Xin’wana Xo Antswa Ku Tlula Tinyiko Ta Khisimusi

“CHRISTOPHER wa malembe ya tsevu u vulavule na mina, onge hi loko a ko va nchumu lowu tolovelekeke ngopfu emisaveni hinkwayo, a ku, hi Khisimusi a nga ‘kumi nchumu.’ Kambe mavulavulelo yakwe a ma nga kombi ku vilela nikatsongo. Alexander (wa malembe ya 8 hi vukhale) u tiphofule hi ndlela leyi fanaka, a ku: ‘Hina hi Timbhoni ta Yehovha.’”

Phepha-hungu ra le Jarimani Kölner Stadt-Anzeiger ri sungule xihloko xa rona hi ndlela yoleyo hi ta mindyangu leyi phepha rolero ri nge “yi honisa Khisimusi hikuva a hi siku ra ku velekiwa ka Yesu naswona hikuva ri ni vuhedeni endzeni.” Kambe xana Christopher na Alexander a va terisi vusiwana? Nikatsongo, phela, hi laha xihloko xi kombiseke ha kona, vuhiri lebyi vafana lava va vekaka swilo swo tlangisa eka byona, a byi kombi leswaku va honisiwa hi vatswari va vona.

Hambi swi ri tano, vatswari van’wana lava yaka eka mbulavurisano wa vatswari ni vadyondzisi va xikolo, le dzongeni wa Jarimani, va vule leswaku leswi Timbhoni ta Yehovha ti tsandzekaka ku nyika vana va tona tinyiko ta Khisimusi, va titwa va nga sirheletekanga. Kambe, wolowo a hi ntiyiso, hi laha mudyondzisi wa vona a vuleke ha kona. U vule leswaku “vana va Timbhoni ta Yehovha va tikombe va ri lava ntshunxekeke, va ringanisela, naswona va swi kota ku hlamusela ripfumelo ra vona hi laha ku heleleke hi voxe, nchumu lowu vana van’wana va nga wu kotiki.”

I ntiyiso, makume ya magidi ya mindyangu emisaveni hinkwayo yi sive Khisimusi hi nchumu wun’wana wo antswa, yi tiyiseka leswaku yi nyika vana va yona tinyiko lembe hinkwaro. Leswi swi tsakisa ndyangu hinkwawo.

Nchumu wun’wana lowunene hi leswaku swi tisa minkarhi yo tala ya ntsako elembeni, naswona vana va kota ku tsakela nyiko yin’wana ni yin’wana hi laha ku engetelekeke. Nchumu wun’wana lowunene hi leswaku vana va swi tiva leswaku i vatswari va vona lava va va nyikaka tinyiko hikwalaho ko va rhandza, naswona va fanele ku khensa vona. Vatswari a va halati mali ni matshalatshala mahala ivi vana va vona va khensa Santa Claus loyi a ngo anakanyeriwa, kumbe va va endla va va vana lava nga khensiki, hi ku anakanya leswaku i ntirho wa Santa ku va tisela tinyiko ni leswaku a swi bohi ku khensa.

Nyiko Leyi Nga Ringanisiwiki

Hakanyingi, Dominik wa malembe ya khume, na Tina wa malembe ya tsevu, va kuma tinyiko letitsongonyana leti nga languteriwangiki leti humaka eka vatswari va vona—chokoleti exiseketelweni xa mubedo, xitsalo kumbe buku yo tsalela tinhla leyi va nga yi tirhisaka exikolweni, kumbe nchumu wun’wana wo tlangisa lowu wu nga ta va susa xivundza hi tin’hweti ta vuxika. Kambe i yini lexi va xi tlangelaka swinene? Vatswari va vona va hlamula: “Loko hi tinyika nkarhi wo va na vona—hi xikombiso, hi tlanga na vona egambokweni.”

