Xana Vuyimbeleri Byi Nga Ku Vavisa Hakunene?

EHLEKETA hi leswi: Munghana wa wena wa le ntirhweni u ku rhamba leswaku mi ya lalela swin’we ekaya kakwe. Ivi u pfumela. Loko madyambu ma ri karhi ma hundza, u vona swilo swo tala leswi chavisaka eka loyi u n’wi endzeleke. U ni nsele, u vulavula hi ku tisunga, u tirhisa nhlambha naswona u seketela vugandzeri bya Diyavulosi. Kutani, xana u nga swi tsakela ku heta madyambu man’wana u ri na yena? U hlamula u ku “E-e!”

Ku engetela kwalaho, ku vuriwa yini loko vusiku byebyo, munghana loyi o rhekhoda tidyondzo ni malangutelo ya yena lama gombonyokeke ivi a ku nyika khasete ya kona? Xana u nga yi tlanga hi ku phindha-phindha? Nikatsongo.

Hambi swi ri tano, ntiyiso hi leswaku timiliyoni ta vanhu namuntlha ta swi endla leswi. Hikwalaho ka sweswo, vo tala lava yingiselaka vuyimbeleri lebyi va ehleketa ni ku hanya hi ku ya hi nkucetelo wa byona.

Hi byihi vuyimbeleri lebyi hi vulaka byona? Minkucetelo leyi borisaka yi nga kumeka eka muxaka wihi na wihi wa vuyimbeleri. Ku nga khathariseki leswaku munhu u tsakela vuyimbeleri bya classic, jazz kumbe bya muxaka wun’wana, ku laveka vukheta ni ku hlawula.

Hambi swi ri tano, ku na tinxaka tin’wana ta vuyimbeleri leti ti taleke hi timhaka leti thyakeke. Leswi i ntlhontlho lowukulu. U.S.News & World Report yi hlamusela nhloko-mhaka leyikulu ya vuyimbeleri bya swichayachayana leswi pfumaka ngopfu tanihi “ku bola ka vana va kondlo-a-ndzi-dyi, swi tale hi nkucetelo wo biha wa rimbewu ni ku khutaza ku tisunga.” Dr. David Elkind u vulavula hi mintlawa yin’wana ya rock leyi “nga ni nhlambha swinene ni mahanyelo yo biha lerova va onha ni ndhuma ya vuyimbeleri hinkwabyo bya rock.” Eka tin’wana tindhawu, tialbamu tin’wanyana ti funghiwile ku tsundzuxa vanhu hi nhlambha leyi ti yi tameleke.

Xana vanhu va sola vuyimbeleri lebyi ntsena hi leswi va nga byi laviki, kumbe ku ni xivangelo lexi twalaka? A hi langutisiseni vuyimbeleri byin’wana bya rock lebyi sweswi byi fikelelaka vanhu vo tala hi tialbamu, tivhidiyo ta vuyimbeleri eka thelevhixini ni tikhonsati leti endliwaka hi xiviri. Kambisisa leswaku ti va khumba njhani vanhu. Kutani u tivonela hi wexe leswaku xana vuhungasi lebyi i ku titsakisa loku nga riki na khombo kumbe i chefu ya mianakanyo. Xana i nchumu lowu wena ni ndyangu wa wena mi nga fambisanaka na wona kumbe mi tshama na wona?