Lexi Endlaka Leswaku Van’wana Va Va Ni Madzolonga
JOSEBA la tshamaka eSpain, u vutisiwe leswaku hikwalaho ka yini a joyine ntlawa lowu pfukelaka. U te: “A hi nga ha swi koti ku tiyiselela ku tshikileriwa loku a ku ri kona hi nkarhi wolowo. Edorobeni lerikulu ra Bilbao, laha a ndzi tshama kona, maphorisa a ma bukutela vanhu ma tlhela ma va khoma.”
Joseba u ye emahlweni a ku: “Siku rin’wana nimixo ndzi khomiwile hikwalaho ko phofula ndlela leyi ndzi titwaka ha yona hileswi maphorisa a ma swi endla. A ndzi hlundzukile swinene lerova a ndzi navela ku endla swo karhi leswaku ndzi tirihisela.”
Ku Tshikileriwa Ni Ku Rihisela
Hambileswi Bibele yi nga ma seketeliki madzolonga, ya pfumela leswaku “ku tshikileriwa ku nga hlanganisa nhloko ya lowo tlhariha.” (Eklesiasta 7:7) Vanhu vo tala va hlundzuka loko rixaka ra vona, vukhongeri bya vona kumbe tiko ra rikwavo ri tshikileriwa.
Hi xikombiso, Hafeni loyi ku vulavuriweke ha yena exihlokweni lexi hundzeke u te: “Hi tekeriwe tiko ra hina. Hambi ku ri swiharhi a swi nga ha ri na ndhawu yo tshama eka yona, kutani hi vone swi fanerile leswaku hi lwela tiko ra hina.” Xirho xin’wana xa ntlawa wa vapfukeri lexi tidlayeke hi bomo ni vanhu van’wana, xi vule marito lawa xi nga si fa: “Loko mi nga tshiki ku hi hoxa hi tibomo, ku bulusa tigasi, ku hi pfalela ni ku xanisa vanhu va ka hina, nyimpi leyi a yi nge heli.”
Madzolonga Lama Vangiwaka Hi Vukhongeri
Hambileswi ku nga ni swivangelo swo tala leswi endlaka leswaku vanhu va xandzuka, va katseka eka madzolonga hikwalaho ka vukhongeri. Varhangeri va misava va tshame va amukela rungula leri rhumeriweke hi fax, leri humaka eka xirho xa ntlawa wa vapfukeri leri a ri ku: “A hi pengi naswona a hi endli leswi hikwalaho ko lava ku fuma. Ku tirhela Xikwembu hi swona leswi endlaka leswaku hi tiyimisela ku lwa.”
Malunghana ni madzolonga lama vangiwaka hi vukhongeri, Daniel Benjamin na Steven Simon ebukwini ya vona leyi nge The Age of Sacred Terror, va te: “Emisaveni leyi vukhongeri byi yaka byi andza, swirho swo tala swa vukhongeri swi vona onge madzolonga ma fanele ma va xiphemu xa vugandzeri bya swona.” Endzhaku ka loko mukambisisi un’wana a hlanganise rungula leri a ri vuleke “swiendlakalo swo chavisa swa vutherorisi leswi tshameke swi va kona emisaveni hinkwayo,” u te: “Vanhu hinkwavo lava katsekaka emhakeni ya vutherorisi va vona onge leswi va swi endlaka swa amukeleka eka Xikwembu.”
Vukhongeri byo tala lebyi nga ni ntlawa wa vapfukeri byi ni vonelo leri hambaneke, leri nga fambisaniki ni tidyondzo ta ndhavuko ni milawu ya vukhongeri.
Madzolonga Ma Dzime Timitsu eTimbilwini Ta Vona
Joseba, la boxiweke eku sunguleni, a a khomiwe hi ndlela ya tihanyi loko a ri ekhotsweni. U te: “Ndlela ya tihanyi leyi a ndzi khomiwe ha yona yi endle ndzi vona onge rivengo leri a ndzi ri na rona a ri bihanga. A ndzi tiyimiserile hambi ku ri ku fa leswaku ndzi tisa ku cinca.”
Hakanyingi leswi vanhu va dyondzisiwaka swona emakhotsweni swi endla leswaku va nghenela madzolonga. Hafeni u te: “Loko hi ri etikampeni ta nxaniso, a ku ri ni mintlawa leyi a yi hi dyondzisa leswaku minkarhi hinkwayo valungu va tshikilela vantima.” Xana leswi swi ve ni vuyelo byihi?
Hafeni u ye emahlweni a ku: “Ndzi ye ndzi va venga swinene valungu. A ndzi nga ha va tshembi hinkwavo ka vona. Leswi a ndzi nga ha swi koti ku swi tiyiselela, ndzi vone swi antswa leswaku hi endla swo karhi.”
Hambileswi Joseba na Hafeni a va tiyimisele ku rihisela, ndlela leyi a va titwa ha yona yi cincile. I yini lexi khumbeke timbilu ta vona? Xihloko lexi landzelaka xi ta hlamusela leswi endleke leswaku va cinca.
[Marito lama tshahiweke exihlokweni lama nga eka tluka 6]
“Ndlela ya tihanyi leyi a ndzi khomiwe ha yona yi endle ndzi vona onge rivengo leri a ndzi ri na rona a ri bihanga. A ndzi tiyimiserile hambi ku ri ku fa leswaku ndzi tisa ku cinca.”—Joseba