Leti Humaka Eka Vahlayi

Xana Vukati Byi Nga Tiyisela Xidzedze? (July 2006) Magazini wa Xalamuka! ndza wu hlaya nkarhi ni nkarhi. Ndzi Mukhatoliki, kambe ndzi kume leswaku magazini wa n’wina wa tsakisa naswona wa dyondzisa. Kambe, a ndzi mi twisisi kahle loko mi ku: “Hi 1983, kereke yi olovise milawu ya yona malunghana ni swiboho swa vukati naswona yi endle leswaku swi olova leswaku Makhatoliki ma dlaya vukati.”

G.V.M., Zambia

“Xalamuka!” ya hlamula: A hi kombetela eka ku cinca eka endlelo ra Nawu wa Kereke hi 1983. Ku cinca koloko ku ve kukulu swinene, ngopfu-ngopfu eUnited States. Hi ku ya hi Mark A. Pivarunas, Bixopo wa Rhoma Khatoliki, hi 1968 ntsena vukati bya 338 byi herisiwile eUnited States. Hambiswiritano, hi 1990, nhlayo yoleyo yi engetelekile yi va 62 824. Ha yini ku ve ni ku andza ko tano?

Edward Peters loyi a nga gqweta ra nawu wa kereke, u te: “Ku cinca kun’wana loku vonakaka eka fambiselo ra nawu wa kereke ku endliwe eka malembe lama tlulaka 30 lama hundzeke, i ku cinca loku endleke leswaku swi olova ku kombela ku dlaya vukati naswona ku cinca loku ku endle leswaku swikombelo swo tano swi amukeriwa.” Endzhaku ko tshaha ku cinca ko hlayanyana ka nawu wa kereke, Peters u engetele a ku: “Ku cinca kun’wana ni kun’wana loku endliwaka hi mupapa eRhoma ku hoxe xandla swinene eka ku andza loku hlamarisaka ka ku dlayiwa ka vukati.” Ku nga khathariseki makungu ya kona, vuyelo lebyi veke kona hi ku cinca ka nawu wa kereke—eUnited States ntsena—hilaha “Xalamuka!” yi vuleke hakona: “[Kereke] yi endle leswaku Makhatoliki swi ma olovela ku dlaya vukati.”

Muvumbi—Xana U Kona? (September 2006) Nkandziyiso lowu wo hlawuleka wa Xalamuka! a wu tsariwe hi ndlela ya vutlhari. Mhaka ya kona a yi olova, yi khumba mbilu ni ku twisiseka kahle. Ndzi ri tsakele ngopfu rungula ra kona, laha magazini hinkwawo a wu vulavula hi nhloko-mhaka yin’we wu yi tlhuvutsa hi tindlela to hambana-hambana.

A. B., Spaniya

Ndza mi nkhensa hikwalaho ka magazini lowu wa kahle swinene. Marungula ya kona yo hambana-hambana ni swikombiso swa kona swi dzunisa Yehovha. Swa n’wi fanela ku dzunisiwa hi ndlela yo tano.

R. B., Switzerland

Ndzi khorwisiwile hi vumbhoni lebyi twisisekaka malunghana ni muvumbi. Leswaku dyondzo ya ku tihundzukela ka swilo i vuxisi swi paluxiwe handle ko holovisana kambe swi paluxiwe hi ku tirhisa vutlhari lebyi tirhisiwaka eka sayense.

L. G., Furwa

Va-roma—Malembe Ya Gidi Ya Ntsako Ni Maxangu (October 2006) Minkarhi yo tala Va-roma a a ndzi va twela vusiwana. Khombo ra kona, va nyanye ku vengiwa hi tinxaka tin’wana. Ndza tiyiseka leswaku xihloko xa n’wina xi ta khumba vanhu vo tala. Kunene swa chavelela ku tiva leswaku Yehovha a nga yi hi nghohe nileswaku Va-roma van’wana i vagandzeri vakwe!

B. B., Furwa

Hina hi Va-roma. Tatana a nga si va Mbhoni ya Yehovha, naswona a nga swi rhandzi ku hlaya. Hambiswiritano, a a lava magazini lowu, sweswi ndzi vulavulaka se u na wona!

A. G., Finland