Tithoyi Ta Kahle Swinene

Xana ndzi fanele ndzi n’wi xavela tithoyi ta njhani n’wana wa mina? Xana ndzi fanele ndzi tirhisa mali muni? Loko u ri mutswari, swi nga ha endleka u tivutise swivutiso leswi ko tala. Phela, u ta tsaka ku tiva leswaku tithoyi letinene ku nga va leti nga durhiki.

Buku leyi nge Motivated Minds—Raising Children to Love Learning yi ri: “Vana va vuyeriwa swinene loko va endla xilo xo karhi ni ku xi kambisisa ku tlula ku tshama va xi hlalela, hikwalaho tithoyi leti nga durhiki leti lavaka n’wana a tirhisa miehleketo i tinene ku tlula swimovhana swo durha leswi fambaka hi tibetri kumbe swipopana leswi vulavulaka, leswi nga n’wi khomaka mavoko n’wana wa wena.” Tithoyi ta manguva lawa ti nga ha “tsakisa eku sunguleni, kambe hakanyingi vana va hatla va phirheka hikuva a va swi koti ku tipfula-pfula, ku ti kambisisa kumbe ku tiendlela leswi va swi lavaka.”

Swi titshege hi malembe ya n’wana, tithoyi leti phyuphyisaka mianakanyo ti katsa swilo swo fana ni switina leswi endliweke hi mapulanga, mabokisi lama nga riki na nchumu, maphepha, swilo leswi endliweke hi mavoko hambi ku ri sava ni mati. Buku leyi nge Motivated Minds yi ri: “Tithoyi letitsongo ta swifaniso swa swifuwo swa le purasini, ti ta endla leswaku [n’wana] a ti veka hi mintlawa ya tona, a vona ku hambana ka tona ni ku antswisa vuswikoti byakwe bya ku vulavula hi ku endla switori.” Buku leyi yi tlhela yi ringanyeta swichayachayani leswi nga rharhanganangiki—loko u nga ri na xiphiqo xa pongo—hikuva leswi swi endla leswaku vana va twa ku hambana-hambana ka pongo.

Vana va tlharihile naswona va hisekela ku dyondza ni ku tlanga. Kutani ha yini u nga va pfuni eka swiyenge leswi swinharhu hi ku va hlawulela tithoyi hi vutlhari.