Langutelo Ra Bibele

Xana Xikwembu Xi Rivalela Ku Fikela Kwihi?

“Ndzi vona onge Xikwembu a xi nge ndzi rivaleli swidyoho swa mina. A xi nge ndzi amukeli hikwalaho ka leswi ndzi nga swi endla.”—Gloria.

GLORIA a a swi nga n’wi nonon’hweli ku byela van’wana leswaku Yehovha a nga va rivalela swidyoho swa vona.a Kambe loko a languta swihoxo swakwe, Gloria u tivone a cukumetiwile. A a vona onge Yehovha a nge n’wi rivaleli.

Ku pfumela xihoxo kumbe ndlela leyi hoxeke ya vutomi swi nga karhata ripfalo. Davhida endzhaku ka loko a dyohile u tsarile: “A ndzi karhele hi ku rila siku hinkwaro. Ntamu wa mina a wu herile.” (Pisalema 32:3, 4, Today’s English Version; ringanisa Pisalema 51:3.) Lexi tsakisaka, Yehovha u tsakela ku rivalela. U ‘tiyimisele ku rivalela.’—Pisalema 86:5; Ezekiyele 33:11.

Hambi swi ri tano, Yehovha u vona mbilu. Ku rivalela kakwe a hi ko xisetela. (Eksoda 34:7; 1 Samuwele 16:7) Mudyohi u fanele ku pfumela xidyoho xakwe, a tisola hi laha ku heleleke, kutani a tshika ndlela yakwe yo biha tanihi nchumu lowu nga rhandzekiki ni lowu hlambisaka timbilu. (Pisalema 32:5; Varhoma 12:9; 2 Vakorinto 7:11) Loko a endla sweswo, mudyohi a nga rivaleriwa kutani a kuma “minkarhi yo phyuphya” leyi humaka eka Yehovha.—Mintirho 3:19.

Kambe hambi endzhaku ka ku hundzuka, van’wana va ha titwa va nga amukeleki. Xana va fanele va rhwala ndzhwalo wa xidyoho hi laha ku nga heriki? I nchavelelo wihi lowu nga kumiwaka eBibeleni wa lava hundzukeke eswidyohweni swa vona, lava swi fularheleke, kambe va ha biwa hi ripfalo?—Pisalema 94:19.

Ku Susa Ndzhwalo

Loko a khomiwe hi gome hikwalaho ka swihoxo swakwe, Davhida u khongele Yehovha a ku: “Languta nhlomulo ni ku v̌av̌iseka ka mina, u v̌a u nḍi khomela ku dyoha hikwaku ka mina.” (Pisalema 25:18) Laha Davhida u kombele leswaku Yehovha a endla swin’wana, ku nga ri ku rivalela ntsena. U kombele leswaku Yehovha a n’wi “khomela” swidyoho swakwe leswaku a swi susa kumbe a swi bakanya. Xidyoho xi ni vuyelo lebyo biha, naswona a swi kanakanisi leswaku eka Davhida a swi katsa ni ndzhwalo wa ripfalo leri karhatekeke.

Lembe na lembe Vaisrayele a va tsundzuxiwa leswaku Yehovha a nga susa swidyoho swa tiko. Hi Siku ro Phahlelana Mariyeta muprista lonkulu a a veka mavoko yakwe ehenhla ka nhloko ya mbuti, a vula swidyoho swa vanhu eka yona, kutani a yisa mbuti leyi emananga. Un’wana ni un’wana loyi a a ri kona a a ku vona hi mahlo ya mianakanyo ku suka ka swidyoho swa tiko.—Levhitika 16:20-22.

Hikwalaho vanhu lava hundzukeke eswidyohweni swa vona va nga kuma nchavelelo eka sweswo. Maendlelo ya swilo hi Siku ro Phahlelana Mariyeta a ma fanekisela lunghiselelo lerikulu swinene ra ku susa swidyoho—gandzelo ra nkutsulo ra Yesu Kreste. Esaya hi vuprofeta u tsale leswi ha Yesu: “O rwele nanḍu wa v̌anhu v̌o tala.” (Esaya 53:12) Hikwalaho, swidyoho swa nkarhi lowu hundzeke a swi fanelanga swi karhata ripfalo. Kambe xana Yehovha u ta vuya a tsundzuka swidyoho leswi?

