Xana Rihanyo Leri Hetisekeke Ko Va Norho Ntsena?

XANA u tshame u khomiwa hi vuvabyi lebyikulu kumbe ku endliwa vuhandzuri lebyikulu? Loko swi ri tano, kumbexana sweswi u twisisa vutomi ku antswa. Kambe ku nga khathariseki xiyimo xa wena xa rihanyo, xana wa tshemba leswaku swa koteka ku kuma rihanyo leri hetisekeke? Leswi swi nga ha tikomba ku ri ku hundzeleta loko hi languta vukona bya mavabyi lama hetaka matimba yo tanihi khensa kumbe vuvabyi bya mbilu. Entiyisweni, vunyingi bya hina hi khomiwa hi vuvabyi nkarhi na nkarhi. Hambiswiritano rihanyo leri hetisekeke a ko va norho ntsena.

Munhu u vumbiwe a ri ni rihanyo lerinene, a nga endleriwanga ku vona maxangu hikwalaho ka mavabyi ni rifu. Hikwalaho, leswaku a herisa vuvabyi ni rifu, Yehovha u simeke masungulo ya rihanyo leri hetisekeke ni vutomi lebyi nga heriki hi ku tirhisa gandzelo ra nkutsulo ra Yesu Kreste. “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Lava nga ta hanya hilaha ku nga heriki emisaveni ya Xikwembu leyintshwa leyi tshembisiweke a va nge he vabyi kumbe ku dyuhala. Loko swi ri tano, ku ta va ku humelele yini hi mavabyi?

Ku Ntshunxiwa eVuvabyini

Ndlela leyi Yesu Kreste a hanyiseke ha yona vuvabyi i xikombiso xa leswi nga ta endlaka. Ku vuriwe leswi malunghana ni ku hanyisa ko tano: “Lava feke mahlo va vona, ni lava khutaka va famba, va nhlokonho va basisiwa naswona lava feke tindleve va twa, ni lava feke va pfuxiwa, ni swisiwana swi byeriwa mahungu lamanene.” (Matewu 11:3-5) Ina, swilema hinkwaswo leswi yeke eka Yesu a swi “hanyisiwa hi ku helela.” (Matewu 14:36) Hikwalaho, ‘ntshungu wu hlamarile loko wu vona timbheveve ti vulavula ni lava khutaka va famba ni lava feke mahlo va vona, kutani va dzunisa Xikwembu xa Israyele.’— Matewu 15:31.

Entiyisweni, hambi leswi namuntlha ku nga riki ni un’we la nga hanyisaka vanhu hi ndlela yoleyo, ha tiyiseka leswaku ehansi ka vulawuri bya Xikwembu, vanhu va ta va lava hetisekeke, va ta hanyisiwa emavabyini hinkwawo ya mianakanyo ni ya le mirini. Xitshembiso xa Xikwembu xi tsariwe ebukwini ya Nhlavutelo 21:3, 4: “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Kutani Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”

Anakanya hi misava leyi nga hava tindhawu to endla mirhi kumbe swibedlhele, vuhandzuri kumbe vutshunguri! Tlhandla-kambirhi, eParadeyisini leyi kondleteriweke, ntshikilelo ni mavabyi ya mianakanyo swi ta va swilo swa nkarhi lowu hundzeke. Vutomi byi ta tsakisa hakunene naswona ntsako wu ta tshama wu ri kona. Entiyisweni, matimba ya Xikwembu lama nga heriki ma ta pfuxeta endlelo ra miri ra ku tikondletela naswona mimpfuno ya nkuntsulo yi ta susa nsusumeto wa xidyoho lowu nga ni khombo. “A ku nga v̌i na munhu . . . l’a nga ta ku nḍa v̌abya.”—Esaya 33:24.

Mayana ntshembo wa risima swonghasi—wo kuma rihanyo ra miri ni ra moya leri hetisekeke ehansi ka Mfumo wa Xikwembu! Loko u ri karhi u hanya hi ku ringanisela swin’we ni ku hlayisa rihanyo ra wena sweswi, tshama u ri karhi u langutela mikateko ya misava leyintshwa ya Xikwembu. Onge Yehovha a nga ‘ku xurhisa hi leswo nandziha . . . vuntshwa bya wena byi ko byi pfuxetiwa kukotisa bya gama!’—Pisalema 103:5.