Langutelo Ra Bibile

Xana Swi Hoxile Ku Rila Nkosi?

“KU TLULA KWALAHO, VAMAKWERHU, A HI LAVI LESWAKU MI PFUMALA VUTIVI MALUNGHANA NI LAVA ETLELEKE EKU FENI; LESWAKU MI NGA VI NA MBITSI HILAHA HINKWAVO LAVA NGA RIKI NA NTSHEMBO VA ENDLAKA HAKONA.”—1 VATESALONIKA 4:13.

BIBELE yi nyikela ntshembo eka lava feke. Vafi lava pfuxiweke hi Yesu swin’we ni tidyondzo takwe, swi kombetela enkarhini lowu vafi va nga ta vuyiseriwa evuton’wini ha wona. (Matewu 22:23-33; Marka 5:35, 36, 41, 42; Luka 7:12-16) Xana ntshembo lowu wu fanele wu hi khumba njhani? Marito ya muapostola Pawulo lama tshahiweke laha henhla ma kombisa leswaku ntshembo lowu wu hi chavelela loko hi feriwa hi munhu loyi hi n’wi rhandzaka.

Loko u feriwe hi munhu loyi u n’wi rhandzaka, a swi kanakanisi leswaku u tlhavekile hikwalaho ka khombo leri. Theresa, loyi nuna wakwe la nga ni malembe ya 42 a feke endzhakunyana ka ku endliwa vuhandzuri bya mbilu, u ri: “A swi hlamarisa! Eku sunguleni a ndzi titwa ndzi chava. Kutani ku landzela gome lerikulu leri nga ya ri nyanya hi ku famba ka nkarhi. Ndzi rile ngopfu.” Xana loko u titwa hi ndlela yoleyo swi kombisa leswaku munhu a nga tshembi leswaku Yehovha u ta va pfuxa lava feke? Xana marito ya Pawulo ma vula leswaku swi hoxile ku rila?

Swikombiso Swa Lava Rileke Nkosi eBibeleni

Tinhlamulo ta swivutiso leswi hi ti kuma hi ku kambisisa swikombiso swa lava rileke nkosi eBibeleni. Etimhakeni to tala, rifu ra xirho xa ndyangu a ri landzeriwa hi nkarhi wa ku rila nkosi. (Genesa 27:41; 50:7-10; Pisalema 35:14) Hakanyingi mintlhaveko leyi a yi fambisana ni ku rila nkosi a yi va yikulu swinene.

Xiya leswi vavanuna van’wana lava a va ri ni ripfumelo va rileke ha yona loko va feriwe hi munhu loyi va n’wi rhandzaka. Hi xikombiso, Abrahama a a ri ni ripfumelo leri tiyeke ra leswaku Xikwembu xi ta pfuxa lava feke. (Vaheveru 11:19) Hambileswi a a ri ni ripfumelo leri, loko nsati wakwe a fa, u ‘fike a ta ba nkosi wa Sara ni ku n’wi rila.’ (Genesa 23:1, 2) Loko vana va Yakobe va hembile naswona va n’wi byele leswaku Yosefa n’wana wakwe loyi a n’wi rhandzaka u file, Yakobe u “handzule minkhancu yakwe hi le xikarhi kutani . . . a hambeta a n’wi rila.” (Genesa 37:34, 35) Phela, Yakobe u karhateke malembe yo tala a ri karhi a ehleketa hi rifu ra n’wana wakwe! (Genesa 42:36-38) Hosi Davhida na yena u rile nkosi erivaleni a tlhela a va ni gome swinene hikwalaho ka ku fa ka vana vakwe vambirhi, ku nga Aminoni na Absalomu. Hambileswi havumbirhi bya vona va dyiseke Davhida mbitsi ni ndyangu wakwe, a va ha ri vana vakwe, naswona ku fa ka vona ku n’wi vangele gome lerikulu.—2 Samuwele 13:28-39; 18:33.

Minkarhi yin’wana, tiko ra Vaisrayele hinkwaro a ri rila, hilaha ri endleke hakona loko Muxe a fa. Deteronoma 34:8 yi hi byela leswaku Vaisrayele va n’wi rile ku ringana masiku ya 30.

Eku heteleleni, ku ni xikombiso xa Yesu Kreste. Munghana wakwe lonkulu Lazaro u file. Naswona loko Yesu a vona ndlela leyi vamakwavo va Lazaro, ku nga Marta na Mariya ni vanghana va vona a va rila ha yona, hiloko a “konya emoyeni, a karhateka.” Hambileswi a a swi tiva leswaku ku nga ri kungani, u ta pfuxa munghana wakwe eku feni, u ye emahlweni a “humesa mihloti.” Yesu a a va rhandza vanghana vakwe lavakulu, ku nga Marta na Mariya. Xisweswo u khumbeke ngopfu loko a va vona va ri ni gome lerikulu hikwalaho ka ku fa ka makwavo.—Yohane 11:33-36.

