Leti Humaka Eka Vahlayi

Ri Ye Kwihi Rirhandzu? (March 2006) Misava yi pfilunganye nhlamuselo ya rito leri nge rirhandzu, naswona Sathana u lava ku ri herisa hi ku helela. Rungula ro fana ni leri ri endla leswaku hi kombisa rirhandzu hi swiendlo naswona hi ndlela yo pfumala vutianakanyi. Ndza nkhensa hi ku antswisa ndlela leyi ndzi twisisaka ha yona leswaku Yehovha u lava hi tirhisa mfanelo leyi yi nga ni matimba.

Y. B., United States

Ndzi sale ndzi ri ni xivundza loko vanghana va mina lavakulu va rhurhela evandlheni leri vulavulaka ririmi rimbe. Kambe, loko xivundza xi sungula ku nyanya, ndzi kume magazini lowu. Ndza xi nkhensa xitsundzuxo lexi, “Loko u lava ku rhandziwa, na wena rhandza van’wana.” Ku sukela sweswi, ndzi kunguhata ku ‘ndlandlamuka’ ni ku rhandza van’wana swi huma embilwini leswaku ndzi kuma vanghana lavantshwa.—2 Vakorinto 6:12, 13.

M. T., Japani

Ku Langutana Ni Mintlhontlho Ya Ku Dyuhala (February 2006) Minkarhi yin’wana ndzi vona onge vadyuhari va rivariwile. Se ndzi ni malembe ya 11 ndzi khathalela nuna wa mina la nga ha kotiki nchumu. Minkarhi yin’wana ndza ha titwa ndzi ri ni xivundza. Ndzi hlaya swihloko swa Xalamuka! ko tala ni ku yingisela khasete ya kona minkarhi hinkwayo. Magazini lowu wu fike hi nkarhi. Ndza mi nkhensa swinene.

S. T., Japani

Swirho Leswi Endliwaka (February 2006) Ndza mi nkhensa swinene hi xihloko xa n’wina lexi vulavulaka hi swirho leswi nga lo endliwa. Loko ndzi ri ni tin’hweti ta mune ndzi tikile, hi byeriwe leswaku ricece ra hina ri ta velekiwa ri nga ri na mavoko ni milenge, nileswaku ri nga veheriwa milenge leyi nga lo endliwa loko ri ri ni lembe. Xihloko lexi xi fike hi n’hweti leyi Daryl a hlanganisa lembe ha yona. Sweswi u dyondza ku deya. Mina ni nuna wanga hi wu langutele hi mahlo-ngati nkarhi lowu Daryl a nga “ta tlula kukota mhunti.”—Esaya 35:6.

Y. A., Furwa

Vutomi I Bya Risima (November 8, 2001) Ndzi hlaye nkandziyiso wa November 8, 2001 hi ku phindha-phindha, ngopfu-ngopfu loko ndzi titwa ndzi heleriwe hi matimba. Rungula ro tano ri fana ni murhi eka mina, ri hambane ni murhi ntsena hileswi rona ri nga hundzeriwiki hi nkarhi. Ndzayo ni switsundzuxo leswi yi hi nyikelaka swona swa pfuna hakunene. Xalamuka! yi phyuphyisa moya wa mina, yi endla ndzi swi vona leswaku ma khathala hi vanhu lava fanaka na mina. Ndza tsaka ni ku tlangela swinene hikuva mi kona ku ta ndzi tsundzuxa leswaku “vutomi i bya risima”!

P. T., Madagascar

A Va Lava Ntshunxeko Wa Vukhongeri—Xana A Va Ri Vakreste Va Ntiyiso? (February 2006) Ndzi tsemeke nhlana ku vona ndlela leyi mhaka yi soholotiweke ha yona exihlokweni lexi. Ku ni xivangelo xa nkoka lexi endlaka leswaku Maindiya ya le Amerika N’walungu ma nga tlangeli holideyi yo Nkhensa, kambe mi lo tumbeta tinhla ta kona mi hundza.

Vito ri susiwile, United States

“Xalamuka!” ya hlamula: Hi kombela u xiya leswaku xikongomelo xa xihloko lexi a ku nga ri ku tlhuvutsa matimu ya Siku ro Nkhensa. Tibuku to hlayanyana, ku katsa ni “Encyclopædia Britannica,” ti vika leswaku hi xixikana xa 1621, Vahlapfa va tlangele ku ringana masiku manharhu ni vanghana va vona lava nga Maindiya. Mhaka leyi yi tlhuvutsiwa epapileni leri tsariweke hi Edward Winslow, ya December 11, 1621. Hambiswiritano, emalembeni lama landzeleke, tiholideyi to nkhensa a ti ri ta ku tlangela swiendlakalo hinkwaswo ku nga ri swa ntshovelo. Nkhuvo wo biha wa ku “nkhensa” wu tivisiwe hi 1637 hi Ndhuna-nkulu John Winthrop wa Massachusetts Bay Colony endzhaku ka ku dlayiwa ka madzana ya Maindiya lama vitaniwaka Ma-Pequot. Hikwalaho, ha swi twisisa leswaku ha yini vahlayi van’wana va nga yi tsakeli holideyi ya Siku ro Nkhensa.