U Nga Swi Kota Ku Tshika Ku Dzaha!

NKARHI wu fikile wa leswaku ‘u va ni xivindzi kutani u teka goza.’ (1 Tikronika 28:10) Hi wahi magoza yo hetelela lawa u nga ma tekaka lama nga ku oloviselaka ku tshika ku dzaha?

Veka siku. Ndzawulo ya Rihanyo ni Vukorhokeri bya Vanhu ya le United States yi khutaza leswaku endzhaku ka loko u tibyele leswaku u lava ku tshika ku dzaha, u fanele u veka siku leri u nga ta tshika ha rona ku nga si hela mavhiki mambirhi. Loko u endla tano, u ta tiyimisela swinene ku tshika ku dzaha. Fungha siku rero eka khalendara ya wena, byela vanghana va wena naswona u nga ri cinci hambiloko swiyimo swa wena swo cinca.

Tshama u ri ni khadi leri nga ni rungula leri nga ta ku pfuna ku tshika ku dzaha. Ri nga ha va ni rungula leri landzelaka ni swin’wana leswi nga ta tiyisa ku tiyimisela ka wena:

● Swivangelo swa wena swo lava ku tshika

● Tinomboro ta riqingho ta vanhu lava u nga ha va fonelaka loko u titwa onge u lava ku dzaha

● Marito—kumbexana tindzimana ta Bibele to fana ni Vagalatiya 5:22, 23—lama nga ta ku pfuna ku fikelela pakani ya wena

Minkarhi hinkwayo tshama u ri ni khadi rolero naswona ri hlaye ko hlayanyana hi siku. Hambiloko se u tshike ku dzaha, hambeta u pfuxeta rungula leri nga eka rona nkarhi wun’wana ni wun’wana loko u twa u navela ku dzaha.

Tshika swin’wana leswi fambisanaka ni ku dzaha. Loko ri nga si fika siku leri u nga ta tshika ku dzaha ha rona, sungula ku tshika mikhuva yihi na yihi leyi fambisanaka ni ku dzaha. Hi xikombiso, loko u tolovele ku dzaha mpundzu wun’wana ni wun’wana loko wa ha ku pfuka, tshama u nga dzahi ku ringana awara kumbe ku tlula. Loko u dzaha loko u ri karhi u dya kumbe loko u heta, papalata mukhuva wolowo. Papalata ku ya etindhawini leti van’wana va dzahaka eka tona. Naswona titolovete ku vula marito lawa exihundlheni hi rito leri tlakukeke: “Ndza nkhensa. Se a ndza ha dzahi.” Magoza lawa ma ta ku pfuna swinene ku tilunghiselela siku leri u nga ta tshika ku dzaha ha rona. Ma ta tlhela ma ku tsundzuxa leswaku ku nga ri khale u ta tshika ku dzaha hi ku helela.

Tilunghiselele ku tshika ku dzaha. Loko siku leri u nga ta tshika ha rona ku dzaha ri ri karhi ri tshinela, xava swilo leswi u nga ta swi dya loko u navela ku dzaha: tichungama, timanga ni swin’wana. Tsundzuxa vanghana ni swirho swa ndyangu hi siku ra wena leri u nga ta tshika ku dzaha ha rona ni ndlela leyi va nga ku seketelaka ha yona. Emahlweninyana ka siku rero, cukumeta swilo swo chela switompi swa fole, swo lumeka ha swona ni swilo swihi na swihi leswi nga ku ringaka leswaku u dzaha, swo fana ni fole leri nga endlwini, emovheni, eswikhwameni, kumbe entirhweni. Phela swa tika ku kombela fole eka munghana kumbe ku xava phakete ra fole ku tlula ku pfula dirowara u ri teka! Nakambe hambeta u khongela hi mbilu hinkwayo eka Xikwembu u kombela leswaku xi ku pfuna, ngopfu-ngopfu endzhaku ka loko siku leri u tivekeleke rona se ri fikile.—Luka 11:13.

Vanhu va ntsandza-vahlayi va herise vuxaka ni munhu loyi a tshameke a va munghana wa vona wo biha ni la nga ni nsele, ku nga fole. Na wena u nga swi kota. Ku nga ri khale u ta va ni rihanyo lerinene ni ntshunxeko lowukulu.

[Xifaniso lexi nga eka tluka 9]

Minkarhi hinkwayo tshama u ri ni khadi leri nga ni rungula leri nga ta ku pfuna ku tshika ku dzaha naswona tshamela ku ri hlaya siku hinkwaro