Switirho Swa Vugandzeri Bya Sathana Swidzidzirisi Ni Vuyimbeleri Bya Pongo Lerikulu

CARL A. RASCHKE, mukongomisi wa Yunivhesiti ya Denver Institute of Humanities, u tsale a ku: “A swi hlamarisi leswi swidzidzirisi, [vuyimbeleri] bya pongo lerikulu, lunya ni madzolonga ya tihanyi, hinkwaswo swi hundzukeke mimfungho ya xiyimo xa vanhu lexi hohlokaka, loko hi ri karhi hi tshinelela makumenharhu ya malembe ya Nguva ya Sathana.” U tlhele a ku: “U nga ha vula leswaku vuyimbeleri bya pongo lerikulu bya rhok evugandzerini bya Sathana, byi fana ni vuyimbeleri bya evhangeli eka Vakreste. A hi vangani vanhu lava hundzukeke Vakreste ntsena hi ku yingisela vuyimbeleri bya evhangeli eka xiya-ni-moya. Kambe vuyimbeleri bya pongo lerikulu byi ni nkucetelo lowukulu. Byi nyanyisa mintirho yo biha leyi vana ana se va nga eka yona.”

Lexi i xihehlo xa matimba ehenhleni ka leswi vantshwa vo tala va namuntlha va swi langutaka swi ri swirivatisi leswi tolovelekeke swo susa mivilelo ya vutomi—ku nga vuyimbeleri bya pongo lerikulu ni swidzidzirisi. Xana swihehlo leswi swa faneleka? Xana swi nga endleka leswaku swidzidzirisi ni vuyimbeleri bya pongo lerikulu i mimfungho ya vugandzeri bya Sathana? Xiya leswi vuriweke hi lava va hlaseriweke hi ku kongoma ni vagandzeri va vusathana ni lava va va kambeleke.

“Rungula leri nyenyetsaka ra vuyimbeleri bya pongo lerikulu, hambi leswi swi nga ha endlekaka swi nga hlamarisi, i ra ‘vukhongeri’—hi leswi ri twarisaka hi munhu wa matimba lamakulu la fumaka vuako hinkwabyo. Kambe, munhu loyi a hi xona Xikwembu,” ku tsale Raschke, ebukwini yakwe leyi nge Painted Black. “Ma . . . huma eka Sathana hi byakwe.” U tlhandlekele a ku: “Matimba ni madzolonga ya vugandzeri bya vusathana i nchumu lowu vantshwa lava nga hava ntshembo, lava nga ni mapfalo lama nga tirhiki, va nga kokelekaka eka wona hi ku olova. . . . Vantshwa lava karhatekeke ni lava xanisiweke, hikwalaho ka leswi va swi tokoteke hi ku xaniseka loko va ha ri vatsongo, va tshemba leswaku Matimba Lamakulu ma fanele ma ri vubihi. Vuyimbeleri bya pongo lerikulu byi seketela ‘ntshembo’ lowu ivi byi wu ngenisa evuyimbelerini.”

Hi ku ya hi Dok. Paul King wa Yunivhesiti ya Tennessee, loyi a nyikeke vumbhoni emahlweni ka Huvo-nkulu ya le United States malunghana ni vuyimbeleri bya pongo lerikulu, u vula leswaku vuyimbeleri lebyi byi rhandziwaka hi vantshwa vo tala lava xanisekaka hi lebyi “vulavulaka hi madzolonga, rivengo, ku sihalala, rimbewu leri hundzeletiweke, ku pfinyiwa ka vavasati ni ku dzunisa Sathana. Loko n’wana wa malembe ya kondlo-a-ndzi-dyi a tirhisa swidzidzirisi, swa olova eka yena ku hlawula swilo leswi.” King u te, vuyimbeleri bya pongo lerikulu byi dzunisa ni ku tlakusa vubihi. Eka vuyimbeleri bya pongo lerikulu, “swiendlo swo biha swi dzunisiwa ngopfu hi nkarhi wa khonsati,” ku vule yena.

Xiya mimbuyelo yo biha ya rungula leri tumbeleke ra vuyimbeleri bya pongo lerikulu etimhakeni leti landzelaka.

N’wexemu eNew Jersey, U.S.A., vafana vambirhi va malembe ya 15 hi vukhale va dlaye mbyana ya le ndyangwini ya Labrador hi tihanyi leyi vitaniwaka Princess. Va te: “A ku ri gandzelo ra Sathana.” Va hayeke mbyana leyi hi nketani, va yi raha yi kondza yi ku salani, va tsema ririmi ra yona ivi va ya ri tirhisa emihivahivanini ya vugandzeri bya vusathana. Va vambe ntsumbu wa mbyana leyi va yi dlayeke enhongeni yo leha ivi va wu hayeka ejarateni ra muakelani. Ku kumiwe mimfungho ya vugandzeri bya vusathana enhlokweni ya mbyana leyi, naswona a ku tsariwe pentagram (nyeleti leyi nga ni ntlhanu wa tinhla yi ri exirhendzevutaneni—ku nga mfungho wa vugandzeri bya Sathana) ehansi ka ntsumbu wa mbyana leyi. Hi vusiku lebyi va yi dlayeke ha byona, a va yingise vuyimbeleri bya Deicide (leswi vulaka ku dlaya Xikwembu), ku nga vuyimbeleri bya rhok, lebyi murhangeri wa byona a tidzunisa hi ku xanisa ni ku dlaya swiharhi.