Abrahama, Yakobo, Davhida na Yesu, hinkwavo va kombise ripfumelo lerikulu eka Yehovha ni le ka switshembiso swakwe, kambe a va ri ni gome. Xana ku rila ka vona a ku kombisa leswaku va tsanile hi tlhelo ra moya? Xana gome ra vona a ri kombisa leswaku a va na ntshembo emhakeni ya ku pfuxiwa ka vafi? Doo! Swi tolovelekile leswaku munhu a rila loko a feriwe hi loyi a n’wi rhandzaka.

Xivangelo Lexi Endlaka Leswaku Hi Rila

A ku nga ri xikongomelo xa Xikwembu leswaku vanhu va fa. Xikongomelo xo sungula xa Yehovha tanihi laha xi byeriweke Adamu na Evha, a xi ri xa leswaku misava yi hundzuriwa yi va Paradeyisi leyo saseka, leyi taleke hi ndyangu lowu nga ni rirhandzu naswona wu tsakeke. Rifu a ri ta va kona ntsena loko mpatswa lowo sungula wo hlawula ku ka wu nga n’wi yingisi Yehovha. (Genesa 1:28; 2:17) Khombo ra kona, Adamu na Evha a va yingisanga, naswona hikwalaho ka ku ka va nga yingisi, “rifu ri tlulele vanhu hinkwavo.” (Varhoma 5:12; 6:23) Kutani rifu i nala la nga ni tihanyi loyi a a nga fanelanga a ve kona.—1 Vakorinto 15:26.

Kutani, swi le rivaleni leswaku ku fa ka munhu i nchumu lowu nga tolovelekiki naswona ku va vavisa ngopfu emintlhavekweni lava feriweke. Ri va siya va lahlekeriwe ngopfu evuton’wini bya vona. Theresa, noni leyi yi boxiweke laha henhla, u hlamusele leswi malunghana ni nuna wakwe, u te: “Ndzi ni ntshembo wa leswaku ndzi ta tlhela ndzi n’wi vona eku pfuxiweni ka vafi, kambe ndza n’wi kumbuka swinene. Lowu hi wona nchumu lowu vavisaka hakunene.” Ku fa ka mutswari ku nga ha hi tsundzuxa leswaku na hina hi ta fa. Ngopfu-ngopfu ku fa ka muntshwa ku hi vavisa ngopfu hikwalaho ka leswi a nga hanyangiki nkarhi wo leha.—Esaya 38:10.

Ina, rifu a ri tolovelekanga. Hi fanele hi swi langutela leswaku ri ta hi twisa ku vava, naswona Yehovha a nga languti ku rila ku ri ku pfumala ntshembo eka mpfuko wa vafi. Hilaha swi voniweke hakona eswikombisweni swa Abrahama, Yakobo, Davhida, tiko ra Israyele na Yesu, ku kombisa ndlela leyi hi twaka ku vava ha yona embilwini a swi kombisi swona leswaku hi tsanile hi tlhelo ra moya.a

Nilokoswiritano, loko hina Vakreste hi rila nkosi hikwalaho ka rifu, a hi vaviseki “hilaha hinkwavo lava nga riki na ntshembo va endlaka hakona.” (1 Vatesalonika 4:13) A hi wu hundzeleti nkosi wa hina hikuva a hi pfilunganyekanga hi xiyimo xa lava feke. Ha swi tiva leswaku a va twi ku vava kumbe ku kayakayisiwa kambe swi fana ni loko va etlele vurhongo lebyikulu, bya ku rhula. (Eklesiasta 9:5; Marka 5:39; Yohane 11:11-14) Nakambe hi ni ntshembo lowu heleleke wa leswaku Yesu loyi a nga ku “pfuka ni vutomi,” u ta hetisisa xitshembiso xakwe xa ku vuyisa “hinkwavo lava nga eka masirha-bako ya xitsundzuxo.”—Yohane 5:28, 29; 11:24, 25.

Hikokwalaho, loko u ri ni gome sweswi, chaveleleka hi ku tiva leswaku Yehovha wa ku twisisa ku vava loku u ku twaka. Onge vutivi lebyi ni ntshembo wa wena eka mpfuko wa vafi swi nga ku pfuna eku karhatekeni ka wena swi tlhela swi ku pfuna ku langutana ni ku lahlekeriwa ka wena.

[Nhlamuselo ya le hansi]