Ku Nga Ri Khale Vugevenga A Byi “Nge He Vi Kona”

“Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona..”—PISALEMA 37:10.

YEHOVHA XIKWEMBU, Muvumbi wa hina wa khathala swinene hi vanhu; a hi xifamona hilaha vanhu van’wana va anakanyaka hakona. (Pisalema 11:4, 5) Ku tlula kwalaho, u vona vugevenga ni vuhomboloki hinkwabyo ku katsa ni lebyi vanhu va nga byi voniki. “Mahlo ya Yehovha ma le ndhawini yin’wana ni yin’wana, ma tshama ma langute lavo biha ni lavanene.” (Swivuriso 15:3) Hikwalaho, u nga tiyiseka leswaku lavo homboloka va le ‘ndhawini leyi rhetaka’ hakunene.—Pisalema 73:12, 18.

Hambiswiritano, vanhu lava pfumalaka xisandzu ni lava nga ni mahanyelo lamanene, hambiloko va ri swisiwana kumbe va khomiwa hi ndlela yo biha hi van’wana, va ni ntshembo lowunene ngopfu. Mupisalema Davhida u tsarile: “Languta la pfumalaka xisandzu naswona u vona la lulameke, hikuva vumundzuku bya munhu yoloye byi ta va ni ku rhula.” (Pisalema 37:37) Marito wolawo ma nga hi chavelela swinene namuntlha, hikuva hi ni ntshembo wo ma vona ma hetiseka emisaveni hinkwayo ku nga ri khale.

Hi Hanya eMasikwini Yo Hetelela

Kwalomu ka malembe ya 2 000 lama hundzeke, vadyondzisiwa va Yesu Kreste va n’wi vutise xivutiso lexi a xi ta teka nkarhi wo leha xi nga si hlamuleka. Va te: “Hi byele, . . . xi ta va xihi xikombiso xa . . . makumu ya mafambiselo ya swilo?” (Matewu 24:3) Vuxokoxoko bya nhlamulo ya Yesu byi kumeka eBibeleni eka ndzima 24 ya Matewu, ndzima 13 ya Marka ni le ka ndzima 21 ya Luka. Tievhangeli letinharhu ti hlamusela masiku yo hetelela ya misava leyi tanihi lama nga ta va ni tinyimpi, tindlala, mavabyi, ku tsekatseka ka misava lokukulu ni ku andza lokukulu ka ku kala nawu.

Swiyimo swo nonon’hwa leswi Yesu a profeteke ha swona swi sungule hi 1914. Hi lembe-xidzana ra vu-20 “ku halatiwe ngati yo tala swinene ematin’wini,” hilaha n’wamatimu Eric Hobsbawm a vulaka hakona ebukwini ya yena leyi nge Age of Extremes.

Malunghana ni ku andza ka vuhomboloki, Bibele yi vula leswi: “Loko lavo homboloka va hluka ku fana ni ximila ni vanhu hinkwavo lava hanyaka hi swo biha va rhumbuka, va swi endlela leswaku va ta loviseriwa makumu.” (Pisalema 92:7) Ina, vumbhoni byi le rivaleni: Entiyisweni ku nyanya ka vuhomboloki i xikombiso xa leswaku ku lovisiwa ka lavo homboloka ku tshinele. Wolawo i mahungu lamanene hakunene!—2 Petro 3:7.

“Lavo Lulama Va Ta Dya Ndzhaka Ya Misava”

Pisalema 37:29 yi ri: “Lavo lulama va ta dya ndzhaka ya misava, va ta tshama eka yona hi masiku.” Hikwalaho, swilo hinkwaswo swo sivela vugevenga swi ta va swi nga ha ri kona: tialamu leti nga emiakweni, tiloko, tihuvo, magqweta, maphorisa ni makhotso. Bibele ya tshembisa: “Swilo swo sungula a swi nge tsundzukiwi, hambi embilwini a swi nge ti.”—Esaya 65:17.

Ina, misava ni vanhu va ta hundzuriwa hi ndlela leyi nga si tshamaka yi endleka. (Esaya 11:9; 2 Petro 3:13) Wolowo i ntshembo lowu tiyeke lowu Timbhoni ta Yehovha ti nga na wona, naswona ta ku rhamba leswaku u ta tivonela hi ya wena leswaku ku nga ri khale swilo sweswo swi ta endleka. Tsundzuka leswaku Loyi a huhuteleke Matsalwa yo Kwetsima ‘a nge hembi.’—Tito 1:2.

[Bokisi/Xifaniso eka tluka 9]

KU PFUNA VABOHIWA HI TLHELO RA MOYA

Timbhoni ta Yehovha le United States se ti ni malembe yo tala ti ri karhi ti chumayela vabohiwa eka makhotso ya 4 169, eswibedlhele ni le tindhawini to pfuna vanhu ku tshika swidzidzirisi. Vabohiwa van’wana va tsala mapapila va kombela ku rhumeriwa tibuku leti sekeriweke eBibeleni; van’wana va kombela dyondzo ya mahala ya Bibele. Timbhoni leti fanelekaka ti ya eka vanhu lava endleke swikombelo leswi. Entiyisweni, Timbhoni emisaveni hinkwayo nkarhi ni nkarhi ti endzela emakhotsweni ti ya dyondza Bibele ni vabohiwa, va xinuna ni va xisati, lava lavaka ku pfuniwa hi tlhelo ra moya. Vo tala va vabohiwa lava va cince vutomi bya vona hi ndlela yo hlamarisa, va khuvuriwile va va Vakreste, naswona va hambete va hanya hi ku landza nawu.