Loko Vuvabyi Lebyi Nga Tshungulekiki Hi Ku Olova Byi Hlasela Ndyangu

NTSAKO wa ndyangu wa ka Du Toit wu tlulela ni le ka van’wana. Swa tsakisa ku vona ndlela leyi va rhandzanaka ha yona. Loko u hlangana na vona, a wu nge ehleketi leswaku va tiyiselela ku nonon’hweriwa lokukulu swonghasi.

Xo sungula, loko Michelle, mativula ya vona, a ri ni malembe mambirhi, Braam na Ann va lemuke leswaku u ni xifo xa xitekela lexi nga tshungulekiki hi ku olova, lexi tsanisaka misiha.

Ann, mana wa yena wa hlamusela: “Hi xitshuketa, u fanele u dyondza ku langutana ni mavabyi lama lamataka munhu, lama nga tshungulekiki hi ku olova. Wa swi lemuka leswaku vutomi bya ndyangu byi ta cinca.”

Kambe khombo rin’wana ri hlasele ndyangu lowu endzhaku ka ku velekiwa ka n’wana un’wana wa mufana ni wa nhwanyana. Siku rin’wana loko vana lavanharhu va ri karhi va tlanga ehandle, lava vambirhi va vanhwanyana va nghene endlwini hi rivilo. A va ri karhi va huwelela va ku: “Manana! Manana! Ho milenge mimbirhi. Neil a swi n’wi fambeli kahle!”

Loko a tsutsumela ehandle, Ann u vone nhloko ya Neil la nga ni malembe manharhu yi voyamele etlhelo rin’we. A a nga swi koti ku yi yimisa yi ololoka.

Ann u ri: “Nsusumeto wa ngati yakwe a wu tsane hi ndlela yo hlamarisa swinene, naswona wu cince hi ku hatlisa lokukulu. Ndzi tshoveke mbilu loko ndzi vona leswaku xifanyetana lexi hanyeke bya cheleni xi fanele xi langutana ni ntlhontlho wa ku hanya ni xifo xa ku tsana ka misiha lexi khomeke sesi wa xona.”

Braam, tata wa kona u ri: “Ntsako wa ku va ni ndyangu lowu tsakeke, hi ku hatlisa wu funengetiwe hi yin’wana ya mintlhontlho leyikulu leyi hi nga si tshamaka hi langutana na yona.”

Eku heteleleni, Michelle u file, hikwalaho ka swiphiqo leswi vangiweke hi vuvabyi byakwe, ku nga khathariseki vutshunguri bya xiyimo xa le henhla lebyi a byi kumeke exibedlhele. A a ri ni malembe ya 14 loko a fa. Neil u ya emahlweni a lwa ni mimbuyelo ya rihanyo leri tsaneke.

Leswi swi tlakusa xivutiso lexi nge, Xana mindyangu leyi fanaka ni wa ka Du Toit yi langutana njhani ni mintlhontlho ya ku va ni xirho xa ndyangu lexi nga ni vuvabyi lebyi nga tshungulekiki hi ku olova? Leswaku hi hlamula xivutiso xexo, a hi kambisiseni tindlela tin’wana leti mindyangu leyi nga ni munhu la khomiweke hi vuvabyi lebyi nga tshungulekiki hi ku olova yi khumbekaka ha yona.