Vatswari van’wana vo tala lava va nga Timbhoni ta Yehovha va swi endla leswi. Edelgard u ri, “emisaveni leyi yi khomekeke, nkarhi hi wona nchumu lowu nga wa nkoka swinene lowu ndzi nga wu nyikaka vana va mina.” Na vona vana va vula sweswo! Ursula u ri vana va yena va languta nkarhi lowu va wu heteke swin’we hi ndyangu va endzile, tanihi “nyiko leyikulu ku tlurisa.” Hambi ku ri mutshama-xitulu wa vandla ra vadyondzisi le Jarimani wa ha ku vula sweswinyana a ku nyiko leyikulu ya Khisimusi leyi vatswari va nga yi nyikaka vana va vona i nkarhi ni ku leha mbilu.

Hakunene, ku tiendla u kumeka hi wexe—ni nkarhi wa wena, nkhathalelo ni nyingiso wa wena—ku nga khathariseki leswaku u swi endlela ndyangu wa wena kumbe vanghana va wena, i nyiko leyi tlulaka hinkwato. Swi le rivaleni leswaku tinyiko leti a ti fanelanga ti vekeriwa masiku yo karhi elembeni.

Ku Nyika Hi Ku Tsaka Loku Enerisaka

Xiya swikombiso swa Timbhoni ta Yehovha leti endlaka xin’wana lexi antswaka ku tlula tinyiko ta Khisimusi. Wilfried na Inge le Jarimani va te: “I ntolovelo eka hina ku nyika munhu wihi na wihi loyi hi n’wi anakanyaka tinyiko, nakambe hi hlela ni ku hanana hi swilo leswikulu.” Hi ku fanana, Dieter na Debora va endla matshalatshala lama hleriweke leswaku va nyika n’wana wa vona wa mufana tinyiko lembe hinkwaro. Va hlamusela leswaku “mpimo ni nkoka wa nyiko a hi leswikulu ngopfu, naswona tinyiko letikulu kumbe leti durhaka a hi tali ku ti xava.”

Vana vo tala va langutela tinyiko hi nkarhi wa Khisimusi, kutani nchumu lowu va nge i xihlamariso a wu vi kona. Helga u ri “vana [va yena] va tsaka swinene loko va kuma tinyiko leti va nga ti langutelangiki ku tlula loko va kuma swilo hi nkarhi lowu ku languteriwaka tinyiko ha wona.” Natascha, wa malembe ya 15 hi vukhale, u ri “swi tsakisa swinene ku kuma nyiko leyi nga xihlamariso leyi humaka embilwini ku ri na leyi nyikeriwaka hi nkarhi wo karhi lowu vekiweke, hikwalaho ka leswi mukhuva wu lavaka swi endliwa.”

Hi ku fanana, i swa nkoka leswaku u xalamukela muxaka wa tinyiko leti vana va ti tsakelaka. Mayelana ni leswi, Fortunato, loyi na yena a tshamaka le Jarimani, wa vika: “Tinyiko leti hi va nyikaka tona i swilo leswi vana va nga vula leswaku va nga tsakela ku va na swona. Kambe hi ringeta ku va nyika swona hi nkarhi lowu va nga wu anakanyiki. U ta vona ndlela leyi va nga ta tsaka ha yona!”

Nakambe vatswari va kuma leswaku ku nyika vana va vona nyiko loko va ri ekaya va vabya swi va endla va titwa ku antswa. Van’wana va hanana tinyiko ku nga si fika masiku ya ku wisa ka xikolo leswaku vana va ta khomeka hi swo karhi. Hi xikombiso, loko nkarhi wo wisa wu nga si fika, Stefan u nyikiwe xivonantsongo (microscope). Tata wa yena u ri, “a ku ri xihlamariso hakunene, lerova a tlula kunene hi ku tsaka.” Hakunene, nyiko leyi humaka embilwini ni leyi nga languteriwangiki yi tisa ntsako lowukulu eka munyiki ni loyi a yi amukelaka.