Ku Herisa Nandzu

Eka xikhongelo xakwe xa xikombiso, Yesu u te: “U hi rivalela swidyoho swa hina.” (Matewu 6:12) Rito ra Xigriki laha leri hundzuluxeriweke va ku “rivalela” i xivumbeko xa riendli leri vulaka “ku tshiketa.” Xisweswo, ku rivalela xidyoho swi fanisiwa ni ku tshiketa kumbe ku herisa nandzu.—Ringanisa Matewu 18:23-35.

Petro u ndlandlamuxe mhaka leyi loko a te: “Hikwalaho, hundzukani ivi mi tisola leswaku swidyoho swa n’wina swi suriwa.” (Mintirho 3:19) “Suriwa” laha ri vula ku herisa. Swi fana ni ku sula mhaka leyi tsariweke, ku sula nandzu wa khale.—Ringanisa Vakolosa 2:13, 14.

Hikwalaho, lava hundzukeke a va fanelanga va chava leswaku Xikwembu xi ta lava leswaku va riha nandzu lowu xi wu heriseke. Xi ri: “Nḍi nga ka nḍi nga ha anakanyi ŝidyoho ŝa wena.” (Esaya 43:25; Varhoma 4:7, 8) Xana leswi swi vula yini eka mudyohi la hundzukaka?

Ku Susa Xivati

Hi ku tirhisa muprofeta Esaya, Yehovha u te: “Hambi loko swidyoho swa n’wina swi fana ni xivunguvungu, swi endliwa swi basa tanihi gamboko; hambi loko swi tshwukile tanihi nguvu ya krimson, swi ta endliwa swi fana ni voya.”—Esaya 1:18, NW.

Matshalatshala ya ku susa xivati lexikulu engubyeni hakanyingi a ma humeleli. Minkarhi yo tala xivi lexi xa hunguteka kambe xa vonaka. Vona ndlela leyi swi chavelelaka ha yona leswi Yehovha a kotaka ku basisa swidyoho leswi kotisaka xivunguvungu kumbe krimson, a swi endla swi basa ku fana ni gamboko.—Ringanisa Pisalema 51:7.

Xisweswo, mudyohi la hundzukaka a nga fanelanga a titwa onge u ni xivati lexi nga sukiki evuton’wini byakwe hinkwabyo. Yehovha a nga swi hunguti kunene swidyoho, a endla leswaku loyi a hundzukeke a tshama a ri ni tingana.—Ringanisa Mintirho 22:16.

Nseketelo Wa Van’wana

Hambi leswi Yehovha a susaka ndzhwalo, a herisa nandzu ni ku susa xivati xa xidyoho, loyi a hundzukaka nkarhi wun’wana a nga karhateka hikwalaho ka ku tivona nandzu. Pawulo u tsarile mayelana ni mudyohi la hundzukaka evandlheni ra le Korinto loyi a rivaleriweke hi Xikwembu, loyi kumbexana a a “hluriw[e] hi gome ku tlula mpimo [“a khomiwe hi gome lerova a hela matimba,” TEV].”—2 Vakorinto 2:7.

Xana munhu loyi a a ta pfuniwa njhani? Pawulo u ya emahlweni: “Ndza mi khongotela leswaku mi tlhela mi n’wi komba rirhandzu.” (2 Vakorinto 2:8) Rito leri Pawulo a ri tirhiseke ra ku “komba” i rito leri vulaka ku “tiyisa.” Ina, lava hundzukeke, lava rivaleriweke hi Yehovha na vona va lava xitiyisekiso kumbe mfungho wa ku amukeriwa hi Vakreste-kulobye.

Swi le rivaleni leswaku leswi swi nga ha teka nkarhi. Loyi a hundzukeke u fanele a rivala xisandzu xa xidyoho xakwe kutani a aka rhekhodo leyinene ya ku lulama. U fanele a lehisa mbilu eka mintlhaveko ya lava va khumbiweke hi swiendlo swakwe leswi hoxeke swa nkarhi lowu nga hundza. Kutani, a nga tiyiseka hi ku rivalela ka Yehovha loku heleleke, ku kotisa Davhida la nga te: “Hi laha v̌uša byi hambaneke ni v̌upeladyambu, [Yehovha] o hambanyisile ŝeŝo e ku dyoha ka hina kule na hina.”—Pisalema 103:12.

[Nhlamuselo ya le hansi]

[Laha Xifaniso Xi Humaka Kona eka tluka 29]

Return of the Prodigal Son by Rembrandt: Scala/Art Resource, N.Y.