Ku Etlela Ha Yini Swi Ri Swa Nkoka?

● Hi xiringaniso vulavisisi lebyi bya ha ku endliwaka eAmerika N’walungu, byi kombisa leswaku vanhu va etlela tiawara ta nkombo va titsona awara yin’we ya vurhongo.a Ha yini ku etlela swi ri swa nkoka? Loko u etlele ku ni swiyenge leswi u hundzuka eka swona vusiku hinkwabyo swo tanihi lexi vuriwaka ku rhendzelaka ka ndzololo ya tihlo eka timinete tin’wana ni tin’wana ta 60 ku ya eka 90. Hi nkarhi wolowo, byongo byi va byi tirha ngopfu, naswona valavisisi va tshemba leswaku byi va byi ri karhi byi tsundzuka leswi humeleleke. Vatshila van’wana va vula leswaku loko xiyenge xexo xi kavanyetiwa, munhu u heleriwa hi vurhongo naswona sweswo swi nga vanga vuvabyi byo karhi emirini. Matirhelo ya byongo ma kavanyeteka, leswi endlaka leswaku byi nga tirhi kahle naswona swi vanga mavabyi yo tala emirini.

Swilo swo tanihi khafeyini, swi nga endla leswaku munhu a nga khomiwi hi vurhongo swa xinkarhana. Hambiswiritano, byongo bya hina byi nga swi kota ku endla leswaku munhu a etlela loko a nga etlelanga nkarhi lowu eneleke, leswi endlaka leswaku a khudzehela. Phepha-hungu ra The Toronto Star ri ri, “ku nga khathariseki leswaku u endla yini, vurhongo lebyi u byi kolotaka byi ta ku karhata ivi nkarhi ni nkarhi byi endla leswaku u khudzehela tisekoni tin’wana ni tin’wana ta khume naswona u jovota minete yin’wana ni yin’wana.” A hi nge u chayela movha hi 50 wa tikhilomitara hi awara ivi u sungula ku khudzehela. Hi nkarhi wolowo u ta va u fambe mpfhuka lowu tlulaka rivala ra mintlango ya bolo. Ku engetela kwalaho, loko u nga etleli nkarhi lowu ringaneke swi nga ha endla leswaku masocha ya miri ma nga tirhi kahle, hikuva loko u etlele, miri wu humesa tisele leti vuriwaka ti-T leti lwaka ni switsongwatsongwana. Nakambe loko hi etlele mimiri ya hina yi humesa homoni leyi vuriwaka leptin leyi endlaka leswaku hi tsakela swakudya. Hakunene hi fanele hi etlela nkarhi lowu eneleke ku fana niloko hi endla vutiolori ni ku dya hi ndlela leyi faneleke!

Xana ku tirha tiawara leti engeteleke swi endla leswaku u nga etleli nkarhi lowu eneleke? Ku vuriwa yini hi swiphiqo swa vutomi ni ku vilela hi leswi vumundzuku byi ku khomeleke swona? Solomoni Hosi yo tlhariha u te: “Bya nandziha vurhongo bya loyi a tirhelaka un’wana, ku nga khathariseki leswaku u dya leswitsongo kumbe swo tala; kambe swo tala swa loyi a fuweke a swi n’wi pfumeleli leswaku a etlela.”—Eklesiasta 5:12.

[Nhlamuselo ya le hansi]