I ntiyiso, vana va ni swilo swa vona leswi va swi lavaka. Jörg na Ursula va hlamusela: “Loko n’wana wa hina a hi byela lexi a nga tsakelaka ku va na xona, hi vulavula na yena ha xona. Xana lexi a xi lavaka xa twisiseka? Xana nchumu wolowo wa ma fanela malembe ya yena? Xana yi kona ndhawu leyi hi nga xi vekaka kona endlwini? Loko hi nga swi koti ku n’wi endlela xona hi ku hatlisa, hi ringeta ku tshama hi ri karhi hi xi tsundzuka ni ku ringeta ku xi endla hi nkarhi lowu faneleke endzhakunyana.” Kavula, i swinene ku nga nyenyerisi vana hi ku va endlela xin’wana ni xin’wana, leswi swi nga va endlaka va lahlekeriwa hi ntsako lowu ku amukela tinyiko ku wu tisaka.

Vatswari lava nyikaka, va hundzisela moya lowu nga ta kombisiwa hi ntsako eka vana va vona. Sebastian wa malembe ya khume hi vukhale u ri: “A swi lavi ndzi yimela masiku yo wisa leswaku ndzi tsakisa vatswari va mina ni vamakwerhu. Leswi lavekaka i ku va la tsakeke, ndzi tlhela ndzi va ni swimalananyana.”

Mindyangu ya Timbhoni ta Yehovha yi kuma leswaku ku na tinxaka tin’wana ta tinyiko leti tlulaka tinyiko ta Khisimusi. Tona i maendzo lama hleriweke, hi xikombiso, ku ya entangeni wa swiharhi, emuziyamu, eminkombisweni kumbe endhawini ya le makaya. Tinyiko leti ta dyondzisa naswona hakunene ta tsakisa eka lavantshwa.

Mikateko Ya Ku Nyika U Tsakile

Hi ku tirhisa misinya ya milawu ya Bibele loko hi hanana tinyiko, hi ta papalata mintshikilelo ni ku karhateka loku vangiwaka hi tinyiko ta Khisimusi. Naswona tsundzuka, ku nyikela hi nkarhi ni vuswikoti bya hina leswaku hi letela ni ku aka van’wana emianakanyweni ni le moyeni i nyiko ya nkoka swinene ku tlula tinyiko leti vonakaka. Tinyiko leti letikulu ti tiyisa mindyangu, ti tiyisa vunghana naswona ti tisa ntsako wa xiviri lembe hinkwaro ku nga ri eka la nyikiwaka ntsena kambe ngopfu-ngopfu eka munyiki.—Mintirho 20:35.

Kutani, ematshan’wini ya ku nyika tinyiko hikwalaho ko bohiwa hi mukhuva wa nkarhi wa Khisimusi, ha yini u nga endli swin’wana leswi hambaneke lembe leri? Ha yini u nga ringeti ndlela yo antswa?

[Bokisi/Xifaniso lexi nga eka tluka 12]

Kambe Xana Vana A Va Nge Yi Naveli?

Rebecca, wa malembe ya 16 u ri: “A ndzi yi naveli Khisimusi, tanihi leswi ndzi kumaka tinyiko lembe hinkwaro. Ndzi tsakela nyiko leyi ngo va xihlamariso ku tlula leyi ngo sindzisiwa.”

Tina, wa malembe ya 12 u ri: “Ndzi swi tsakela ngopfu ku kuma tinyiko leti fanelekaka, ku nga ri hi nkarhi wo karhi wa lembe, kambe nkarhi wun’wana ni wun’wana wa lembe—naswona ku nga ri tinyiko leti ndzi bohekaka ku ti khensa, kasi kahle-kahle a ndzi ti lavi.”

Birgit, wa malembe ya 15 u ri: “Tinyiko hinkwato emisaveni a ti pfuni nchumu loko ku ri na swiphiqo endyangwini. Hi yona mhaka leyi hi endlaka swilo swo tala swin’we tanihi ndyangu.”

Janosch, wa malembe ya 12 u ri: “Hina vana hi rhandza vatswari va hina hambi loko va nga hi nyiki tinyiko. Rirhandzu ra vona hi yona nyiko leyikulu yo tlula hinkwato.”

[Xifaniso lexi nga eka tluka 10]

Nyiko yo saseka—i nkarhi wa wena!