Nchumu Lowu Xidzedze Ni Mpfula Swi Nga Taka Swi Nga Wu Herisi

HI VATSARI VA XALAMUKA! EJARIMANI, AUSTRIA, MEXICO NI LE KOREA

HI LEMBE ra 2002, ku ve ni maxelo lama nga ni khombo ematikweni yo tala. Yuropa a ri hlaseriwe hi tindhambhi to biha. Ematikweni man’wana ya misava, Mexico ri hlaseriwe hi xidzedze lexi onhaka xa hurricane, Korea rona ri hlaseriwe hi moya wa thayifuni. Hambileswi mimoya leyi yi vangeke makhombo, kambe yi tiyise swiboho swa rirhandzu leswi nga kona exikarhi ka Vakreste va ntiyiso.

Endzhaku ka tindhambhi ta le Yuropa hi lembe ra 2002, khale ka khanselara wa le Jarimani Vupela-dyambu Helmut Schmidt, u vutisiwe leswaku lava weriweke hi khombo va lava mpfuno wa njhani. U hlamule a ku: “Vanhu va lava swakudya ni vutumbelo, va lava mali ni nkhathalelo wa moya.” Timbhoni ta Yehovha ti pfune swinene ku khathalela lava hlaseriweke hi swidzedze leswi, hi tlhelo ra nyama ni ra moya. Ehleketa hi ntirho wo phalala lowu ti wu endleke eJarimani, eAustria, eMexico ni le Korea.

Vapfuni eJarimani

Loko swi tiveka leswaku ku ni nxungeto wa ndhambhi, Timbhoni ta Yehovha to tala eJarimani ti hlanganyele ni tiko ku lwa ni mati ya ndhambhi. Kathleen, la nga ni malembe ya 19, la tshamaka eDresden, u ri: “A ndzi nga ta tshama hi mavoko. Loko ndzi twa leswaku vanhu van’wana va le khombyeni ra ku lahlekeriwa hi swilo swa vona hinkwaswo, a ndzi boheka ku ya pfuna.”

Timbhoni ta le Jarimani ti sungule ku hlela leswaku ti ya pfuna hi xihatla. Tanihi Vakreste, ti vone ti ri ni vutihlamuleri byo pfuna vamakwavo hi tlhelo ra moya. Kambe ti kombise ni rirhandzu eka vaakelani va tona. (Marka 12:31) Kutani vatirhi va ku tirhandzela lava tlulaka 2 000 va endliwe mintlawa ya nhungu ku ya eka ya 12, ntlawa ha wun’we wu averiwe ntirho wo karhi endhawini leyi hlaseriweke hi ndhambhi. Erhavini ra Timbhoni ta Yehovha le Selters eJarimani, tinqingho ta 13 a ti tirhiseriwa ntsena ku hlamula vanhu lava baka riqingho va vutisa hi khombo leri naswona va lava ku pfuna.

Ronnie na Dina i vatirheli va nkarhi hinkwawo lava nga Timbhoni ta Yehovha, va tirhisa nkarhi wa vona ku pfuna vanghana ni vaakelani va dyondza ntiyiso wa Bibele. Loko va twa hi ta ndhambhi leyi taka, va rhange va ya edorobeni ra Dresden, ku ya endliwa matshalatshala lamakulu ya ku sirhelela miako ya kona leya matimu. Loko mati ya ndhambhi ma hungutekile, Ronnie na Dina va hlangane ni Timbhoni tin’wana eku basiseni Holo ya Mfumo eFreital, leyi a yi tele hi mati ya thyaka. Endzhaku ka sweswo ntlawa lowu wu sungule ku pfuna vaakelani va wona. N’wini wa xitolo lexi nga ekusuhi ni holo u te hefu, loko Timbhoni ti humese thyaka ni ndzhope ekamareni leri a hlayiselaka swilo eka rona.

