Bokisi Ra Swivutiso

◼ Hi fanele hi tsundzuka yini loko hi tirhisa tinqingho ta le nyongeni ni swiciyoti?

Swilo swo tano swi nga hi pfuna ku vulavula ni vanhu van’wana ku nga khathariseki lomu hi nga kona. Hambiloko tinqingho ta le nyongeni ni swiciyoti swi pfuna, hi fanele hi tivonela leswaku hi nga swi tirhisi hi minkarhi leyi swi nga kavanyetaka ntirho wa hina wa nsimu kumbe minhlangano ya Vukreste. Xana sweswo swi nga endlekisa ku yini?

Anakanya hi vuyelo lebyi nga vaka kona loko ku rila riqingho ra le nyongeni kumbe xiciyoti loko hi ri eku chumayeleni ensin’wini. Xana n’wini wa muti a nga ehleketa yini? Xana hi ta siya n’wini wa muti a ehleketa yini loko hi tshika ku vulavula na yena ivi hi hlamula riqingho kumbe xiciyoti? Hakunene a hi swi lavi ku endla nchumu hambi wu nga va wihi lowu nga sivelaka van’wana ku twa rungula ra Mfumo. (2 Kor. 6:3) Hikwalaho, loko hi ri ni riqingho ra le nyongeni kumbe xiciyoti, hi fanele hi tiyiseka leswaku swi nga hi kavanyeti kumbe ku kavanyeta van’wana entirhweni wa nsimu.

Ku vuriwa yini loko hi yimele van’wana lava ha chumayelaka? Loko ku ri nkarhi lowu hi wu vekeleke ntirho wa nsimu, xana a hi fanelanga hi dzikisa mianakanyo ya hina eka ntirho wolowo? Kombisa leswaku u xixima ntirho wo kwetsima hi ku vonana ni timhaka ta mabindzu kumbe ta munhu hi xiyexe leti nga riki ta nkoka, hi nkarhi wun’wana. (Rhom. 12:7) Kambe sweswo a swi katsi ku tirhisa riqingho loko u chumayela kumbe ku hlela nkarhi ni munhu loyi u nga ta ya u ya chumayela eka yena.

Hi fanele hi tivonela swinene eku tirhiseni ka tinqingho ta le nyongeni loko hi ri eku chayeleni, tanihi leswi minkambisiso yin’wana yi kombisaka leswaku sweswo swi vanga timhangu to tala ta le mapatwini. EAfrika Dzonga a swi pfumeleriwi ku tirhisa riqingho ra le nyongeni loko u chayela, handle ka loko u vulavula u nga ri khomanga hi voko. Hi fanele hi wu yingisa swinene nawu lowu.

Xikongomelo xa ku ya eminhlanganweni ya Vukreste, etinhlengeletanweni ni le mintsombanweni i ku ya gandzela Yehovha ni ku dyondzisiwa hi yena. Xana ku tlangela ka hina minhlangano leyi yo kwetsima a ku fanelanga ku hi susumetela ku endla leswaku tinqingho ta le nyongeni ni swiciyoti swi nga hi kavanyeti kumbe swi kavanyeta van’wana? Loko ku ri ni mhaka ya xihatla leyi hi faneleke hi yi tamela hi ku hatlisa, hi fanele hi ya yi tamela ehandle. Loko swi nga ri tano, hi fanele hi tamela timhaka ta munhu hi xiyexe ni ta ntirho wa ku tihanyisa hi minkarhi yin’wana leyi nga vekeriwangiki vugandzeri bya hina.—1 Kor. 10:24.

Onge ndlela leyi hi tirhisaka tinqingho ta le nyongeni ni swiciyoti ha yona yi nga kombisa minkarhi hinkwayo leswaku ha va anakanyela vanhu van’wana naswona hi tlangela swilo swa moya.