Lava Mpfuno

“Loko munhu wo karhi o hlula un’we a ri yexe, vambirhi va nga n’wi hlula.”—Eklesiasta 4:12.

LOKO hi seketeriwa hi van’wana, hi nga swi kota ku hlula nala wihi na wihi. Kutani loko u lava ku tshika ku dzaha, u ta va u tlharihile loko u kombela mpfuno eka swirho swa ndyangu wa wena ni vanghana va wena, kumbe munhu wihi na wihi la nga ta ku seketela hi mbilu hinkwayo ni ku ku lehisela mbilu.

Kombela mpfuno ni le ka lava tshikeke ku dzaha hikuva va nga ha ku twela-vusiwana va tlhela va ku pfuna. Torben, Mukreste un’wana wa le Denmark u te: “Nseketelo wa van’wana wu ndzi pfune swinene.” Abraham, la tshamaka le India, u tsale a ku: “Rirhandzu ra xiviri leri ndzi kombisiweke rona hi swirho swa ndyangu wa mina ni Vakreste-kulorhi ri ndzi pfune ku tshika ku dzaha.” Kambe minkarhi yin’wana hambi ku ri mpfuno wa swirho swa ndyangu ni vanghana a wu enelanga.

Wanuna un’wana la vuriwaka Bhagwandas u te: “Ndzi dzahe fole ku ringana malembe ya 27, kambe hikwalaho ko dyondza leswi Bibele yi swi vulaka malunghana ni mikhuva leyi thyakeke, ndzi teke xiboho xo ri tshika. Ndzi ringete ku hunguta mpimo wa fole leri a ndzi ri dzaha. Ndzi papalate vanghana va mina. Ndzi ye ndzi ya lava mpfuno eka vatsundzuxi va vanhu lava lavaka ku tshika ku dzaha. Ku hava lexi ndzi pfuneke. Eku heteleleni, siku rin’wana nivusiku ndzi khongele eka Yehovha Xikwembu ndzi n’wi kombela leswaku a ndzi pfuna ndzi tshika ku dzaha. Kutani ndzi hetelele ndzi tshikile!”

Nchumu wun’wana wa nkoka lowu u nga wu endlaka i ku tilunghiselela ku langutana ni mintlhontlho ya ku tshika ku dzaha. Hi yihi mintlhontlho ya kona? Xihloko lexi landzelaka xi ta yi hlamusela.

[Bokisi leri nga eka tluka 5]

XANA U FANELE U TIRHISA MIRHI LEYI PFUNAKA KU TSHIKA KU DZAHA?

Tikhampani leti xavisaka mirhi leyi pfunaka ku tshika ku dzaha, yo fana ni xinamarheti lexi nga ni nikhothini lexi namarhetiwaka emirini, ti endla magidi-gidi ya tibiliyoni ta tirhandi. Loko u nga si endla xiboho xo tirhisa mirhi yoleyo, kambisisa swivutiso leswi landzelaka:

Hi byihi vuyelo bya kona? Ku vuriwa leswaku mirhi yo tala yi ku endla u nga swi naveli ngopfu ku dzaha, xisweswo yi ku olovisela ku tshika ku dzaha. Hambiswiritano, ku ni ku kanetana malunghana ni loko yi swi kota ku ku pfuna ku ringana nkarhi wo leha.

Hi wahi makhombo ya kona? Mirhi yin’wana yi nga ku vangela swiphiqo swin’wana swo fana ni ku hlamba timbilu, ku tshikileleka ni ku ehleketa ku ti dlaya. Nakambe tsundzuka leswaku mirhi leyi tirhisiwaka ku ku pfuna u tshika ku dzaha yo va ndlela yin’wana ya ku ku nyika xidzidziharisi xexo xa nikhothini naswona yi ni makhombo man’wana ya rihanyo. Entiyisweni, munhu loyi a tirhisaka mirhi yoleyo wa ha godzomberiwile.

Hi tihi tindlela tin’wana leti nga ku pfunaka ku tshika? Eka nkambisiso wun’wana vanhu lava endlaka tiphesente ta 88 lava tshikeke ku dzaha va vule leswaku va nambe va tshika handle ko pfuniwa hi swidzidziharisi.