsena a nga tiyiseki ha swona. Kutani u sungule ku rila. “Ndzi byele ntiyiso, Mhani,” a ri karhi a rila.

Cynthia u te: “Loko a a nga rilanga, a ndzi ta va ndzi nga n’wi byelanga, kambe a ku ri mhaka leyikulu eka yena. A a lava nhlamulo. Hi loko ndzi n’wi byela leswaku a ku na nchumu lowu nga Santa wa xiviri.”

Daily News yi vikile: “A ha rila, Britton Keeler u vutise mana wakwe xivutiso lexi vatswari hinkwavo va xi chavaka loko vunwa lebyi se byi paluxiwile ni loko Santa Claus a paluxiwile: ‘Ha yini mi hi byela vunwa ha yena?’”

Vuyelo bya vunwa bya vatswari byi ni khombo lerikulu, hi laha Bruce Roscoe, profesa wa ta mindyangu wa le Yunivhesiti ya Central Michigan, U.S.A., a vuleke ha kona: “N’wana u kume leswaku manana o hemba, kasi vana lavan’wana hinkwavo a va tiyisile.” Xisweswo, Profesa Roscoe u vula leswaku n’wana hakanyingi u tala ku kanakana swilo hinkwaswo leswi vatswari va yena va nga tshama va n’wi byela swona.

Fred Koenig, profesa wa ntivo-miehleketo le Yunivhesiti ya Tulane eNew Orleans, Louisiana, U.S.A., wa kandziyisa: “Loko va hetelela va wu kuma ntiyiso wa mhaka, leswi swi veka ku tshembeka ka vatswari ekhombyeni swinene.” U engeterile: “Swi va endla va kanakana swilo swo tala.” N’wana a nga ha hetelela hi ku vula leswaku, “kumbexana mhaka ya vukhongeri yo va vunwa ntsena.”

Hakunene, a swi twali ku seketela vunwa hi ku byela vana hi nchumu wo tano wa ntsheketo lowu ku vuriwaka leswaku wu va xavela tinyiko. Kambe, xana vaendzi a va n’wi tiselanga, Yesu n’wana, tinyiko hi siku rakwe ra ku velekiwa? Xisweswo xana a nge swi tsakeli leswaku ku hananiwa hi tinyiko hi Khisimusi?

Xana I Mukhuva Wa Vukreste?

Bibele a yi vuli leswaku tintlharhi, kumbe vangoma va tinyeleti, va tisele Yesu tinyiko. Hambi swi ri tano, ku hanana hi Khisimusi a ku tekeleriwanga eka tona, hikuva a ti kalanga ti nyikana tinyiko. Xa nkoka swinene, a va humesanga tinyiko ta vona hi siku ra ku velekiwa ka Yesu, kambe va ti humese endzhakunyana. Swiendlo swa vona a swi pfumelelana ni mukhuva wa khale wa ku fundzha tihosi. Xiya leswaku rhekhodo ya Bibele yi vula leswaku loko va fika, Yesu a nga ri exitsengeleni kambe a a tshama endlwini. Hi yona mhaka leyi Heroda, hi ku ya hi leswi a byeriweke swona, a leriseke leswaku vafana hinkwavo va malembe mambirhi hi vukhale ku ya ehansi, va dlayiwa.—Matewu 2:1-18.

Nakambe xiya leswi: Xana a swi hlamarisi leswaku hi siku leri ku vuriwaka leswaku Yesu u velekiwe hi rona, yena hi yexe a nga kumi nchumu? Swi nga ha endleka leswaku a nga kumbukiwi nikatsongo! Kahle-kahle, xana mukhuva wa ku nyikana tinyiko hi Khisimusi wu huma kwihi?

Diane Bailey, loko a tsala eka Independent ya le Los Angeles, u te: “Ku hanana tinyiko ku sungule le ndzhaku eRhoma wa khale, laha vanhu a va nyikana tinyiko leti nga nyawuriki hi nkhuvo wa ku gandzela dyambu ni wa lembe lerintshwa.”

