Yi Tirhise Hi Vutlhari Mirhi Ya Ku Tshungula

HI MUTSARI WA XALAMUKA! WA LAHA AFRIKA DZONGA

LOKO dokodela wa wena a ku byela leswaku u tirhisa mirhi yo karhi, handle ko kanakana u swi endla hi swikongomelo leswinene, hi ku ya hi leswi a swi tshubuleke loko a ku kambela, hi vutivi byakwe bya vudokodela swin’we ni hi ntokoto lowu a nga na wona. Kambe, muvabyi a nga fanelanga a byarhisa dokodela vutihlamuleri hinkwabyo. Muvabyi na yena u ni vutihlamuleri eka mirhi leyi a yi tirhisaka.

Loko u tirhisa mirhi leyi u byeriweke hi dokodela leswaku u yi tirhisa, xiya swiringanyeto leswi landzelaka leswi humaka eka dokodela:

● Mirhi hinkwayo yi ni makhombo yo karhi. U ni mfanelo ya ku tiva murhi lowu dokodela a ku byelaka leswaku u wu tirhisa swin’we ni makhombo ya wona. Loko u vona leswaku dokodela a nga ku hlamuseli makhombo ya kona, u nga kanakani, n’wi vutise. Eswiyin’weni swo tala, makhombo ya kona a hi nchumu loko ma pimanisiwa ni ndlela leyi wu nga ta ku pfuna ha yona. Kambe, u fanele u wa tiva makhombo ya kona, leswaku u ta swi kota ku endla xiboho xa vutlhari.

● Mirhi a yi va khomi ku fana vanhu. Dokodela a nga swi koti ku ku byela kahle leswaku murhi wo karhi wu ta ku khoma njhani. Loko u vona leswaku murhi wo karhi a wu ku khomi kahle, yana eka dokodela.

● N’wi vutise leswaku u fanele u wu tirhisa nkarhi wo tanihi kwihi murhi wa kona. N’wi vutise leswaku murhi lowu wa godzombela kumbe e-e.

● Xiya leswaku u nga tiendleli xiboho xa ku tshika murhi hi wexe, kumbexana loko u titwa u antswa. Ku tsutsumela ku tshika murhi swi nga ha nyanyisa timhaka. Hikwalaho, rhanga u vonana ni dokodela wa wena.

● Minkarhi hinkwayo byela dokodela ndlela leyi u titwaka ha yona loko u tirhisa mirhi.