Siegfried na Hannelore va tshama eColmnitz, ku nga muti lowu kumekaka empfhukeni wa kwalomu ka 40 wa tikhilomitara en’walungu-vupela-dyambu bya Dresden. Xinambyana lexi khulukaka exikarhi ka muti wolowo xi hundzuke nambu lowukulu, xi khukhula tindlu ni mintanga ya vona. Loko mati ma vohlile, vaakelani va hlamele ku vona vanhu lava va nga va tiviki endhawini yoleyo, ku nga Timbhoni ta kwalomu ka 30, va fika va ta pfuna ku basisa kaya ra Siegfried na Hannelore. Endzhaku ka sweswo, ntlawa lowu wu sungule ku basisa mintanga ya vaakelani. Vaaki vo hlayanyana va le mutini wolowo va va vutisile leswaku i yini lexi va susumeteleke ku famba 100 wa tikhilomitara va ta pfuna vanhu lava nga va tiviki. Kutani Timbhoni ti swi kotile ku nyikela xikhutazo xa moya eka vaaki va le Colmnitz.

Swidorobana leswi rhendzeleke doroba ra Wittenberg na swona swi hlaseriwe hi ndhambhi. Mpatswa lowu nga Timbhoni, Frank na Elfriede a va tirha ni vaakelani va vona emasikwini ma nga ri mangani ku nga si fika ndhambhi, va ri karhi va tata masaka hi sava va ma veka emabuweni ya nambu leswaku va ma tiyisa. Loko mati ma vohlile, Frank na Elfriede va endzele lava hlaseriweke hi mati lawa, va va nyika swakudya ni nchavelelo. Frank u ri: “Wansati un’wana loyi hi n’wi endzeleke a nga swi kholwanga leswaku hina lava hi nga n’wi tiviki ni ku n’wi tiva hi n’wi tisele swakudya mahala. U hi byele leswaku a nga kona loyi a va endzeleke ekerekeni yakwe. Naswona nhlangano lowu n’wi tiseleke swakudya a wu n’wi hakerisa nkarhi wun’wana ni wun’wana loko wu n’wi tisela. Vanhu a va hlamele ku vona Timbhoni ta Yehovha ti tamele swakudya swo kufumela ematshan’weni ya minkandziyiso ya Bibele.”

Austria—Mpfuno Wa Xihatla Hi Nkarhi Wa Mhangu

Ndhambhi yi tlhele yi onha ngopfu eAustria. Ku simekiwe tikomiti tinharhu leswaku ti langutela ntirho wa mphalalo. Lexi a xi rhangisiwe emahlweni a ku ri ku lunghisa Tiholo ta Mfumo tinharhu leti a ti onhake ngopfu. Nakambe, mindyangu leyi lavaka ku fika eka 100 ya Timbhoni yi hlaseriwe hi ndhambhi, naswona mati a ma nghene emakaya ya 50. Van’wana va lo sala ntsena ni leswi a va swi ambele. Rhavi ra le Austria ri tivise mavandlha ya kwalaho hi xiyimo lexi, kutani ku simekiwe nkwama wa mphalalo. Hi September a ku nyikeriwe hi mali leyi ringanaka R275 000.

Manana un’wana u tsale a ku: “N’wana wa mina wa malembe ya nhungu wa swi kota ku hlayisa mali hi vukheta naswona a a hlayise $14 [R115]. Kambe loko a twa leswaku vamakwerhu van’wana va lahlekeriwe hinkwaswo leswi va nga na swona, a a tiyimisele ku nyikela hi mali yakwe hinkwayo eka nkwama wa khombo.”

Ehansi ka nkongomiso wa Komiti yo Aka ya Xifundzha (RBC), leyi hi ntolovelo yi langutelaka ntirho wo aka Tiholo ta Mfumo ta Timbhoni ta Yehovha, ku hleriwe mintlawa ku pfuna ku pfuxeta makaya lama onhiweke hi ndhambhi. Un’wana la ti voneke loko ti endla ntirho lowu u te: “Maphepha-hungu ma fanele ma vika leswi mi swi endlaka laha.” Van’wana va cince ni langutelo leri a va ri na rona hi Timbhoni ta Yehovha. Mutswari un’wana la nga Mbhoni u ri: “Khale, vana va mina lava nga riki Timbhoni, a va nga lavi ku yingisa loko ndzi ringeta ku va byela hi ta ripfumelo ra mina. Kambe i ro sungula va ndzi yingisa sweswi!”

