Vana Ni Langutelo Ro Ringanisela Eka Vuyimbeleri

NAMUNTLHA bindzu ra vuyimbeleri ri fuwe ngopfu. Swiyimbeleri leswi dumeke ni vaseketeri va swona va kuma mali yo tala namuntlha. Kambe, i ntiyiso leswaku swiyimbeleri swin’wana leswi humelelaka kahle a swi tsakanga, swi hatla swi fa ni ku tidlaya. Naswona ku ni vumbhoni byo tala lebyi kombisaka leswaku vuyimbeleri byin’wana bya onha hi tlhelo ra mahanyelo, ra mintlhaveko ni ra moya, naswona byi nga endla leswaku munhu a rhandza madzolonga a tlhela a va ni tihanyi.

Hambiswiritano, i swinene leswaku hi ringanisela eka vuyimbeleri. Hambileswi ku nga ni swo tala leswi hoxeke ni leswi biheke eka vuyimbeleri, vuyimbeleri byin’wana byi nga antswisa vutomi bya munhu ni ku n’wi tisela ntsako ni ku eneriseka. Byi nga ha hi pfuna hi tlhelo ra mintlhaveko ni ra moya. Ehleketa hi swikombiso swi nga ri swingani.

Tipisalema ta 150 ta Bibele ti tsariwe hi vukheta swinene—swiphato, tinsimu to kwetsima ni swikhongelo. Namuntlha vanhu va ti hlaya va tsakile hi madzana ya tindzimi. Hambiswiritano, Vaheveru va khale a va nga ti hlayi tipisalema leti; kambe a va ti yimbelela. Hakanyingi a va ti yimbelela va ri karhi va chaya swichayachayana leswi fambisanaka kahle na tona—ku nga ndlela leyi nga ni matimba swinene ya ku hlanganisa vutlhari bya Xikwembu xa vona, Yehovha ni mintlhaveko leyi vayimbeleri lava leteriweke a va yi hundzisela eka vayingiseri, hilaha swi kandziyisiweke ha kona hi marito ya tona. Vuyimbeleri bya Vaheveru a byi byi tlula ngopfu vuyimbeleri bya tinxaka leti va rhendzeleke ta nkarhi wolowo, a ku nga ri vuyimbeleri bya xikhale kumbe lebyi hundzeriweke hi nkarhi.

Hi ku famba ka nkarhi, Vakreste va lembe-xidzana ro sungula a va yimbelela tipisalema ni tinsimu tin’wana to kwetsima leswaku va dzunisa Xikwembu ni ku chavelela lava tshikileriweke. Kutani, byi phyuphyisa vutomi. Naswona hi ku yimbelela tinsimu leti sekeriweke eBibeleni, va dzikisa vutivi bya Xikwembu etimbilwini ta vona, lebyi a va byi lava leswaku byi kongomisa vutomi bya vona.—Matewu 26:30; Mintirho 16:25.

Magriki ya khale a ma kholwa leswaku vuyimbeleri byi pfuna munhu leswaku a va ni vumunhu naswona byi hetisisa wanuna kumbe wansati. Emisaveni leyi ya lembe-xidzana ra vu-20, leyi khutazaka ngopfu ku dyondza sayense, ikhonomi ni ku ehleketa kahle, hakanyingi ku kula ka munhu hi tlhelo ra mintlhaveko ka honisiwa.

Ringanisela

Swa tsakisa ku yingisela vuyimbeleri lebyinene naswona swa vuyerisa. Kambe, munhu a nga tsaka ngopfu loko a chaya xichayachayana xa vuyimbeleri kumbe a yimbelela swin’we ni ntlawa wa vanghana. Ku tiva vuyimbeleri ku nga tisa ntsako lowukulu.

Ina, ku fana ni swilo swin’wana leswinene evuton’wini, swi lava ku ringanisela, ku endla swiboho leswinene ni ku hlawula emhakeni leyi ya vuhungasi. Leswi a swi katsi ntsena muxaka wa vuyimbeleri lebyi hi byi yingiselaka, kambe swi katsa ni nkarhi lowu hi wu hetaka hi ri eku byi yingiseleni kumbe hi ri karhi hi byi chaya.

Loko vuyimbeleri byo karhi byi sungula ku va ni nkucetelo wo biha emintlhavekweni ya wena, eswiendlweni swa wena kumbe evuxakeni bya wena ni vanhu van’wana, hlawula byin’wana. Sirhelela tindleve ta wena leswaku u ta swi kota ku sirhelela mintlhaveko, mbilu ni mianakanyo ya wena!

Mhaka leyi i ya nkoka ngopfu-ngopfu eka marito ya byona. Ma nga ha sungula ku ku cinca kutani u hanya hi ndlela leyi rhandziwaka hi lava va nga riki na langutelo leri fanaka ni ra wena hi vutomi ni ku tikhoma lokunene, lava va nga ha khutazaka mukhuva lowu nga riki na vukwembu, wo biha. Minkarhi yin’wana hambi ku ri xihloko xa risimu xi nga pfuxa mintlhaveko leyi nga riki yinene.

Rito ra Xikwembu ku nga Bibele, ri khongotela lava va nga ta xi tsakisa leswaku va “nyikela mimiri ya [vona] yi va xitlhavelo lexi hanyaka, xo kwetsima ni lexi amukelekaka eka Xikwembu, ku nga ntirho wo kwetsima, hi matimba ya [vona] ya ku anakanya.” (Varhoma 12:1) Swi le rivaleni leswaku mintlhaveko ya hina i xiphemu xa “xitlhavelo lexi hanyaka.” Kutani, loko ho tshuka hi lemuka leswaku mintlhaveko ya hina, hikwalaho ko kuceteriwa hi vuyimbeleri yi sungula ku onha swiboho leswinene leswi hi swi endlaka ni ku lawula ndlela leyi hi anakanyaka ha yona naswona ya hi hambukisa eka leswinene, xisweswo hi wona nkarhi wo cinca vuyimbeleri lebyi hi byi yingiselaka. Tsundzuka: Matimba ya vuyimbeleri ma nga khumba timbilu ta hina ni miehleketo ya hina—leswaku hi endla leswinene kumbe swo biha!

[Bokisi/Xifaniso lexi nga eka tluka 10]

Ku Antswisa Vuswikoti Byo Dyondza

“Vulavisisi byi kombisa leswaku ku yingisela vuyimbeleri lebyi pfumelelanaka swi nga antswisa vuswikoti bya n’wana bya ku dyondza. Kambe emakaya yo tala, ku hava vuyimbeleri lebyi va byi yingiselaka.”—Audio, March 1999.