Ndlela Leyi Thekinoloji Yi Hangalakeke Ha Yona

LE Albania swi tolovelekile ku vona munhu lonkulu a gade mbhongolo a ri karhi a vulavula hi selfoni. Kasi eIndiya, munhu la kombelaka mali emagondzweni a nga ha yimanyana leswaku a fonela un’wana kumbe a hlamula selfoni. Switirhisiwa swa thekinoloji swo fana ni tiselfoni, tikhompyuta ni tithelevhixini swi tele ngopfu ematikweni hinkwawo naswona swi tirhisiwa hi vanhu vo tala, ku nga ri swigwili ntsena kambe ni swisiwana.

Ku andza lokukulu ka thekinoloji ku nga ha vonaka ngopfu eka ndlela leyi tiselfoni ti hangalakeke hi ku hatlisa ha yona, leti tin’wana ta tona ti nga ha tirhiseriwiki ku fona ntsena. Tiselfoni ta manguva lawa ti endla leswaku vanhu va kota ku nghena eka Internet, va rhumela ni ku amukela ti-e-mail ni ti-SMS, va hlalela TV, va yingisela vuyimbeleri, va teka swifaniso ni ku va komba ndlela loko va ya etindhawini leti va nga ti tiviki hi ku tirhisa progreme leyi vuriwaka Global Positioning System (GPS) swin’we ni ku fonela vanhu.

Hi ku ya hi xiviko lexi humesiweke hi phepha-hungu ra Washington Post, tiselfoni ta manguva lawa leti nga ni tiprogreme ta khompyuta leti kotaka ku tlanga vuyimbeleri, tivhidiyo ni ku teka swifaniso “sweswi ti kota ku endla swilo hi ku hatlisa ku tlula Tikhompyuta ta Vuthu ra le Moyeni ra Amerika N’walungu ra hi 1965.” Phepha-hungu rero ri tlhele ri ku: “Sweswi ku ni tiselfoni leti ringanaka hafu ya vaaki hinkwavo lava nga kona eMisaveni,” naswona ematikweni ya kwalomu ka 30 ku ni tiselfoni to tala ku tlula nhlayo ya vaaka-tiko. Hilaha phepha-hungu rero ri vulaka hakona, ku ni ku “andza lokukulu ka switirhisiwa swa thekinoloji emisaveni hinkwayo loku nga si tshamaka ku va kona ematin’wini ya vanhu.”

Emisaveni hinkwayo, kwalomu ka 60 wa tiphesente ta vanhu lava nga ni tiselfoni va tshama ematikweni lama ha hluvukaka, leswi endlaka leswaku selfoni yi va xitirhisiwa xa thekinoloji lexi tirhisiwaka hi vanhu vo tala ematikweni wolawo. Hi xikombiso, hi 2008 le Afghanistan vanhu lava tirhisaka tiselfoni va engeteleke hi nhlayo ya kwalomu ka 140 000 hi n’hweti, kasi emalembeni ya sweswinyana laha Afrika nhlayo ya vanhu lava tirhisaka tiselfoni yi andza hi tiphesente ta kwalomu ka 50 hi lembe.

Hambiswiritano, nhluvuko ni ku andza ka switirhisiwa swo vulavurisana ha swona swa thekinoloji swi ni swiphiqo swa swona. Vanhu lava nga ni tiselfoni, swiciyoti ni tikhompyuta leti vuriwaka ti-laptop u nga vulavurisana na vona nkarhi wun’wana ni wun’wana naswona swi endla leswaku va vona onge a va nge hanyi handle ka switirhisiwa sweswo. Kasi lexi vavisaka ngopfu hileswi vanhu va gondzomberiwaka hi switirhisiwa swa thekinoloji, leswi endlaka leswaku va va ni ku navela lokukulu ko tshamela ku swi tirhisa leswaku va ta tiva leswi endlekaka.

Kumbexana swiphiqo swin’wana leswi tolovelekeke ngopfu leswi fambisanaka ni switirhisiwa swo vulavurisana ha swona ni swihaxa-mahungu i ku godzombela vanhu, ku va rivata ni ku va kavanyeta.a Kambe switirhisiwa leswi swa vuyerisa swinene. Kutani, xana u nga swi tirhisa njhani hi ndlela leyinene ni leyi kombisaka ku anakanyela van’wana? Swihloko leswi landzelaka swi tlhuvutsa xivutiso lexi.

[Nhlamuselo ya le hansi]