Ku tlhele ku endliwa matshalatshala yo pfuna vo tala lava nga riki Timbhoni. Hi xikombiso, wansati un’wana u tsake ngopfu loko Timbhoni ti fika ekaya rakwe hi 7:30 nimixo kutani ti n’wi vutisa loko a lava mpfuno. Wansati yoloye u boheke ku rhurhisiwa, naswona mati ana se a ma sungurile ku nghena endlwini yakwe. Kambe loko a tlhelela, u kume xipapilana lexi humaka eka Timbhoni ehekeni yakwe. A xi ku: “Loko u lava mpfuno, vhela u hi tivisa hi nomu lo.” Timbhoni ti n’wi pfunile ku susa ndzhope ni thyaka endlwini ni le mutini wakwe.

Ntlawa wa Timbhoni ta 100 wu ye edorobeni ra Au ku ya pfuna Timbhoni ta kwalaho ni vaakelani va tona. Varhangeri va mintlawa ya kona va nghene hi yindlu ni yindlu va vutisa vaaki va kwalaho loko va lava mpfuno. Vanhu va hlamarile ku vona leswaku Timbhoni a ti hlomile hi swilo swo humesa mati ni swo basisa, ku fana ni tipompi, minkukulu ni mafoxolo. Ntirho lowu a wu ta teka vini va makaya vhiki hinkwaro, wu hetiwe hi tiawara ti nga ri tingani. Vanhu a va hlalele va havaxele mihloti ematihlweni.

Kwalomu ka Timbhoni ta 400 ta kwalaho ti hoxe xandla entirhweni wo phalala—hakanyingi ti tirha vusiku ni nhlikanhi. Lava hlaleleke va vone matimba lamakulu ya Vukreste bya ntiyiso.

Xidzedze Xa Isidore Xi Hlasela Mexico

Isidore yi sungule yi ri xidzedze xa ximumu le n’walungwini wa Venezuela. Hi September 22, 2002, Isidore yi hlasele Nhlonhle wa Yucatán le Mexico tanihi xidzedze xa matimba. Leswi xidzedze lexi a xi tsutsuma hi rivilo ra 190 wa tikhilomitara hi awara naswona xi fambisana ni mpfula leyikulu, xi onhe hi ndlela leyi nga si tshamaka yi voniwa ematin’wini ya madoroba ya le Mexico ya Yucatán na Campeche ni ku onhanyana edorobeni ra Quintana Roo. Le Yucatán ntsena, tindlu ta 95 000 ti onhake ngopfu, leswi khumbeke vanhu va kwalomu ka 500 000.

Timbhoni ta Yehovha ti pfune ngopfu eka mphalalo le Yucatán lerova xihloko lexikulu xa phepha-hungu ra le n’walungwini wa Mexico xi ku: “Timbhoni Ta Yehovha Ti Phalarile.” Komiti ya mphalalo yi vumbiwe xi nga si fika xidzedze lexi. Ku endliwe malunghiselelo ya xihatla ya ku tshamisa Timbhoni ta madzana yo hlayanyana ta kwalaho. Mavandlha ya le kusuhi ma nyikele hi mali ya xilamulela-mhangu. Swiambalo, mirhi ni swakudya leswi tlulaka 22 wa tithani swi nyikiwe lava poneke xidzedze xexo, ku katsa ni vo tala lava nga riki Timbhoni. Vakulu va kwalaho a va averiwe ku endzela ni ku khutaza lava hlaseriweke hi xidzedze lexi xa Isidore.

