N’hwari—A Yi Tolovelekanga Le Hawaii

MINA ni vanghana va mina a hi tsake ngopfu loko hi endzela xihlala xa Hawaii lexi vitaniwaka Maui. Kahle-kahle, a hi lava ku ya hlalela ku huma ka dyambu hi yime ehenhla ka vholkheno ya Haleakala, leyi leheke 3 055 wa timitara. Hi byeriwe leswaku i xiendlakalo lexi tsakisaka swinene. Lexi a xi vavanyana hileswaku a hi fanele hi pfuka hi awara ya mbirhi nivusiku, leswaku hi ta tsemakanya xihlala ku suka eKapalua, laha a hi tshama kona. Kutani a swi lava hi gonya ntshava hi movha. A hi ehleketa leswaku, leswi a bya ha riki vusiku, hi ta va hi ri hexe. Kambe a swi nga ri tano! A hi landzelela timovha to tala leti a ti gonya ntshava ti ya le nhlohlorhini. Loko hi fika ehenhla ka ntshava, xirhami a xi vuyisa ni n’wana evukatini. Kambe a hi te ni minkumba leswaku hi ta funengela.

A ku ri ni vanhu vo tala lava a va yimele ku huma ka dyambu leri a ri ta tlhava hi awara ya tsevu. Vanhu a va nyanyuke ngopfu, naswona tikhamera ta vona a ti lunghekele ku teka xifaniso xa xiendlakalo lexi xo hlawuleka. Kambe ku endleke swin’wana leswi a hi nga swi langutelanga, hi ve ni gome hikuva ku ve ni matsefu! A hi swi kotanga ku teka swifaniso leswi a hi swi lava hi timbilu ta hina hinkwato. Kambe leswi tintshava leti ti nga ekusuhi ni Lwandle ra Pacific, sweswo swi tala ku endleka. Xisweswo hi boheke ku langutana ni gome ra hina, kutani hi yimela matsefu leswaku ma hangalaka loko dyambu ri ri karhi ri tlhava. Hiloko ku humelela nchumu wun’wana lowu a hi nga wu langutelanga! Hi sungule ku vona ku saseka ka mugodi lowu wa vholkheno naswona a wu khavisiwe hi swindledyana leswi vanhu va famba-fambaka eka swona. Sweswo swi hi thove timbilu.

Hiloko hi xitshuketa ku twakala mpfumawulo wo hlamarisa—a ku twakala ku “chuKAR, chuKAR.” Kutani hi languta lomu a wu huma kona. A ku ri n’hwari yo saseka leyi kumekaka eYuropa ni le Asiya leyi vitaniwaka chukar, leyi hi Xilatini yi vitaniwa Alectoris chukar. Loko yi wundla mavondlo ya yona, yi tala ku heta nkarhi wo leha yi ri ehansi laha yi tshikelaka kona. A yi ringetanga ku haha, kambe yi lo suka hi rivilo.

Swi tise ku yini leswaku xinyenyana lexi xi kumeka laha xihlaleni xo saseka xa Maui? Ku vuriwa leswaku swi lo yisiwa kwalaho. Le tiko-nkulu ra Amerika N’walungu, loko swi kurisiwile swi yisiwa enhoveni leswaku vanhu va ti phasela swona. Hi titwe hi katekile hikuva hi vone nyenyana leyi ekusuhi hambileswi yi nga ni tingana.—Xi lo nyikeriwa.