Xana Vugevenga A Bya Ha Lawuleki?

◼ Xichudeni lexi nga nanyangiki kahle emiehleketweni, lexi hlomeke hi swibamu swimbirhi xi yayarehele swichudeni-kulobye ni vadyondzisi laha xi dyondzaka kona.

◼ Xinhwanyatana xa tlhakisiwa, kutani vatswari va xona va sala va ri ni gome leri hlomulaka mbilu.

◼ N’wana un’wana wa kondlo-a-ndzi-dyi u vula leswaku u dlaye munhu leswaku a titwisa leswaku swi njhani ku dlaya, a tlhela a vula leswaku u kombe vanghana ntsumbu wa kona, ivi ku hundza mavhiki va ha tshame hi yona mhaka leyi.

◼ Munhu la pfinyaka vana u tirhisa Internet ku vulavula ni van’wana lava pfinyaka vana, va byelana marhengu lawa va nga ma tirhisaka leswaku va yenga vana.

LEBYI ko va byin’wana bya vugevenga lebyi tsemaka nhlana lebyi hi byi twaka emahungwini masiku lawa. Xana u titwa u sirhelelekile laha u tshamaka kona, ngopfu-ngopfu nivusiku? Xana wena kumbe ndyangu wa wena mi tshama mi humeleriwa hi vugevenga byo karhi? Vanhu va timiliyoni emisaveni hinkwayo—hambi ku ri ematikweni lawa a ma tekiwa ma sirhelelekile—va vula leswaku va tshamela ku chavisiwa hi vugevenga ni madzolonga lama nga kona. Xiya swiviko swo koma swo huma ematikweni yo hambana-hambana.

JAPANI: Asia Times ya vika: “Japani ri tshame ri va tiko leri sirhelelekeke emisaveni . . . Hambiswiritano, nsirhelelo lowu a wu ri kona se ko va norho hikuva sweswi vanhu va vilerisiwa hi vugevenga ni vutherorisi lebyi nga kona emisaveni.”

LATIN AMERIKA: Xiviko xin’wana xa mahungu xa 2006 xi vula leswaku valawuri va le Brazil, va ehleketa leswaku ku nga va ni nyimpi ya xitumbelelana le São Paulo. Presidente wa tiko u vule leswaku ku fanele ku va ni masocha lama rindzaka eswitarateni swa le dorobeni hikwalaho ka madzolonga lawa a ma pfa ma va kona. Le Amerika Xikarhi ni le Mexico, xiviko xin’wana xa phepha-hungu ra Tiempos del Mundo xi te: “Leswi ku nga na kwalomu ka 50 000 wa mintlawa ya swigevenga leswa ha riki vantshwa, sweswo swi endla leswaku valawuri va tshama va veke tihlo hinkwako.” Phepha-hungu leri ri tlhele ri ku: “Hi 2005 ntsena, ku fe vanhu va kwalomu ka 15 000 lava dlayiweke hi mintlawa leyi ya swigevenga leswa ha riki vantshwa le El Salvador, eHonduras ni le Guatemala.”

CANADA: Hi 2006 phepha-hungu ra USA Today ri te: “Vakambisisi va ta vugevenga va vula leswaku ku ni ku andza ka mintlawa ya swigevenga. Maphorisa . . . ma kume leswaku ku ni mintlawa ya 73 ya swigevenga le Toronto.” Phepha-hungu rolero ri vule leswaku ndhuna ya maphorisa le Toronto yi pfumerile leswaku a swi nge olovi ku tlhantlha xiphiqo lexi andzaka xa mintlawa ya swigevenga leswi nga emadorobeni.

AFRIKA DZONGA: Patrick Burton, mukongomisi wa vanhu lava endlaka ndzavisiso hi vugevenga, u vule leswi landzelaka eka phepha-hungu ra Financial Mail: “Swiboho leswi vantshwa va le Afrika Dzonga va swi endlaka, va swi endla va ri karhi va chava vugevenga.” Phepha-hungu rolero ri vula leswaku sweswo swi katsa “vugevenga lebyikulu byo tanihi ku tekeriwa swilo swa wena hi xigevenga, ku tekeriwa movha ni ku yiviwa ka mali ebanki hi swigevenga leswi hlomeke.”

FURWA: Vanhu vo tala lava tshamaka etifuleteni, va tshama va ri eku chaveni siku ni siku loko va ri karhi “va khandziya switepisi leswi onhiweke, loko va nghena laha ku pakiwaka kona timovha laha swi nga ni khombo ku nghena kona ni loko va tirhisa swo famba swa mani na mani leswi nga ni khombo loko se ri phumerile.”—Guardian Weekly.

UNITED STATES: Mintlawa ya swigevenga yi nyanyise vugevenga. Hi ku ya hi xiviko xa magazini wa The New York Times, exifundzheni xin’wana nkambisiso wa maphorisa wu vula leswaku eka xifundzha xin’wana, ku ni mintlawa ya swigevenga ya 700 naswona kwalomu ka vantshwa va vafana ni vanhwanyana va 17 000 va wela eka yin’wana ya mintlawa leyi. Mintlawa leyi yi va yi kume swirho swintshwa swa kwalomu ka 10 000 hi malembe ya mune ntsena.

BRITAIN: Malunghana ni xiviko xa UNICEF lexi vulavulaka hi vuyelo lebyi vugevenga byi vaka na byona eka vana, The Times ya le London yi te: “Vantshwa vo tala va le Britain va duvuriwa va fa. . . . Lava va duvuriwaka ni lava va duvulaka i vana lavatsongo swinene.” Vabohiwa lava nga le makhotsweni ya le Nghilandhi ni le Wales va andze va va kwalomu ka 80 000.

KENYA: Xiviko xin’wana xa mahungu xi vula leswaku manana un’wana ni n’wana wa yena wa nhwanyana va duvuriwile hi swigevenga epatwini lerikulu leri teleke timovha hi leswi va hlweleke ku huma emovheni. Le Nairobi, entsindza wa Kenya ku dume hileswaku ku ni mixaka hinkwayo ya vugevenga, ku katsa ni ku tekeriwa timovha, ku tekeriwa swilo ni ku hlaseriwa ekaya.

Xana vugevenga a bya ha lawuleki? I yini lexi vangaka vugevenga? Naswona xana hi nga va ni ntshembo wa leswaku siku rin’wana vanhu va ta kota ku hanya hi ku rhula ka xiviri naswona va sirhelelekile? Swihloko leswi landzelaka swi ta hlamula swivutiso leswi.