Endzhaku ka loko xidzedze xi hlaserile, ku vumbiwe tikomiti ta mphalalo ta kwalaho ku pfuna eku laveni ka Timbhoni leti nyamalaleke. To hlayanyana ti kumeke enhoveni ni le tindhawini tin’wana ku ringana masiku manharhu ti nga ri na swakudya kumbe mati ya ku nwa. Etindhawini tin’wana mati a ma tlakuke ngopfu lerova ma funengete mapala ya gezi! Hikwalaho ku kumiwe swikwekwetsu ivi swi tirhisiwa ku secha lava nga ematini, kutani va nyikiwa swakudya ni ku yisiwa endhawini leyi sirhelelekeke.

Valawuri va kwalaho va lombe Timbhoni swikwekwetsu ni switirhisiwa swin’wana, tanihi leswi a ti tinyiketele ku ya pfuna etindhawini leti vanhu vo tala a va chava ku ya eka tona. Eku sunguleni, ndhuna ya masocha yi arile ku pfumelela Timbhoni leswaku ti nghenela ntirho wa ku secha lowu nga ni khombo. Kambe loko yi vona xivindzi xa tona, yi te: “Ndza kholwa leswaku mi ta nghena hi swihaha-mpfhuka-phatsa, loko swi koxa sweswo, ku ponisa vanhu va n’wina. Yi kona mimovha ya hina, yi nga mi yisa kun’wana ni kun’wana laha mi lavaka kona.”

N’wini wa xitolo xin’wana a a lava ku tiva xivangelo lexi endlaka leswaku Timbhoni ti xava mabodlhela yo tala swonghasi ya mati. Ti vule leswaku a ti ma xavela vamakwavo va moya ni van’wana lava ma lavaka. Wanuna yoloye u endle xiboho xa ku va nyika mabodlhela hinkwawo lawa a a ri na wona ya mati—mahala. Hi siku leri tlhandlamaka u nyikele hi mati yo tala swinene. Exitolo xin’wana, muxavi un’wana u vutise Timbhoni leswaku ha yini ti xava swakudya swo tala swonghasi. Loko a twa leswaku ku xaveriwa lava hlaseriweke hi ndhambhi, u humese munyikelo leswaku va xava swo tala.

Hambileswi mindyangu ya Timbhoni ya kwalomu ka 3 500 yi lahlekeriweke hikwalaho ka Isidore, kambe ku kumeke leswaku ku hava ni un’we eka Timbhoni ta Yehovha la nyamalaleke kumbe la feke. Nilokoswiritano, a ka ha fanele ku endliwa lunghiselelo ro pfuxeta makaya tanihi leswi a ku ri ni tindlu leti onhakeke ta 331 ta Timbhoni. Timbhoni leti nga ni ntokoto eku akeni ti endzele kaya ha rin’we swin’we ni Holo ya Mfumo leswaku ti kambisisa ndlela leyi tindlu leti ti onhakeke ha yona. Ku fikela sweswi, se ku lunghisiwe tindlu ta 258 naswona ku akiwe tin’wana letintshwa ta 172. Nakambe, Tiholo ta Mfumo ta 19 leti onhakeke ti karhi ta pfuxetiwa.

Nkulu wa vandlha leri kumekaka eYucatán u susumeteleke ku vula a ku: “Ndzi tshame ndzi hlaya eminkandziyisweni ya hina hi ntirho wa ku phalala lowu endliweke ematikweni man’wana. Kambe ku wu vona hi lawa ya wena wu ri karhi wu endliwa i mhaka yin’wana. Ripfumelo ra mina ni ra vamakwerhu ri tiyisiwile hi ku vona ndlela leyi nhlengeletano ya Yehovha yi tekeleke mhaka leyi ehenhla ha yona swin’we ni nkhathalelo wa yona, naswona vamakwerhu lava rhandzekaka va tile va ta pfuna.”

Wansati un’wana u te: “A ndzi ta tsaka loko kereke ya mina a yi pfune hilaha n’wina Timbhoni mi pfuneke hakona.” Naswona wansati un’wana la ponisiweke hi Timbhoni u te: “Hikwalaho ka Timbhoni ta Yehovha, a hi fanga. Ti kombise rirhandzu ra tona, ti hoxa vutomi bya tona ekhombyeni leswaku ti hi ponisa loko tindlu ta hina ti nyumpele ematini.”

