Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g94 2/8 matl. 11-13
  • Xana Ndzi Nga Byi Tshikisa Ku Yini Vutomi Bya Mikoka Mimbirhi?

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Xana Ndzi Nga Byi Tshikisa Ku Yini Vutomi Bya Mikoka Mimbirhi?
  • Xalamuka!—1994
  • Swihloko
  • Tinhlokomhaka Tin'wana Leti Yelana Na Yona
  • Ku Hundzuka I Goza Ro Rhanga
  • Ku Byela Vatswari Va Wena
  • Ku Cinca Vanghana Va Wena
  • Vantshwa—Tivoneleni Ku Hanya Vutomi Byimbirhi
    Xihondzo xo Rindza Xi Huwelela Mfumo Wa Yehovha—1988
  • Vutomi Bya Mikoka Mimbirhi—Ha Yini Byi Nga Fanelanga?
    Xalamuka!—1994
  • Vutomi Bya Mikoka Mimbirhi—U Fanele U Byela Mani?
    Xalamuka!—1994
  • Xana Swi Ni Khombo Ku Hanya Vutomi Bya Mikoka Mimbirhi?
    Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2
Vona Swo Tala
Xalamuka!—1994
g94 2/8 matl. 11-13

Vantshwa Va Vutisa . . .

Xana Ndzi Nga Byi Tshikisa Ku Yini Vutomi Bya Mikoka Mimbirhi?

Anna u pfumela a ku: “A ndzi honisa xin’wana ni xin’wana lexi vatswari vanga a va xi vula, a ndzi nga yingisi naswona ndzi sungule ku va xisa. A ndzi va byela leswaku ndzi ya exitolo, kambe entiyisweni a ndzi ya vona jaha leri a ndzi twanana na rona.”

ANN a a hanya vutomi bya mikoka mimbirhi, naswona hi ku hatlisa a a honisa vatswari vakwe kun’we ni ripfalo ra yena leri leteriweke hi Bibele. Phela, Ann a a endla rimbewu exihundleni ni munghana wakwe wa mufana. U tsundzuka leswi: “Ndzi ringete ku humesa Yehovha emiehleketweni ya mina.” Hambi swi ri tano, ku nga ri khale u langutane ni ntiyiso wa mhaka ya leswaku ‘lexi munhu a xi byalaka, u ta xi tshovela.’ (Vagalatiya 6:7) Ann u tikile. U ri: “N’wananga yena ndzi n’wi rhandza hi mbilu ya mina hinkwayo, kambe, leswi swona swa vava hakunene. A ndzi tekiwanga. Ndzo va swanga.”

Xana u tshame u hanya vutomi byimbirhi hi ndlela yo karhi—u fihla leswi u nga swona eka vatswari ni Vakreste-kuloni? Kumbexana u tihungasela ni vanghana va xikolo lava u tivaka leswaku vatswari va wena a va va lavi. Kumbexana u wele eka ku tikhoma loko biha, tanihi ku dzaha, ku tirhisa swakunwa swa xihoxo hi ndlela yo biha, kumbe ku endla rimbewu ehandle ka vukati. Ku nga khathariseki leswaku hi xihi lexi u weleke eka xona, ku fana na Ann, a swi nge teki nkarhi wo leha u nga si vona vuyelo bya kona lebyi chavisaka.b

Hambi swi ri tano, vantshwa vo tala a va wu pfumeleli ntiyiso lowu leswaku wu va tshikisa ndlela ya vona yo pfumala ku yingisa. Va fana ni munhu loyi a tilangutaka exivonini kutani “a hatla a rivala leswi a tivoneke a ri swona.” (Yakobo 1:23, 24) Hi ni ntshembo wa leswaku wena a wu fani na yena. Kumbexana se u sungurile ku tilangutisisa—naswona a wu swi lavi leswi u swi vonaka. U lava ku cinca. U vona xilaveko xa ku cinca. Xivutiso lexi tlakukaka hi leswaku, xana u cinca hi ndlela yihi?

