1. Xava Hi Vutlhari
SWAKUDYA leswi u swi dyaka u swi xava emakete kumbe exitolo xa swakudya, handle ka loko u lo tibyalela swona. U nga swi hlawula njhani swakudya leswi nga ni rihanyo lerinene loko u ri eku xaveni?
● Hlawula nkarhi lowu u nga ta xava ha wona.
Loko Huvo ya Vuhlayiseki bya Swakudya le Australia yi tsundzuxa yi ri: “Rhanga hi ku xava swakudya leswi nga tshamiki exigwitsirisini, kutani u hetelela hi leswi tshamaka exigwitsirisini.” Swakudya leswi hisaka swi xave loko se u muka.
● Xava leswi nga exiyin’weni lexinene.
Loko swi koteka, ringeta ku xava swakudya leswa ha riki exiyin’weni lexinene.a Ruth, manana wa le Nigeria la nga ni vana vambirhi u te: “Ndzi rhandza ku ya emakete nimixo swinene loko mihandzu ni matsavu swa ha ku fika.” Elizabeth wa le Mexico, na yena u endla tano. U ri: “Kwalaho ndzi kota ku xava mihandzu ni matsavu lama ha ku tshoveriwaka naswona ndza tihlawulela. Minkarhi hinkwayo ndzi xava nyama leyi tlhaviweke hi siku rero. Leyi salaka ndzi yi hoxa exigwitsirisini.”
● Kambela swakudya swa wena.
Tivutise: ‘Xana mbhandzu lowu ndzi wu xavaka a wu na xivati? Xana nyama leyi a yi na risema leri nga tolovelekangiki?’ Loko swakudya swa kona swi phutseriwile, kambela nchumu lowu swi phutseriweke ha wona. Loko wu boxekile, wu nga nghenisa tibaktheriya leti nga ni khombo.
Chung Fai, la xavaka swakudya exitolo le Hong Kong u te: “I swa nkoka ku languta siku leri swakudya swi nga ta bola ha rona.” Ha yini? Vativi va swakudya va vula leswaku hambiloko swakudya leswi boleke swi nga ha langutekaka swi ri kahle, swi nun’hwela naswona swi nandziha, swi nga ku vabyisa.
● Veka swakudya hi ndlela leyinene.
Loko u tirhisa nkwama wo xava ha wona swakudya, wu hlantswe nkarhi na nkarhi hi mati yo hisa ni xisibi. Hambanisa nyama ni nhlampfi eka swakudya leswin’wana leswaku swi nga vangi tibaktheriya.
Enrico na Loredana i mpatswa wa le Italy lowu xavaka swakudya laha wu tshamaka kona. Wu te: “Xivangelo xo va hi xava laha hi tshamaka kona hileswi hi nga laviki ku fika ekaya se swi onhakile.” Loko ku ri leswaku ku ta hela timinete to tlula 30 u nga si fika ekaya, tiyiseka leswaku u hoxa swakudya leswi titimelaka eka nchumu lowu nga ta endla leswaku swi tshama swi titimela.
Eka xihloko lexi landzelaka, u ta dyondza ndlela leyi u nga swi hlayisaka ha yona swakudya swa wena ekaya.
[Nhlamuselo ya le hansi]
a Vona xihloko lexi nge “Goza 1—Dyana Hi Ndlela Leyi Faneleke” eka Xalamuka! ya March 2011.
[Bokisi leri nga eka tluka 4]
DYONDZISA VANA VA WENA: “Ndzi dyondzisa vana va mina leswaku loko va nga si xava swakudya, swo tanihi swo miyeta nyoka, va languta siku leri swi nga ta bola ha rona.”—Ruth wa le Nigeria