Moya Wa Thayifuni Wu Hlasela Korea

Hi August 31 na September 1, 2002, Thayifuni leyi vuriwaka Rusa yi hlasele ndhawu leyikulu ya le Korea. Song-pil Cho, nkulu wa vandlha, u te: “A wu twa onge u yime ehansi ka xawara. Mpfula a yo chuluka kunene.” Mpfula leyi tlulaka 870 wa timilimitara yi nile hi nkarhi lowu nga ehansi ka 24 wa tiawara—hi yona yo sungula ku na hi mpimo wo tano kwalaho.

Hi ku ya hi The Korea Herald, ku mbombomele tindlu leti ringanaka 28 100 etikweni swin’we ni masimu lama endlaka 85 000 wa tihektara. Vanhu va kwalomu ka 70 000 va boheke ku rhurhisiwa. Thayifuni leyi yi dlaye swifuwo swa 301 000, yi mbombomerisa swikepe swa 126 ni ku wisa mapala ya gezi ya madzana-dzana. Ku vikiwe leswaku vanhu lava tlulaka 180 va file kumbe va nyamalarile. Exikarhi ka vona a ku ri ni Timbhoni ta Yehovha timbirhi.

Ku fana ni le Yuropa ni le Mexico, Timbhoni ta Yehovha ti angule hi ku hatlisa. Minyikelo ya Timbhoni a yo na kunene yi huma etikweni hinkwaro. A yi katsa swiambalo, tinguvu ni swin’wana swa nkoka. Nilokoswiritano, swirho swin’wana swa vandlha a swi tshama etindhawini ta le tlhelo ni leti lava mphalalo a va nga fiki eka tona. Mapato ma onhiwile naswona mabuloho ma khukhuriwile. A ku nga ri na gezi kumbe tinqingho. Kutani ku hleriwe mintlawa leswaku yi teka riendzo hi milenge yi ya pfuna. Song-pil Cho, loyi a a tirha ni ntlawa wun’wana wa mphalalo, u hlamusela leswi hi ndhawu yin’wana leyi va pfuneke eka yona: “Mabuloho ya nkombo ni swiphemu leswikulu egondzweni a swi khukhuriwile. Loko hi hetelela hi fikile edorobeni, kun’wana ni kun’wana a hi vona tindlu leti onhiweke ni leti mbundzumukeke. A ku nuha, swiharhi leswi feke a swi kumeka kun’wana ni kun’wana. Kambe, hi tsake swinene loko hi hlangana ni vamakwerhu va tsevu va xinuna ni va xisati lava nga Vakreste! Va lahlekeriwe hi swilo swa vona leswi vonakaka, kambe hinkwavo a va ha hanya naswona va sirhelelekile.”

Entiyisweni, Timbhoni ta Yehovha a ti lungheke kahle hi nkarhi wa khombo. Tanihi leswi ndhambhi yi tolovelekeke hi nguva ya timpfula, RBC ya vona endhawini ya le Seoul ana se a yi lunghekile hi swilo swa mphalalo loko ko tshuka ku va ni ndhambhi enkarhini lowu taka. Ku sukela hi 1997, a yi seketela minongonoko yo letela vatirhi va ku tirhandzela ya lembe ni lembe leswaku va ta swi kota ku pfuna loko ko tshuka ku va ni xiyimo lexi lavaka xilamulela-mhangu.

Hi September 2, vatirhi vo phalala va RBC va fikile evuxeni bya doroba ra Kangnŭng kutani va simeka ntsindza wa vona eHolweni ya Nhlengeletano ya Timbhoni ta Yehovha ya kwalaho. I yini lexi a va lava ku xi endla ku sungula? Ku kumela lava poneke mati yo tenga. Loko ku va ni tindhambhi letikulu, hakanyingi tipompi ta mati ta khukhuleka; mati ya ndhambhi ma thyakile. RBC yi hlele leswaku tilori letikulu ta mati ti rhumeriwa etindhawini leti hlaseriweke hi ndhambhi.

