Langutelo Ra Bibele

Xana Hakunene Swi Hoxile Ku Nwa Ku Tlula Mpimo?

SE KU hundze malembe etiholweni ta mintlango vatlangi va karhi va tiendla swidakwa leswaku va hlekisa vahlaleri. Hambileswi vatlangi volavo va vaka va nga dakwanga hakunene, matlangelo ya muxaka lowu ma kombisa leswaku vanhu vo tala va teka vudakwa byi nga ri na khombo, kambe ku ri nchumu wo tsakisa.

Kambe entiyisweni lowu a hi nchumu lowu tsakisaka. Vandla ra Rihanyo ra Misava Hinkwayo ri vula leswaku ku kukutlela byala i xin’wana xa swilo leswi vekaka vutomi ekhombyeni emisaveni hinkwayo. Ku vuriwa leswaku nchumu lowu dlayaka vanhu ngopfu ni ku vanga mavabyi i fole ivi ku landzela byala ku tlula swilo leswin’wana leswi godzombelaka, naswona ku koxa tiko ra Amerika mali yo tlula 1,3 wa magidi ya timiliyoni hi lembe.

Hambileswi vumbhoni lebyi byi nga le rivaleni, vo tala a va si swi teka swi ri khombo ku nghena hi nhloko ejomeleni. Hambiloko va pfumela leswaku sweswo swi nga lamata munhu hi ku famba ka nkarhi, kambe va vona swi nga bihanga leswaku munhu a pfa a dakwanyana. Vantshwa va le matikweni man’wana, va teka ku dakwa ku ri ndlela leyi kombisaka leswaku va kula. Hambileswi mavandla ya ta rihanyo ma tsundzuxaka hi ta makhombo ya kona, mianakanyo ya leswaku ku nwa tinghilazi ta ntlhanu kumbe ku nwa byi kondza byi ku tsutsumela enhlokweni, yi andza hi ndlela leyi tsemaka nhlana eka lavatsongo ni lavakulu. Xisweswo, swa twisiseka leswaku ha yini vanhu vo tala va nga tshembi leswaku ku dakwa swi ni khombo hakunene. Bibele yona yi ri yini?

Vhinyo Ni Swakunwa Leswi Pyopyaka I Tinyiko Leti Humaka Eka Xikwembu

EBibeleni ku ni tindzimana to tala leti vulavulaka hi vhinyo ni xakunwa lexi pyopyaka. Hosi Solomoni u tsarile: “Famba u ya dya swakudya swa wena hi ku tsaka, u nwa vhinyo ya wena hi mbilu leyinene, hikuva Xikwembu xa ntiyiso se xi tsakisiwe hi mintirho ya wena.” (Eklesiasta 9:7) Mupisalema u vule leswaku Yehovha Xikwembu i Munyiki wa “vhinyo leyi tsakisaka mbilu ya munhu wa nyama.” (Pisalema 104:14, 15) Swi le rivaleni leswaku vhinyo hi yin’wana ya tinyiko leti Yehovha a katekiseke vanhu ha tona.

Swi le rivaleni leswaku Yesu a nga swi teki swi ri nandzu ku nwa vhinyo. Entiyisweni, singita leri a ri endleke ro sungula enkhubyeni wa vukati a ri katsa ku hundzula mati ma va vhinyo yo nandziha ngopfu. (Yohane 2:3-10) U tlhele a tirhisa vhinyo tanihi leyi yimelaka ngati yakwe loko a sungula Xilalelo xa Hosi. (Matewu 26:27-29) Bibele yi tlhela yi vula leswaku vhinyo i murhi, hikuva muapostola Pawulo u khutaze Timotiya leswaku a “tirhisa vhinyo yitsongo hikwalaho ka khwiri ra [yena].”—1 Timotiya 5:23; Luka 10:34.

Nchumu Wa Nkoka I Ku Ringanisela

Xiya leswaku Pawulo u bumabumele ku nwa “vhinyo yitsongo.” Bibele a yi pfumelelani ni ku tipeta ebyaleni. Vayuda lava a va ri vaprista a va pfumeleriwile ku nwa va ringanisela loko va nga ri emintirhweni ya vona. Kambe, a va nga pfumeleriwanga ku nwa hambi ko va swibyalana loko va endla mintirho ya vona ya vuprista. (Levhitika 10:8-11) Endzhaku ka malembe yo tala, Vakreste va lembe-xidzana ro sungula va lemukisiwile leswaku swidakwa a swi nge “yi dyi ndzhaka ya mfumo wa Xikwembu.”—1 Vakorinto 6:9, 10.

Tlhandlakambirhi, loko Pawulo a letela Timotiya, u vule leswaku lava va rhangelaka evandlheni a va fanelanga va va ‘tichovolo tlhelo swidakwa’ kumbe ‘ku tinyiketela eka vhinyo yo tala.’a (1 Timotiya 3:3, 8) Entiyisweni, Bibele yi lerisa leswaku swidakwa leswi nga hundzukiki swi fanele swi hlongoriwa evandlheni ra Vukreste. (1 Vakorinto 5:11-13) Hilaha Matsalwa ma swi vekaka hakona hi ku kongoma, “vhinyo i muhlekuri.” (Swivuriso 20:1) Ku tipeta ebyaleni swi nga endla leswaku munhu a tsandzeka ku tikhoma hambi ku ri ku avanyisa hi ndlela leyinene.

Leswi Endlaka Rito Ra Xikwembu Ri Sola Vudakwa

Yehovha, ‘loyi a hi dyondziselaka ku hi pfuna,’ wa swi tiva leswaku loko hi tirhisa nchumu wo karhi hi ndlela yo biha, hi hetelela hi tivavisile hi tlhela hi vavisa ni van’wana. (Esaya 48:17, 18) Sweswo swi tano loko swi ta emhakeni yo nwa byala. Rito ra Xikwembu ra vutisa: “I vamani lava nga ni khombo? I vamani lava vilelaka? I vamani lava nga ni timholovo? I vamani lava karhatekeke? I vamani lava nga ni timbanga ku nga ri na xivangelo? I vamani lava nga voniki kahle?” Ra hlamula: “Hi lava va tshamaka nkarhi wo leha ni vhinyo, lava va fikaka leswaku va ta lavisisa vhinyo leyi pfanganisiweke.”—Swivuriso 23:29, 30.

Loko vanhu va nghene hi nhloko ejomeleni, va endle swilo swo tala swa vuphukuphuku ni swa khombo: ku nga ku chayela va dakwile, leswi hoxeke vutomi bya vona ni bya van’wana ekhombyeni, ku hlekisana ngopfu ni nsati kumbe nuna wa un’wana, kutani swi onha vuxaka bya vatekani, ku vulavula ni ku endla swin’wana swa vuhunguki kumbe swo biha. (Swivuriso 23:33) Swa fanela leswi ku vuriweke leswaku byala hi byona lebyi vangaka swiphiqo swo tala eka vanhu namuntlha. A swi hlamarisi leswi Xikwembu xi khongotelaka xi ku: “U nga vi exikarhi ka lava va nwaka ngopfu vhinyo”!—Swivuriso 23:20.

Eka Vagalatiya 5:19-21, Pawulo u xaxamete minkarhi ya ku dakwa ni ya huwa leswaku i “mintirho ya nyama” leyi lwisanaka ni mihandzu ya Xikwembu ya moya. Ku nwa ku tlula mpimo swi onha vuxaka bya munhu ni Xikwembu. Hikwalaho, swi le rivaleni leswaku Vakreste va fanele va papalata ku nwa ku tlula mpimo.

[Nhlamuselo ya le hansi]