Ku Hundzuka I Goza Ro Rhanga

Xo sungula, u fanele ku endla xiboho lexi tiyeke xa ku cinca. Mintirho 3:19 (NW) yi khutaza yi ku: “Hikwalaho, hundzukani, mi tshika ndlela ya n’wina, leswaku swidyoho swa n’wina swi susiwa, leswaku nguva ya ku phyuphya yi ta ta yi huma eka Yehovha.” Hambi swi ri tano, ku hundzuka a hi xiendlo xa matimba ya mianakanyo ntsena. Ku hundzuka swi vula ku “tisola, ku tivona nandzu kumbe ku karhateka, hikwalaho ka leswi u nga swi endla.” Yakobo mutsari wa Bibele u khongoterile a ku: “Vavisekani, mi ba nkosi, mi rila. Ku hleka ka n’wina a ku hundzuke xirilo, ku tsaka ka n’wina a ku hundzuke gome. Titsongahateni emahlweni ka [Yehovha].” (Yakobo 4:9, 10) Xana u nga tisola njhani hi nchumu lowu a wu wu tsakela ku fikela sweswi? Anakanya ndlela leyi swi hoxeke ha yona. Anakanya hi ndlela leyi swi vaviseke Xikwembu ha yona. Anakanya hi swiphiqo leswi vangiweke hi ndlela ya wena ya le xihundleni ni mavunwa lawa u ma vuleke leswaku u yi fihla. Titsundzuxe leswaku Xikwembu xi venga vukanganyisi! (Pisalema 5:6) Ku anakanyisisa hi tinhla leti swi nga ku pfuna ku papalata ku tikhoma loko biha hi tlhelo ra mianakanyo ni ra moya.

Kambe ku tisola hikwalaho ka leswi u swi endlaka a hi swona ntsena leswi lavekaka. Jaha leri va nge i Robert, leri a ri tirhisa swidzidzirisi exihundleni, ri pfumela leswi: “A ndzi dyiwa hi mbitsi. A ndzi swi tiva leswinene ni swo biha. Kambe, ndzi hambete ndzi hanya vutomi byimbirhi.” Xisweswo ku laveka xiendlo lexi kombaka xivindzi! Eka 2 Tikronika 7:14, Xikwembu xi vule leswaku loko vadyohi va “tiṭongahata, loko v̌a khongela, v̌a lav̌a mombo wa [xona], v̌a fularela tindlela le’to biha ta v̌ona, [xi] ta v̌a yingisa hi le tilweni, [xi] v̌a riv̌alela ŝidyoho ŝa v̌ona.”

‘Ku lava mombo wa Xikwembu’ swi vula ku tshinela eka xona hi xikhongelo, u vula swidyoho swa wena ivi u kombela ku rivaleriwa. Leswi swi nga ha tika ku swi endla, kambe a swi kanakanisi leswaku u ta titwa u ntshunxekile loko u swi endlile sweswo. Mupisalema u te: “Loko nḍi miyerile, marambu ya mina a ma gudlagudla, hi ku konya ka mina hi siku hikwaro. Hikuv̌a nhlekanhi ni v̌usiku v̌oko ra wena ri ṭhama ri nḍi tikela. . . . Nḍi ku tiv̌isile šidyoho ša nga, a nḍi fihlanga ku homboloka ka nga.”—Pisalema 32:3-5.