Endzhaku ka loko mati ya ndhambhi ma vohlile, hinkwaswo swi va swi funengetiwe hi ndzhope wo nuha. Nilokoswiritano, a ku ri ni ndlela leyinene yo basisa. Tanihi leswi tindlu to tala endhawini yoleyo ti akiweke hi semendhe, ti nga ha basisiwa hi ku kwamula phepha ra le khumbini ni mapulanga ivi ku hlantswiwa khumbi hi mati.

Mati ma onha swilo swo tala swa gezi. Kambe, loko swilo swo kota swigwitsirisi ni tiboyilara swo tlhantlhiwa hi mutshila wa gezi, swi hlantswiwa kahle, swi omisiwa kutani swi tlhela swi hlanganisiwa endzhaku ka masiku ma nga ri mangani, eswiyin’weni swo tala swa lungha. RBC yi swi lunghekerile ku endla ntirho wo tano. A swi laveki leswaku ku xaviwa tiboyilara tin’wana, tona ti nga ha tirhisiwa ku omisa tindlu. Ntirho wolowo wu teka mavhiki mambirhi ku ya eka manharhu.

Swiambalo ni tinguvu leti onhiweke hi ndhambhi ti fanele ti hlantswiwa ngopfu endzhaku ka masiku ma nga ri mangani leswaku ti nga onhaki. Vatirhi va ku tirhandzela lava humaka evandlheni ra kwalaho ra Timbhoni ta Yehovha va pfune ku hlengeleta mpahla leyi thyakeke ya vamakwerhu lava nga Vakreste. A swi tika ku hlantswa ndzhope lowu ngheneke empahleni leyi—naswona a yi fanele yi hlantswiwa hi mavoko exinambyanini xo titimela swinene. Endzhaku ka loko muviki un’wana wa mahungu a twe hi ntirho lowu wa rirhandzu, ku kombisiwe xifaniso lexikulu xa Timbhoni ti ri karhi ti endla ntirho lowu eka phepha-hungu ra kwalaho.

Ndhambhi leyo biha eYuropa, eAmerika N’walungu ni le Asiya yi khukhule tindlu, nhundzu ni vanhu vo tala lava nga riki na nandzu. Hambileswi khombo leri ri nga rikulu, kambe swiendlakalo swo kota leswi swi tolovelekile ‘emasikwini lawa yo hetelela’ ya fambiselo leri ra swilo, leri nga ni “minkarhi ya mangava leyi swi nonon’hwaka ku langutana na yona.” (2 Timotiya 3:1) Timhangu leti ti nga ha tirha ku hi tsundzuxa yinhla leyi: Vakreste va ntiyiso va rhandzana naswona va rhandza ni vaakelani va vona. Rirhandzu ro tano leri nga riki na vutianakanyi i nchumu lowu ku nga riki na ndhambhi leyi nga wu khukhulaka.

[Xifaniso lexi nga eka tluka 10]

JARIMANI—Yindlu leyi onhiweke hi xidzedze

[Swifaniso leswi nga eka tluka 11]

JARIMANI—Vatirhi va ku tirhandzela lava tlulaka 2 000 va pfune hi swilo swa mphalalo hi xihatla

[Swifaniso leswi nga eka tluka 12]

AUSTRIA—Ku lunghisa Holo ya Mfumo eOttensheim

Eximatsini: Ntlawa wa vatirhi va ku tirhandzela wu vuya eAu, laha wu pfuneke Timbhoni ta kwalaho ni vaakelani va tona

[Swifaniso leswi nga eka tluka 13]

MEXICO— Exineneni: Komiti ya mphalalo yi nyika vanhu lava poneke mati yo nwa

Ehansi: Ku aka tindlu leti sivaka leti mbundzumukeke

[Swifaniso leswi nga eka tluka 15]

KOREA—Ku suka eximatsini ku ya exineneni: Xiphemu xa doroba lexi nga mphensa-mphensa; mati lama nga ni matimba lama tirhisiwaka ku basisa; ku hlantswiwa ka mpahla exinambyanini xa le kusuhi