Ehansi ka xihloko-nkulu lexi nge “Ku Paluxa Mikhuva Ya Khisimusi,” Anita Sama eka Gannett News Service, u tsarile a ku: “Khale, mikhuva ya Vukreste yi nga si sungula, ku hanana tinyiko a ku ri xiphemu xa minkhuvo ya xixika. Varhoma a va nyikana marhavi yo huma entangeni wo kwetsima wa mirhi, ivi ku landzela tinyiko letikulu leti kombisaka ku navelelana mikateko eka lembe leri taka—silivhere, nsuku ni swakudya leswi endliweke hi vulombe.”

Ntiyiso hi lowu, Khisimusi i nkhuvo wa vuhedeni lowu tekiweke hi Vujagana. December 25, a hi siku ra ku velekiwa ka Yesu Kreste, kambe i siku leri fambisanaka ni minkhuvo yo pfumala mahanyelo ya khale ya vuhedeni leyi Vakreste vo sungula a va yi papalata.—Vona bokisi leri nge, “Xana Khisimusi Yi Huma Kwihi Hakunene?” eka matluka lama landzelaka.

Loko Yesu a a ri emisaveni namuntlha, xana a a ta titwisa ku yini hi tinyiko ta Khisimusi?

Ndlela Leyi Yesu A Languta Ku Hanana Ha Yona

Entiyisweni, Yesu a nga lwisani na kona ku hanana. Ku hambana ni sweswo, minkarhi hinkwayo a tiyimisela ku tirhela van’wana, u dyondzise vadyondzisiwa vakwe a ku: “Nyikani.” Naswona ku kombisa leswaku ku nyika ku ta endla leswaku lava nyikaka va kateka, u engeterile a ku: “Mi ta nyikiwa.”—Luka 6:38.

Hambi swi ri tano, laha Yesu a nga vulavuli hi ku hanana tinyiko. Kambe, a kombisa ntiyiso wa leswaku ku hanana hi vunene hakanyingi ku va ni vuyelo lebyinene. Leswi ngopfu-ngopfu swi tano loko loyi a nyikaka a ri ni nsusumeto lowunene naswona a rhandza lowun’wana “swinene hi [mbilu hinkwayo].”—1 Petro 1:22.

Rirhandzu a ri languteri ku hakeriwa hikwalaho ka leswi ri swi endlaka, xisweswo Yesu u te: “Kambe wena, loko u nyika swisiwana, voko ra wena ra ximatsi ri nga tshuki ri tiva leswi endliwaka hi lera xinene, leswaku ku nyika ka wena ku endleriwa exihundleni.” Munyiki a nga lavi ku voniwa kumbe leswaku nyiko yakwe yi voniwa hi van’wana, kambe a swi vuli swona leswaku a nge kateki. Yesu u kombise leswi loko a te: “Tata wa wena la vonaka exihundleni, hi yena la nga ta ku hakela.” (Matewu 6:3, 4) Ku tlula kwalaho, hi laha Bibele yi vulaka ha kona, munyiki u fanele “a nyik[a] hilaha a pimaniseke hakona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.”—2 Vakorinto 9:7.

Xisweswo, ku nyika loku tsakisaka Kreste ku susumetiwa hi rirhandzu, a ku languteli hakelo yo karhi, naswona a ku endliwi hi ku tikoka kumbe hi ku sindzisiwa. Vona ndlela leyi ku nyika ko tano ku hambaneke swinene ha yona ni ko tala loku endliwaka hi Khisimusi!

Xisweswo ke, ku nyika i xihlovo xa ntsako, a ku titshegi hi khalenda kumbe mikhuva yo karhi. Naswona a ku kombisi leswaku munyiki u tirhise mali muni, kambe ku kombisa leswi humaka embilwini yakwe. Hakunene, Khisimusi yi hambukise timiliyoni to tala leswaku ti nyikana swilo leswi hoxeke, hakanyingi hikwalaho ka swivangelo leswi hoxeke. Kutani ke, ha yini u nga ringeti ku nyika kun’wana handle ka Khisimusi? Ringeta ku nyika loku tisaka mikateko leyi fuweke ni ntsako wa xiviri, loku ku nga nhloko-mhaka ya xihloko lexi landzelaka.

