Ku Papalata Rimbewu—Ha Yini?

“VUGANDZERI lebyi khutazaka vutengi bya rimbewu”—leyi i ndlela leyi Randall Balmer, profesa wa vukhongeri la tirhaka ni van’wana eBarnard College/Columbia University, a wu vitanaka ha yona mukhuva lowu wu tikombaka wu andza eka vantshwa wa ku papalata rimbewu ku fikela loko va kurile.

A swi hlamarisi, swikhutazo swo tala swo papalata rimbewu swi huma eka tinhlengeletano ta vukhongeri. Dok. Balmer u te: “Kambe nsusumeto wa ku papalata rimbewu i wa misava, ku nga ri wa vukhongeri. Nsusumeto lowukulu wa vutengi i ku chava—ku nga ri ku xupuriwa hi Xikwembu, kambe ku chava mavabyi lama dlayaka.” Xisweswo, u komba ku hambana exikarhi ka “vugandzeri bya Wanhwana Mariya,” lebyi eka byona ku ri papalata ku nga mhaka ya vukhongeri, ni “vugandzeri bya vutengi bya rimbewu,” bya manguva lawa lebyi eka byona ku papalata rimbewu ka byona ku nga mhaka ngopfu ya rihanyo.

Dok. Balmer u ya emahlweni a ku: “I nhlamuselo leyi khomisaka tingana mayelana ni xiyimo xa vukhongeri enkarhini lowu wa va-1990 ya leswaku ku chava vuvabyi swi susumetela ku tikhoma lokunene. Varhangeri va vukhongeri, hikwalaho ka leswi va nga laviki ku hlundzukisa vanhu, va ringanyete ndlela ya ku tikhoma leyi nga riki na nsusumeto, kumbe leyi nga ku khutaziki hilaha ku heleleke. Kutani hi ndlela yoleyo vutihlamuleri byi nyikiwa vativi va sayense ni vatirheli va ta rihanyo ra vanhu leswaku va tsundzuxa vana va kondlo-a-ndzi-dyi hi ndlela yo hanya vutomi bya vona bya rimbewu.”

Hambiswiritano, xiyimo a xi tano eka Vakreste va ntiyiso. Anakanya hi Chad, n’wana wa kondlo-a-ndzi-dyi loyi a kurisiweke tanihi un’wana wa Timbhoni ta Yehovha. Chad u hlangane ni nhwanyana un’wana loyi a sunguleke bulo na yena. Kambe hi ku hatlisa u vone swikongomelo swakwe leswaku a ku nga ri mhaka ya ku bula ntsena. Chad u ri: “Hiloko ndzi ku phaphu. A ndzi nga ta khomisa Yehovha tingana. A ndzi ri ni mianakanyo ya ku tsakisa Yehovha minkarhi hinkwayo, ndzi n’wi byele leswaku ndzi fanele ku famba.”

Kukota Chad vantshwa vo tala exikarhi ka Timbhoni ta Yehovha va tikhoma hi ndlela leyinene, ku nga ri hikwalaho ka rihanyo lerinene kambe ngopfu-ngopfu leswaku va tsakisa Mutumbuluxi wa vona, Yehovha Xikwembu. A hi ku chava vuvabyi leswi susumetelaka ku tikhoma ka vona lokunene. Ku ri na sweswo, vantshwa vo tano va landzela xitsundzuxo xa Eklesiasta 12:1 lexi nge: “Anakanya Muv̌umbi wa wena hi masiku ya v̌untŝha bya wena.”