Ku Byela Vatswari Va Wena

U fanele ku byela un’wana swiphiqo swa wena. Kambe i mani? Muntshwa un’wana loyi va nge i Brian u ri: “Xihoxo

xin’wana lexikulu lexi ndzi xi endleke a ku ri ku byela lava ndzi ehleketaka leswaku i vanghana va mina ematshan’wini yo byela mana wa mina wa Mukreste. Kambe a a ndzi chava ku vulavula na yena loko ndzi ehleketa hi ndlela leyi a a ta swi teka ha yona, kutani ndzi ye eka vanghana va mina, lava va ndzi bakanyeleke ekule swinene ni ntiyiso.” U nga endli xihoxo lexi fanaka. Tiphofule eka vatswari va wena lava chavaka Xikwembu. (Ringanisa Swivuriso 23:26.) Va fanele ku tiva leswi a a wu swi endla. Ndzima 2 ya buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka yi ni swiringanyeto swo hlayanyana malunghana ni ndlela yo tshinelela vatswari va wena emhakeni leyi.c

Entiyisweni, a va nge tsaki loko u va byele mavunwa. Kambe vatswari nkarhi hinkwawo va khumbeka ngopfu hi vana va vona. Mutsari Clayton Barbeau u ri: “A va nge ku tshiki hikwalaho ka leswi u nga endla xihoxo kumbe u ngheneke eka swiphiqo swo karhi. Vana van’wana va kume tinyimba, va ngheniwa hi vuvabyi lebyi tluletiwaka hi rimbewu, va va ni xiphiqo xa xihoko kumbe xa swidzidzirisi kumbexana va va ni swiphiqo swin’wana, naswona va anakanya leswaku vatswari va vona va ta va holovela, va va cukumeta, va va siya ni yindlu ivi va rhurhela etikweni rin’wana. Kambe loko va byela vatswari va vona, va kume leswaku va angarhiwa kumbe va vukarhiwa, va byeriwa leswi, ‘Ina, u le khombyeni hakunene, kambe hi ta vona leswi hi nga swi endlaka leswaku hi ku humesa.’” Ina, loko ku hlamala ni ku hlundzuka ko sungula ku hunguteka, vatswari vo tala va ringeta ku va ni nseketelo. Nseketelo lowu wu va wukulu swinene loko vatswari va chava Xikwembu! Xikongomelo xa vona lexikulu ku fanele ku va ku lulamisa timhaka, ematshan’wini ya ku ku khomisa tingana kumbe ku ku vavisa. (Ringanisa Esaya 1:18.) Emhakeni leyi va nga ha tlhela va hlela leswaku u vulavurisana ni vakulu va vandlha.—Yakobo 5:14, 15.

I ntiyiso, u nga ha boheka ku tiyiselela ku xupuriwa kun’wana loku faneleke ni minsivelo yin’wana leyi tiyeke ya vatswari va wena. Kambe leswi swi nga ku pfuna leswaku u papalata ku tlhelela etindleleni ta wena ta khale. Ematshan’wini ya sweswo, ku burisana ni vatswari va wena ni ku vona nkhathalelo wa vona wa rirhandzu swi nga ha hundzula ndlela leyi u va langutaka ha yona. Ku ta fikela sweswi, kumbexana a wu yi lavi milawu ni swipimelo swa vona. Nhwanyana un’wana loyi va nge i Paulette wa pfumela: “Swa nonon’hwa ku amukela ndzayo ni swikongomiso leswi hi nyikiwaka swona hi vatswari va hina. Kambe ndzi swi xiyile leswaku swi pfuna hina ni ku hi hlayisa hi tsakile.”

Ku Cinca Vanghana Va Wena

Hakanyingi muntshwa a nga hanyi vutomi byimbirhi a ri swakwe. Swi nga ha endleka u ve ni ntlawa wa tintangha leti a ti ku susumetela leswaku u nga yingisi! Leswaku u papalata ku tlhelela eka vutomi bya xihundla, u fanele ku cinca vanghana va wena. Mupisalema u te: “A nḍi ṭhami ni v̌anhu la’v̌a ranḍaka v̌unwa; kambe a nḍi enḍelani ni la’v̌a fihlaka le’ŝi nge mbilwini.” (Pisalema 26:4) Ku hambana ni vanghana va khale a swi olovi. Swi nga ha lava leswaku u khongela ku fana ni mupisalema: “Nḍi ponise ka munhu wa ku hemba ni wa ku homboloka.” (Pisalema 43:1) Fambisana ni xikhongelo lexi hi ku byela vanghana va wena va khale leswaku u hundzukile naswona u tiyimisele ku endla leswi lulameke. Ematshan’wini ya ku va mudyondzisiwa wa le xihundleni wa Yesu, byela van’wana hi ripfumelo ra wena. (Ringanisa Yohane 19:38.) Hakanyingi, vanghana vo biha va hatlisa va tilavela vanghana van’wana.

