“Ntiyiso Wu Ta Mi Ntshunxa”!

MARITO wolawo lama vuriweke hi Yesu Kreste lama kumekaka eBibeleni eka Yohane 8:32 i ntiyiso lowu heleleke. Ntiyiso wa Bibele wu hi ntshunxa eka vukholwa-hava ni le ka mikhuva leyi nga xi tsakisiki Xikwembu ni leyi hi vavisaka. Mhaka leyi landzelaka yi komba ndlela leyi ntiyiso wa Bibele wu ntshunxeke vanhu va le matikweni yo hambana-hambana eka mikhuva yin’wana leyi tikaka leyi fambisanaka ni Khisimusi.

Ntiyiso Wa Bibele Wu Va Ntshunxile!

Argentina Oscar u ri: “Ndyangu wa ka hina wu ntshunxiwe eka swiphiqo leswi fambisanaka ni ku dya ni ku nwa ku tlula mpimo ni tinyiko to durha leti a hi nga ta swi kota ku ti xava.”

Mario u titwe a kume ntshunxeko lowukulu loko a hlamuseriwe leswaku mikhuva ya Khisimusi yi sekeriwe eka mavunwa. U ri: “Ndza tsaka sweswi hileswi ndzi kotaka ku nyika vanhu van’wana tinyiko nkarhi wihi na wihi wa lembe loko ndzi ri ni swimalana swo va xavela.”

Canada Elfie u ri: “Ndza swi rhandza ku nyikana tinyiko ni vanhu. Kambe a ndzi ti rhandzi tinyiko leyi ndzi nyikiwaka hi munhu la sindzisiwaka ku endla tano. Loko ndyangu wa ka hina wu tshike ku tlangela Khisimusi, hi titwe hi rhuliwe ndzhwalo wa ku nyikana tinyiko.”

Ulli, n’wana wa Elfie wa nhwanyana, u ri: “Endzhaku ka loko vatswari va mina va tshike ku tlangela Khisimusi, a va tala ku hi xavela swilo swo tlangisa kumbe tinyiko hi nga swi langutelanga hi nkarhi wun’wana ni wun’wana wa lembe, naswona a hi swi rhandza sweswo. Loko swichudeni-kulorhi swi hi vutisa leswaku ha yini vatswari va hina va hi xavela tinyiko, a hi swi byela leswaku a ku endlekanga nchumu, va lo hi xavela ntsena. Hambiswiritano, a swi va olovelanga vatswari va hina ku cinca mahanyelo ya vona va hanya hi milawu ya Bibele hikuva a va kanetiwa hi maxaka. Kambe va yime va tiyile. Swi ndzi khumbe ngopfu ku vona ndlela leyi a va tiyimisele ha yona ku gandzela Yehovha Xikwembu hi ndlela leyi amukelekaka.”

Silvia u vula leswaku ku tshika ku tlangela Khisimusi a swi fana ni ku ‘rhuliwa ndzhwalo.’ U ri: “Endzhaku ka sweswo ndzi titwe ndzi tsakile. A ndzi swi tiva leswaku ndzi tsakisa Yehovha Xikwembu, naswona sweswo a swi antswa ku tlula ku tlangela Khisimusi.”

Kenya Peter u tsale a ku: “Loko ndza ha tlangela Khisimusi, a ndzi lomba mali yo tala leswaku ndzi xava tinyiko ni ku hakelela switshongo. Vutomi byebyo byi endle leswaku ndzi tirha tiawara leti engetelekeke lerova a ndzi nga ha swi koti ku heta nkarhi wo tala ndzi ri ni ndyangu wa ka hina. A ndzi tsake ngopfu loko ndzi chupula emukhuveni yoleyo hinkwayo!”

Carolyne u ri: “Ndzi nyika swirho swa ndyangu wa ka hina ni vanghana va mina tinyiko na vona va ndzi nyika tinyiko nkarhi wun’wana ni wun’wana. Ndzi ehleketa leswaku tinyiko teto leti u ti kumaka u nga swi langutelanga naswona ti humaka embilwini leyi tsakeke i tinene ngopfu.”

Japani Hiroshi na Rie va ri: “Vana va hina a va tshami va rindzele ku nyikiwa tinyiko naswona a va titekeli ehansi tinyiko leti va nyikiwaka tona. Swa hi tsakisa hina vatswari ku xiya leswaku va swi twisisa leswaku munhu u fanele a nyika swi huma embilwini.”

Keiko u ri: “Ndyangu wa hina a wu hamba wu tlangela Khisimusi. Loko hi vona leswaku n’wana wa hina se u etlele, mina ni nuna wa mina a hi veka nyiko etlhelo ka mubedo wakwe. Hi xa mundzuku xa kona nimixo, a hi n’wi byela hi ku: ‘Tatana wa Khisimusi u ku nyike nyiko hileswi u tikhomeke kahle.’ Loko ndzi dyondze ntiyiso malunghana ni Khisimusi kutani ndzi byela n’wana wa mina hi leswi ndzi swi dyondzeke, u hlamarile a tlhela a rila hileswi a hi n’wi xisa. Hi nkarhi wolowo, ndzi xiye leswaku Khisimusi a hi nkhuvo wo tsakisa hilaha vanhu va wu kombisaka hakona. Kambe i mavunwa naswona ndzi kingindziwe hi ripfalo hileswi ndzi xiseke n’wananga hi ku n’wi dyondzisa mavunwa wolawo.”

Philippines Dave u ri: “Swa tika ku hlamusela ntsako lowu Yehovha a hi nyikaka wona hi ku tirhisa ntiyiso lowu tengeke lowu nga eBibeleni. Loko swirho swa ndyangu wa hina swi nyika vanhu van’wana tinyiko, a hi langutelanga leswaku va hi tlherisela swo karhi. Naswona hi nyika swi huma embilwini.”

Vanhu lava tshahiweke laha henhla ko va van’wana eka va timiliyoni lava dyondzeke eka mintokoto ya vona vini leswaku ntiyiso wa Bibele wu ntshunxa vanhu. Nchumu wun’wana wa nkoka ngopfu hileswaku loko hi hanya hi ku pfumelelana ni ntiyiso wolowo, hi tsakisa mbilu ya Xikwembu. (Swivuriso 27:11) Yesu Kreste u te: ‘Vagandzeri va ntiyiso va ta gandzela Tatana hi moya ni ntiyiso, hikuva, hakunene, Tatana u lava lavo tano leswaku va n’wi gandzela.’ (Yohane 4:23) Loko Xikwembu xi languta mbilu ya wena, xana xi vona munhu loyi a tsakelaka ntiyiso? Hi tshemba leswaku nhlamulo i ina!

[Xifaniso lexi nga eka tluka 9]

Vakreste va nyika van’wana tinyiko hi ku tirhandzela nkarhi wun’wana ni wun’wana wa lembe