Ku Yiva eXitolo—Xana I Ntlango Lowu Nga Riki Na Khombo Kumbe I Nandzu Lowukulu?

EHLEKETA hi xiyimo lexi landzelaka. Nyangwa wa le mahlweni ka xitolo lexikulu wa pfuleka, kutani ku nghena vanhwanyana vambirhi lava ambaleke swiambalo swa fexeni. Va famba hi phaseji va kongoma laha ku vekiweke switolwa. Murindzi loyi a ambaleke yunifomo wa va landzela kambe u fika a yima endzhaku ka vona hi mpfhuka wa kwalomu ka 10 wa timitara, a yima a khondle mavoko hala ndzhaku. U languta vanhwanyana lava loko va ri karhi va nyanga-nyanga swo penda milomu ni tinxiyi.

Hiloko va n’wi yiva hi tihlo, murindzi loyi a va xondzoloteke. Va sungula ku nyanyuka. Un’wana wa vanhwanyana lava u ya laha ku nga ni swo penda minwala kutani a teka mabodlela ma nga ri mangani. A khoma la a tshika a endla onge u kambisisa mivala yimbirhi yo tshwuka. A veka bodlela rin’we ehansi kutani a teka rin’wana leri nga ni muvala wo byihalanyana.

Murindzi a languta ehansi kutani a cingela tlhelo lerin’wana. Hi ku copeta ka tihlo, vanhwanyana lava va hoxa swo penda milomu ni minwala etibegeni ta vona. Va languteka onge a ri dumanga helo ku ve etimbilwini va nyanyukile. Va fika va yima ephasejini swa xinkarhana, un’wana a ri karhi a languta khabodo leyi nga ni swo penda minwala kasi un’wana a languta swo penda mahlo.

Hiloko va langutana kutani va kumeta-kumeta tinhloko, va sungula ku famba va ya emahlweni ka xitolo. Murindzi a va nyizela kutani va n’wayitelana va hundza. Va suka va ya laha ku vekiwaka swilo swa tiselfoni ekusuhi ni loyi a hakerisaka, va fika va swi languta. Va hlevetela malunghana ni swipaci swa dzovo swa tiselfoni leswi vekiweke kwalaho. Kutani va kongoma enyangweni wo huma ha wona.

Loko va ri karhi va famba a va nyanyukile. Loko va huma enyangweni, a va nga ha tikoti hi ku tsaka, a va lava ku ba ni nkulungwana, kambe va lo tikhoma. Loko va ri ehandle va sungule ku basuluka swikandza hi ntsako. Hiloko va ku hefu, va titwa va ntshunxekile. Hiloko va hatlisa va ri karhi va hlekelela. Emiehleketweni ya vona ku ni nchumu wun’we ntsena: ‘Hi swi kotile ku yiva hi nga khomiwi!’

Vanhwanyana lavambirhi lava ku vulavuriweke hi vona laha a hi va xiviri kambe xiyimo lexi xi tala ku endleka. Ku ringanyetiwa leswaku ku ni vanhu va miliyoni lava yivaka eswitolo siku ni siku eUnited States ntsena, kambe lexi i xiphiqo xa misava hinkwayo. Hilaha hi nga ta swi vona hakona, swi onha ngopfu. Hambiswiritano, vanhu vo tala lava yivaka eswitolo a va swi voni leswaku va onha ku fikela kwihi. Hambi ku ri vo tala lava nga swi kotaka ku hakela va hlawula ku yiva kunene. Hikwalaho ka yini?