Bokisi Ra Swivutiso

◼ Hi yihi milawu ya Bibele leyi faneleke yi landzeriwa malunghana ni ku tirhisa selfoni loko hi ri eminhlanganweni ya Vukreste ni le nsin’wini?

“Xin’wana Ni Xin’wana Xi Ni Nkarhi Wa Xona Lowu Vekiweke.” (Ekl. 3:1): Tiselfoni ti endla leswaku vanhu va kota ku rhumela marungula kumbe ku vulavula ni vanhu van’wana nkarhi wun’wana ni wun’wana. Hambiswiritano, ku ni minkarhi leyi Vakreste va nga swi laviki leswaku tiselfoni ta vona ti va kavanyeta. Hi xikombiso, minhlangano ya hina i nkarhi wa ku gandzela Yehovha, ku kuma swiletelo hi tlhelo ra moya ni ku va hi tsakela tinkulumo leti hi khutazaka. (Det. 31:12; Ps. 22:22; Rhom. 1:11, 12) Xana hi nga tima tiselfoni ta hina loko hi fika eminhlanganweni ivi hi hlaya marungula lawa hi rhumeriweke wona endzhaku yona? Loko ku ri ni xiyimo xa xihatla lexi lavaka leswaku hi tshika tiselfoni ta hina ti nga timiwanga, hi fanele hi ti endla ti rhurhumela kunene.

“Endla Swilo Hinkwaswo Hikwalaho Ka Mahungu Lamanene.” (1 Kor. 9:23): Minkarhi yin’wana hi ni xivangelo lexi twalaka lexi hi endlaka hi lava ku tirhisa tiselfoni ensin’wini. Hi xikombiso, makwerhu la ungamelaka nsimu a nga ha yi tirhisa leswaku a kamba lava tirhaka eka xiphemu lexin’wana xa nsimu. Minkarhi yin’wana vahuweleri va tirhisa tiselfoni ta vona leswaku va fonela munhu la tsakelaka kumbe xichudeni xa Bibele loko va nga si n’wi endzela, ngopfu-ngopfu loko munhu wa kona a tshama ekule. Loko hi ri ni tiselfoni, hi fanele hi tivonela leswaku ti nga hi kavanyeti loko hi ri karhi hi vulavula ni n’wini wa muti. (2 Kor. 6:3) Ematshan’weni yo va hi fona kumbe hi rhumela vanghana marungula loko hi rindzele vahuweleri lavan’wana, xana a swi nge vi swinene ku dzikisa mianakanyo ya hina eka nsimu ni le ka lava hi tirhaka vona?

Anakanyela Van’wana. (1 Kor. 10:24; Filp. 2:4): A hi swi lavi ku yi tekela ehansi mhaka ya leswaku hi fanele hi va enhlanganweni wa nsimu hi nkarhi hikwalaho ka leswi hi anakanyaka leswaku minkarhi hinkwayo hi ta fona kumbe ku rhumela un’wana la nga ensin’wini marungula leswaku a hi byela lomu ntlawa wu chumayelaka kona. Loko hi nga fiki hi nkarhi, hakanyingi ntlawa wu tlhela wu aviwa. I ntiyiso leswaku minkarhi yin’wana swiyimo swi nga endla leswaku hi nga fiki hi nkarhi. Hambiswiritano, loko hi swi endla mukhuva ku fika hi nkarhi, hi va hi kombisa ku anakanyela lunghiselelo ra Yehovha, makwerhu la ungamelaka ni vahuweleri-kulorhi.