Ha Yini—Vanhu Vo Tala Va Tlangela Khisimusi?

XANA u yi langutela hi mahlo-ngati Khisimusi kumbe yi ku endla u karhateka swinene? Vanhu va timiliyoni va tivutisa swivutiso leswi: ‘I vamani lava ndzi nga ta va xavela tinyiko? I yini lexi ndzi nga ta xi xava? Xana ndzi na yona mali yo xi xava? Swi ta teka nkarhi wo leha ku fikela kwihi ku va ndzi hakela xikweleti xa mina?’

Khisimusi yi rhandziwa swinene ku nga khathariseki ku karhateka koloko loku vanhu va vaka na kona. Entiyisweni, ku tlangela Khisimusi swi endliwa ni le matikweni lama vanhu va kona va nga riki Vakreste. Le Japani, mindyangu yo tala se yi tlangela Khisimusi ku nga ri hikwalaho ka leswi yi nga ya vukhongeri, kambe hileswi yi nga xiendlakalo lexi tsakisaka. Phepha-hungu ra The Wall Street Journal, ri vula leswaku le Chayina “xikandza xo tshwuka xa Tatana wa Khisimusi xi tsariwa emafasitereni ya switolo swa le madorobeni lamakulu,” naswona ri tlhele ri vula leswaku “vanhu lava hluvukekenyana le Chayina va sungula ku tlangela Khisimusi hi xikongomelo xo lava ku tixavela swilo, ku dya ni ku tiphina.”

Ematikweni yo tala emisaveni, ku tlangela Khisimusi swi nghenisela mabindzu ya kwalaho mali yo tala. Phepha-hungu rero ri vula leswaku sweswo i ntiyiso ngopfu-ngopfu etikweni ra Chayina, leri sweswi ri “rhumelaka ngopfu misinya ya tipulastiki, swintambyana swo hatima swa phepha, mavoni yo tsayitela ni swilo swin’wana swo khavisa swa Khisimusi.”

Matiko lawa ma lawuriwaka ngopfu hi vukhongeri bya Vumoslem ma khutaza minkhuvo leyi fanaka ni Khisimusi, hambileswi va nga yi endliki hi December 25. Edorobeni ra Ankara, le Turkey ni ra Beirut le Lebanon, swi tolovelekile ku vona mafasitere ya xitolo ma khavisiwe hi swintambyana swo hatima swa phepha swi hayekiwe emisinyeni ya rihlaza ni swiputsa swa tinyiko leswi phutseriweke kahle. Etikweni ra Indonesia, tihotela ni switolo leswikulu swi hakelela minkhuvo yo tlangela Khisimusi, naswona vana va nga dya swakudya ni Tatana wa Khisimusi kumbe va teka swinepe na yena.

Magazini wa Royal Bank Letter wa le Canada wu vula leswaku ematikweni yo tala, Khisimusi se yi dzike ngopfu eka vanhu lava nga riki vapfumeri ni le ka mabindzu naswona yi ni swinavetisi swo tala leswi “kongomisiweke eka vana.” I ntiyiso leswaku vanhu van’wana va ha ya etikerekeni leswaku va ya tlangela Khisimusi. Kambe switolo leswikulu se swi hundzuke titempele letintshwa hileswi swi chayaka tinsimu ta vukhongeri leti fambisanaka ni Khisimusi. Ha yini swilo se swi cincile? Xana xivangelo xa kona xi fambisana ni masungulo ya Khisimusi? Xana Khisimusi yi sungule kwihi?

Ku nga se hlamuriwa swivutiso leswi, swi nga va swinene ku hlaya rungula ra Bibele leri vulavulaka hi ku velekiwa ka Yesu.

[Bokisi/Xifaniso lexi nga eka tluka 4]

LESWI VATSARI VA TIEVHANGELI VA SWI VULAKA

Muapostola Matewu: “Endzhaku ka loko Yesu a velekiwile eBetlehema wa Yudiya emasikwini ya Heroda lowa hosi, waswivo, vangoma va swilo swa le mpfhukeni lava humaka etindhawini ta le vuxeni va ta eYerusalema, va ku: ‘U kwihi loyi a nga velekeriwa ku va hosi ya Vayuda? Hikuva hi vone nyeleti ya yena loko hi ri evuxeni, kutani hi tele ku ta n’wi nkhinsamela.’ Loko Hosi Heroda a twa leswi, a karhateka.” Hiloko Heroda a vutisa “vaprista lavakulu . . . laha Kreste a a ta velekeriwa kona.” Loko a kume leswaku a a ta velekeriwa “eBetlehema,” Heroda u byele vangoma va swilo swa le mpfhukeni a ku: “Fambani mi ya lava n’wana lontsongo hi vukheta, naswona mi vuya mi ta ndzi vikela loko mi n’wi kumile.”

Hiloko “va khoma ndlela; kutani waswivo, va rhangeriwa hi nyeleti leyi va yi voneke loko va ri evuxeni, yi fika yi yima ehenhla ka laha n’wana lontsongo a a ri kona. . . . Loko va nghena endlwini, va vona n’wana lontsongo a ri na Mariya mana wakwe.” Endzhaku ko nyika Yesu tinyiko, “va [lemukisiwile] enorhweni leswaku va nga vuyeli eka Heroda, [kutani] va [tlhelele] etikweni ra vona hi ndlela yin’wana.”

“Loko va tlherile, waswivo, ntsumi ya Yehovha yi humelela hi norho eka Yosefa, yi ku: ‘Pfuka, teka n’wana lontsongo ni mana wakwe u balekela aEgipta . . . ’ Kutani a pfuka, a teka n’wana lontsongo ni mana wakwe nivusiku, a suka . . . Kutani Heroda, loko a vona leswaku vangoma va swilo swa le mpfhukeni va n’wi tlhariherile, a fikeriwa hi vukarhi lebyikulu, kutani a lerisa leswaku ku ya dlayiwa vana hinkwavo va vafana eBetlehema ni le migangeni hinkwayo ya wona, lava sukelaka eka malembe mambirhi hi vukhale ku ya ehansi.”—Matewu 2:1-16.

Mudyondzisiwa Luka: Yosefa “u tlhandluke a huma eGaleliya, a suka emutini wa Nazareta, a nghena eYudiya, emutini wa Davhida, lowu vuriwaka Betlehema, . . . leswaku a ya tsarisiwa na Mariya . . . Loko va ri kwalaho, . . . a veleka n’wana wakwe wa jaha, wa mativula, a n’wi phutsela hi malapi ya tinguvu ivi a n’wi lata exidyelweni, hikuva a va nga ri na ndhawu ekamareni ra vapfhumba.”

“Nakambe etikweni rolero a ku ri ni varisi lava a va tshama ehandle ka muti, va rindza mintlhambi ya vona nivusiku. Kutani hi xitshuketa ntsumi ya Yehovha yi yima ekusuhi na vona, . . . va chava ngopfu. Kambe ntsumi yi ku eka vona: ‘Mi nga chavi, hikuva, maswivo, ndzi mi byela mahungu lamanene ya ntsako lowukulu lowu vanhu hinkwavo va nga ta va na wona, hikuva namuntlha mi velekeriwe Muponisi, loyi a nga Kreste Hosi, emutini wa Davhida.’” Hiloko varisi “va hatlisa va ya kona kutani va kuma Mariya swin’we na Yosefa, ni ricece ri etlele exidyelweni.”—Luka 2:4-16.