Kutani, u fanele ku siva vanghana vo biha hi vanghana lavanene. Xana vantshwa lava chavaka Xikwembu a va nyawuli? Kutani ehleketa hi muprofeta Yeremiya loyi a nga te: “A nḍi ṭhamangi šikari ka v̌asanḍi leŝaku nḍi ya tiṭakela kona; kambe a nḍi ṭhama nḍi ri ŝanga hikwalaho ka v̌oko ra wena.” (Yeremiya 15:17) Swi nga antswa leswaku u tshama wexe ku ri ni ku tshama ni vantshwa lava va nga ta ku tsanisa emoyeni. Kambe, hi ntolovelo, vanghana va xiviri u nga va kuma loko u endla matshalatshala. Hi xikombiso, Tammy u sungule ku endla xinghana ni muzala wakwe loyi a a ri muvuri wa evhangeli wa nkarhi hinkwawo. Tammy u tsundzuka leswi: “A hi tolovelane ngopfu. Hi masiku lawa a ndzi nga yi exikolweni, a a ndzi famba na yena entirhweni wo chumayela. Leswi swi ndzi pfune ku cinca evuton’wini bya mina.”

Kambe, hi ku vula ka muntshwa un’wana wa le Jarimani: “Nsirhelelo lowukulu ngopfu, i ku va ni ripfalo lerinene, leri endlaka leswaku u va ni vuxaka lebyikulu na Yehovha Xikwembu.” Nhwanyana un’wana loyi a sunguleke ku hanya vutomi byimbirhi wa pfumela: “A ndzi kalanga ndzi va ni vuxaka lebyikulu na Yehovha, Tata wa mina.” Hi xikhongelo ni dyondzo ya munhu hi yexe, u sungule ku cinca. Hi ku tinyungubyisa u vula leswi: “Sweswi ndzi ni vuxaka na Yehovha lebyi ku nga riki na munhu loyi a nga ndzi tekelaka byona.” Na wena u nga va ni vuxaka byo tano lebyikulu ni Xikwembu. Xi ta ku kongomisa, xi ku seketela, hambi loko u swi vona swi nonon’hwa ku hundzula tindlela ta wena ta khale. Pisalema 37:24 yi vula leswi landzelaka malunghana ni nandza la tshembakaka wa Xikwembu: “Loko a khunguv̌anyeka, a nga ka a nga weri makumo, hikuv̌a Yehova o ṅwi khomile hi v̌oko.” Ina, hi ku pfuniwa hi Yehovha, u nga tshika ku hanya vutomi bya mikoka mimbiri.

[Tinhlamuselo ta le hansi]

a Mavito man’wana ma cinciwile.

b Vona swihloko leswi nge “Vantshwa Va Vutisa . . .” leswi nga eka nkandziyiso wa January 8, 1994.

c Yi humesiwe hi Watchtower Bible and Tract Society of New York, Inc.

[Marito lama tshahiweke exihlokweni lama nga eka tluka 12]

“Ndzi ringete ku humesa Yehovha emiehleketweni ya mina”

[Marito lama tshahiweke exihlokweni lama nga eka tluka 12]

U fanele ku endla xiboho lexi tiyeke xa ku hundzuka

[Xifaniso lexi nga eka tluka 13]

Hlamusela vanghana va wena va khale leswaku u hundzukile naswona a wu nge he ngheni evudyohweni bya vona

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela