Swivangelo Swo Tshemba Bibele
3. Ku Pfumelelana Ka Yona Hi Vuenti
Tiehlekete u kombele vavanuna va 40 lava kuleleke eka swiyimo swo hambana-hambana leswaku va tsala buku, un’wana ni un’wana a tsala xiphemu xo karhi. Vatsari va kona va tshama ematikweni yo hambana-hambana naswona a va tivani. A va nga swi tivi leswi lavan’wana va swi tsaleke. Xana u nga langutela leswaku rungula ra buku ya kona ri pfumelelana?
BIBELE yi tsariwe hi ndlela yoleyo hi vanhu lava nga tivaniki.a Yi tsariwe hi vanhu lava nga eka swiyimo leswi nga tolovelekangiki swo tlula leswi hlamuseriweke laha henhla, kambe yi pfumelelana hi vuenti.
Swiyimo swo hlawuleka. Bibele yi tsariwe malembe ya kwalomu ka 1 600, ku sukela hi 1513 B.C.E. ku ya eka 98 C.E. Vatsari vo tala va kwalomu ka 40 va hanye eka malembe-xidzana yo hambana-hambana. A va tirha mintirho yo hambana. Van’wana a va ri vaphasi va tihlampfi, van’wana a va ri varisi kumbe a va ri tihosi kasi un’wana a a ri n’anga.
Rungula leri pfumelelanaka. Vatsari va Bibele va vulavule hi nhloko-mhaka yin’we: ku nga ku lweriwa ka mfanelo ya Xikwembu yo fuma vanhu ni ku hetiseka ka xikongomelo xa xona hi ku tirhisa Mfumo wa le tilweni, hulumendhe leyi nga ta lawula misava hinkwayo. Nhloko-mhaka yoleyo yi boxiwe ro sungula eka Genesa, ivi yi hlamuseriwa hi vuenti eka tibuku leti landzelaka ku ya fika enhlohlorhini ya yona eka Nhlavutelo.—Vona xihloko lexi nge “Xana Bibele Yi Vulavula Hi Yini?” eka tluka 19.
Ku pfumelelana ka vuxokoxoko bya vona. Vatsari va Bibele a va pfumelelana ni le ka vuxokoxoko lebyitsongo, kambe a va nga rhangi hi ku twa leswi vatsari lavan’wana va swi tsaleke. Xiya xikombiso lexi landzelaka. Yohane, mutsari wa Bibele u hi byela leswaku loko ntshungu lowukulu wu tele ku ta yingisela Yesu, Yesu u vutise Filipiya hi ku kongoma leswaku va nga ya swi xava kwihi swinkwa. (Yohane 6:1-5) Malunghana ni mhaka yoleyo, Luka u vula leswaku sweswo swi humelele ekusuhi ni muti wa Betsayida. Yohane, eku sunguleni ka buku yakwe u boxe leswaku Filipiya a a huma eBetsayida. (Luka 9:10; Yohane 1:44) Kutani swa twala leswi Yesu a vutiseke un’wana wa vavanuna lava tshamaka kwalaho. Vuxokoxoko bya kona bya pfumelelana, kambe swi le rivaleni leswaku a va rhanganga hi ku vutisana.b
Ku hambana loku faneleke. Ku ni ku hambana loku nga kona etimhakeni to karhi, kambe swo boha leswaku ku va kona. A hi nge ntlawa wa vanhu wu vone vugevenga byo karhi. Loko hinkwavo ka vona va vula vuxokoxoko lebyi fanaka va tirhisa ni marito lama fanaka, xana a wu nga ta ehleketa leswaku va rhange va vulavula hi mhaka ya kona? Hi ntolovelo, vumbhoni bya vona byi ta ya hi leswi un’wana ni un’wana a swi voniseke xiswona. Swi ve tano hi vatsari va Bibele.
Xiya xikombiso lexi landzelaka. Xana Yesu a a ambale nguvu ya xivunguvungu hi siku ra ku fa ka yena, hilaha Marka na Yohane va vikeke ha kona? (Marka 15:17; Yohane 19:2) Kumbexana a yi ri ya ribungu, hilaha Matewu a vulaka hakona? (Matewu 27:28) Entiyisweni mivala leyi hinkwayo yi nga va yi ri yona. Eka muvala wa xivunguvungu ku ni muvala wo tshuka eka wona. Swi ya hi leswaku munhu u wu languta a ri kwihi, ku vonakala ni ndhawu leyi mivala yo karhi yi nga eka yona swi nga endla yin’wana yi nga vonaki kahle, sweswo swi nga ha endla nguvu ya kona yi va ni ndzhutinyana.c
Ku pfumelelana ka vatsari va Bibele swin’we ni ku fana ka rungula ra vona leswi va nga swi endlangiki hi xikongomelo, swi kandziyisa leswaku leswi va swi tsaleke swa tshembeka.
[Tinhlamuselo ta le hansi]
a Bibele yi vumbiwa hi tibuku to hambana ta 66, ku sukela eka Genesa ku ya fika eka Nhlavutelo.
b Leswaku u kuma swikombiso leswi engetelekeke swa ku pfumelelana ko tano, vona matluka 16-17 ya broxara leyi nge Buku Ya Vanhu Hinkwavo, leyi kandziyisiweke hi Timbhoni ta Yehovha.
c Leswaku u kuma rungula leri engetelekeke vona ndzima 7, leyi nge “Xana Bibele Ya Tikaneta?,” ebukwini leyi nge Bible—I Rito Ra Xikwembu Kumbe I Ra Munhu? leyi kandziyisiweke hi Timbhoni ta Yehovha.
[Xifaniso eka tluka 7]
Xana nguvu ya Yesu a yi ri ya xivunguvungu kumbe ya ribungu?