Hi Yihi Filimi Leyi Tlangaka Sweswi?

XANA u ehleketa yini loko ku fika ximumu? Loko maxelo ma cinca kutani ku sungula ku kufumela, swi nga ha tsakisa leswaku u va ehandle hi ximumu—kumbexana ku ya eribuweni ra lwandle kumbe ephakini u ya beriwa hi moya.

Kambe vaendli va tifilimi va tsakela leswaku vanhu va timiliyoni va tirhisa tiawara to hlayanyana va hlalele tifilimi endlwini ya tifilimi. Le United States ntsena, ku ni tindhawu ta kwalomu ka 35 000 to hlalela tifilimi eka tona, naswona emalembeni ya sweswinyana, mali leyi tlulaka 40 wa tiphesente ya tifilimi etikweni rero yi kumeke hi ximumu.a Heidi Parker, wa magazini wa Movieline, u ri: “Ti fana ni mpindzulo lowu vini va mavhengele va wu kumaka hi Khisimusi.”

A swi nga ri tano enkarhini lowu hundzeke. Khale tiholo ta tifilimi ta le United States a ti nga endli mali hi ximumu, a ti boheka ku hunguta tifilimi leti a ti tikombisa kumbe ku pfala hi nguva ya ximumu. Kambe exikarhi ka va-1970, tiholo ta tifilimi leti a ti ri ni swititimerisa-moya a ti koka vanhu va timiliyoni lava a va baleka ku hisa. Vana a va pfarile eswikolweni, vaendli va tifilimi va swi vona kahle leswaku va nga dya ngopfu hi vona. Ku nga ri kungani, ku endliwe tifilimi leti a ti rhandziwa ngopfu hi ximumu. Sweswo swi cince ndlela leyi tifilimi a ti endliwa ni ku navetisiwa ha yona, hilaha hi nga ta swi vona hakona.

[Nhlamuselo ya le hansi]