Le California, vana vambirhi va kondlo-a-ndzi-dyi lava a va ri swigangu, lava hi ku ya hi vanghana va vona, ku vuriwaka leswaku a va katseka evugandzerini bya Sathana, va dlaye manana wa nhwanyana loyi, hi ku n’wi tlhavetela ni ku n’wi fumbutela hi bobojana. Endhawini yoleyo, muntshwa un’wana u khongele eka Sathana ivi a duvula tatana wakwe a n’wi dlaya. Maphorisa lawa a ma kambisisa nandzu lowu ma tiyiseka leswaku i vuyimbeleri bya pongo lerikulu lebyi vangeleke leswi. “Kahle-kahle, vuyimbeleri lebyi byi ku dyondzisa leswaku a wu fanelanga u yingisa vatswari va wena, ni leswaku u fanele u hanya hi ndlela leyi u rhandzaka ha yona,” ku vule phorisa rin’wana.

Le Nghilandi, vanhu lava pfinyiweke hi ntlawa wa vapfinyi va byele maphorisa leswaku un’wana wa vapfinyi lava a tifunghe hi mfungho wa bendhe ya vuyimbeleri bya pongo lerikulu lebyi marito ya byona a ma ri ni rungula ra ku pfinya ni madzolonga.

Le Arkansas, eU.S.A., mufana la tshamaka endhawini ya le makaya u ringete ku dlaya vatswari vakwe hi ku va fumbutela hi xigombo ivi a va tsemelela hi mukwana lowukulu. Maphorisa ma kume khasete endzeni ka xitlanga-tikhasete xakwe leyi a yi lulamiseriwe ku tlanga risimu ra pongo lerikulu leri nge, “Altar of Sacrifice,” leri marito ya rona ma huwelelaka ma ku: “Muprista lonkulu u rindzile, u khome savula, u halata ngati ya wanhwanyana la nga riki na nandzu. Ku dlaya ka Sathana, mihivahivana ya rifu, hlamula xileriso xin’wana ni xin’wana xakwe. Nghena exivandleni xa Sathana . . . Dyondza marito yo kwetsima ya ku dzunisa, ‘Dzunisa Sathana.’”

Marito man’wana ya tinsimu leti yimbeleriwaka hi swirho swa bendhe ya vuyimbeleri bya pongo lerikulu leswi tlatlarhukaka—leswi hakanyingi vaseketeri va swona va swi entiselaka etikhonsatini onge va hlanya, kumbe va ti yingisela eka khasete nkarhi wo leha—xana marungula yo tano ma ni nkucetelo wihi eka vantshwa lava kokekaka hi ku olova? Hi xikombiso, xiya marito lawa: “Sathana i hosi ya hina eka swo biha naswona wa hi kongomisa eka goza rin’wana ni rin’wana ra hina ro sungula,” naswona “Halata ngati ya wena, yi khulukela eka mina. Endla ku rhandza ka mina ivi u tihanyela hi ndlela leyi u yi rhandzaka . . . U yi halatile ngati. Ndzi ni moya-xiviri wa wena.”

Carl Raschke u tsale a ku: “Loko hi tiyiseka leswaku swifaniso swa vanhu lava nga ambalangiki nchumu swi nga endla leswaku n’wana a karhateka hi rimbewu, ha yini hi nga xiyi leswaku marito lama huwelelaka leswaku dlaya, tsema swirho, vavisa swinene, xanisa, herisa ma nga susumeta munhu la nga siki kulaka emianakanyweni leswaku a endla swiendlo sweswo hi xiviri?”

Valavisisi va le tindhawini hinkwato va ringanyeta leswaku ku tirhisiwa ko biha ka swidzidzirisi ni vugandzeri bya Sathana i buruku na bandhi. Khale ka xandla xa fokisi David Toma, u vula leswaku “a nga si tshama a hlangana ni mugandzeri wa Sathana la nga tirhisiki swidzidzirisi.” Magazini wa ’Teen wu vike leswaku ku tirhisa swidzidzirisi swi pfilunganya timhaka ta vantshwa “lava hundzukelaka evugandzerini bya diyavulosi, swi endla leswaku swi va tikela ku vona leswi nga swa xiviri ni leswi vonakaka onge i swa xiviri, loko munhu swi languta a dungiwe hi swidzidzirisi ni xihoko.”

Raschke u te: “Vuyimbeleri bya pongo lerikulu byi fambisana ni ku tirhisa swidzidzirisi, hi laha mubejo wu nga ha kona eka vanhu lava swi endleke mukhuva ku gembula. Vana va malembe ya kondlo-a-ndzi-dyi lava hanyaka hi swidzidzirisi va tekelela mahanyelo ya ku tikurisa, tihanyi, ku yiva ni ku hundzeleta hi tlhelo ra rimbewu—hinkwaswo swi seketeriwa hi ku bokoloka ni ku vomba ka mintlawa ya vuyimbeleri bya pongo lerikulu.”

Handle ko kanakana, muntshwa u ngheniwa hi ku olova hi nkucetelo wa Sathana loko mianakanyo leyi hlutekeke yi susiwa ebyongweni ivi ku nghena miehleketo ya vubihi ni ya madzolonga.

[Marito lama tshahiweke exihlokweni lama nga eka tluka 8]

Munhu a nga ngheniwa hi ku olova hi nkucetelo wa Sathana loko mianakanyo leyi hlutekeke yi susiwa ebyongweni ivi ku nghena miehleketo ya vubihi ni ya madzolonga

[Xifaniso lexi nga eka tluka 7]

I yini leswi u tataka mianakanyo ya wena ha swona?