[Bokisi/Xifaniso lexi nga eka tluka 8, 9]

Xana Khisimusi Yi Huma Kwihi Hakunene?

VANHU lava dyondzekeke va swi tiva leswaku December 25 a hi rona siku ra ku velekiwa ka Yesu Kreste. New Catholic Encyclopedia yi ri: “Siku ra ku velekiwa ka Kreste a ri tiviwi. Evhangeli a yi ri boxi siku ra kona hambi ku ri n’hweti ya kona.”

Ku tlula kwalaho, i mhaka leyi tivekaka leswaku Khisimusi ni mikhuva ya yona swi tekiwe eka vuhedeni. Kahle-kahle U.S. Catholic, yi te: “A swi koteki ku hambanisa Khisimusi ni timitsu ta yona ta vuhedeni.”

The Encyclopedia Americana ya hlamusela: “Mikhuva yo tala leyi sweswi yi nghenisiweke eka Khisimusi a yi nga ri ya Khisimusi eku sunguleni, kambe a yi ri mikhuva ya le mahlweni ka Vukreste ni leyi nga riki ya Vukreste leyi nghenisiweke ekerekeni ya Vukreste. Saturnalia, nkhuvo wa le Rhoma lowu tlangeriwaka exikarhi ka December, hi wona lowu tirhisiweke swinene eka mikhuva yo tala ya Khisimusi ya ku titsakisa. Hi xikombiso, mukhuva wa ku dya swinene, ku hanana tinyiko ni ku hisiwa ka makhandlhela swi huma eka mukhuva lowu.”

Malunghana ni mukhuva wa ku hanana tinyiko, magazini lowu nge History Today wu te: “Nkhuvo wo hanana tinyiko exikarhi ka xixika, eku sunguleni a wu fambisana ni vungoma, ku nga ri nkhuvo wo titsakisa ntsena. Tinyiko ta Saturnalia a ti katsa swipopana leswi ndlandlamuxekaka, leswi nyikiwaka vana. Handle ko kanakana, lowu a wu ri ntlango lowu tsakisaka swinene, kambe hi nkarhi wolowo wa swiyila-yila: vanhu lava a va hanya hi nkarhi wolowo a va ehleketa leswaku kumbexana i xikombiso xa gandzelo ra munhu, ra vana, ku katekisa mbewu leyi byariwaka.”

The New York Times ya December 24, 1991, yi humese xihloko lexi vulavulaka hi masungulo ya mikhuva ya Khisimusi, ku katsa ni ku hanana tinyiko. Simon Schama, profesa wa ta matimu le Yunivhesiti ya Harvard, u tsarile: “Khisimusi yi nghenisiwe ematshan’weni ya minkhuvo ya khale leyi a yi tlangela vugima-dyambu bya vuxika . . . Eka lembe xidzana ra vunharhu, loko vugandzeri bya dyambu byo tanihi vukhongeri bya Mithras bya le Persia byi nghene le Rhoma, masiku man’wana ya December ma tirhiseriwe ku tlangela ku vuya ka Sol Invictus: dyambu leri nga vonakiki. . . .

“Kereke yo sungula le Rhoma yi lwisane swinene ni minkhuvo yo karhi yimbirhi ya vuhedeni, nkhuvo wa Saturnalia lowu tekaka vhiki hinkwaro, lowu sungulaka hi Dec. 17, ni wa Kalends, lowu sungulaka Lembe Lerintshwa. Eka nkhuvo wo sungula munhu a pfumeleriwa ku endla hi laha a lavaka ha kona, nkhuvo lowu a wu lawuriwa hi hosi ya minkhuvo, ku nga ri Santa kambe hi Saturn hi yexe, hosi eku dyeni, eku nweni ni le ka tinxaka tin’wana ta ku huha. Hambi swi ri tano, hi nkhuvo wa Kalends, lembe a ri cinca, ku hananiwa tinyiko hi ku ya hi mukhuva wa kona, hakanyingi ti boheleriwa eka marhavi ya rihlaza lawa a ma khavisa tindlu hi nguva ya minkhuvo leyi.

“Swi tikomba onge kereke yo sungula a yi nga voni xihoxo eka minkhuvo leyi yo pfumala mahanyelo. Vafundhisi va yona, ngopfu-ngopfu St. John Chrysostom la tivekaka hi pongo rakwe, u vule leswaku vuhedeni a byi nge tiyiseleriwi nikatsongo. . . . Tanihi leswi a va nga pfumelelani hi siku ra ku velekiwa ka Yesu . . . , va swi vone swi antswa ku siva Saturnalia ha rona . . . Xisweswo ku vuya ka dyambu ku hundzuke ku velekiwa ka N’wana wa Xikwembu . . .

“Hi ndlela leyi fanaka, Kalends yi siviwe hi Nkhuvo wa Epiphany, tinyiko swin’we ni swingwavila leswi Varhoma va vahedeni a va nyikana swona swi hundzuke tinyiko leti ku vuriwaka leswaku tihosi tinharhu ti ti nyike Hosi leyintshwa ya Misava. Exikarhi ka lembe xidzana ra vumune, ku simekiwe swivumbeko swa xisekelo swa khalenda ya Khisimusi.”

Hambi leswi vanhu lava dyondzekeke va swi tivaka leswaku Khisimusi ni mikhuva ya yona i swa vuhedeni, vo tala va vula leswaku sweswo a swi na mhaka. Loko a hlamula rungula ra Profesa Schama, rhabi la nga empecenini u tsalele muhleri wa Times papila eku sunguleni ka lembe leri, a ku: “Masungulo ya vumbiwa byo karhi lebyi simekiweke a byi wu khumbi ntikelo wa rona namuntlha.” Malunghana ni Khisimusi ni minkhuvo yin’wana yo tano u te: “Lava tlangelaka vumbiwa byebyo va byi nyika nhlamuselo leyintshwa leyi khumbaka vutomi bya vona vini ni ku tsakisa mimoya ya vona.”

Kambe, xana minkhuvo ya Khisimusi yi tisela vanhu ntsako kumbe ku humesa mihandzu leyinene ya Vukreste? Entiyisweni, hi laha hi swi vonaka ha kona, mihandzu ya kona hi ntolovelo yi bihile, a hi yinene. Ku tlula kwalaho, xana Vakreste va fanele va lomba minkhuvo ya vukhongeri bya vuhedeni? Bibele yi ri: “Mi nga rhwaleni mpingu wun’we ni lava nga riki vapfumeri; hikuva ku tirhisana ku kwihi exikarhi ka ku lulama ni ku homboloka xana? Kumbe ku vonakala ku ni ku yelana kwihi ni munyama ke? Xana Kriste na Lowo biha, va nga hela hi ku twanana xana? . . . ‘Hikokwalaho, [Yehovha u] ri: “Humani exikarhi ka vona, mi hambana na vona; mi nga tshuki mi khumba leswi nga tengangiki.”’”—2 Vakorinto 6:14-17.

Nakambe, tsundzuka leswi Yesu a swi vuleke hi vugandzeri bya Xikwembu xa Matimba Hinkwawo: “Lava xi gandzelaka, va fanele va xi gandzela hi moya ni ntiyiso.” (Yohane 4:24) Xisweswo, loko vugandzeri bya hina byi ta amukeleka eka Xikwembu, byi fanele byi sekeriwa entiyisweni. Kambe, Khisimusi yi vuriwa siku ra ku velekiwa ka Yesu Kreste hambi loko ri nga ri rona. Kambe ku vuriwa yini hi lava ku vuriwaka leswaku va tisa tinyiko hi masalamusi hi Khisimusi, vo tanihi Santa Claus? Loko vana va byeriwa leswaku tinyiko ti huma eka vanhu vo tano, xana leswi a hi ku xisa vana?

Loko u xi rhandza Xikwembu hakunene, a wu ta yingisa nawu wa xona ivi u tshika ku hlanganyela eka leswi thyakeke hi tlhelo ra vukhongeri. Xana wa wu rhandza ntiyiso lerova u nga tiyimisela ku papalata tiholideyi leti seketelaka vunwa?

[Xifaniso lexi nga eka tluka 7]

Xana swa twala ku xisa vana, u va byela leswaku Santa Claus hi yena a va tiselaka tinyiko?