3. Swi Lunghiselele U Tlhela U Swi Veka Kahle

LE ISRAYELE wa khale musweki la nga khathaliki a a tirhisa marhanga ya le nhoveni “hambiloko a nga ma tivi.” A a chela swilo leswi nga tolovelekangiki eka xiculu. Vanhu lava faneleke va swi dya, lava a va vona onge swakudya sweswo swi ni chefu, a va huwelela va ku: “Ku ni rifu embiteni leyi.”—2 Tihosi 4:38-41.

Xikombiso lexi nga laha henhla xi kombisa leswaku a hi fanelanga hi dya swakudya leswi nga lunghiseleriwangiki hi ndlela leyinene hikuva swi nga hi vabyisa kumbe swi hi dlaya. Leswaku u papalata mavabyi lama vangiwaka hi swakudya leswi nga ni tibaktheriya, lunghiselela swakudya swa wena u tlhela u swi veka endhawini leyi hlayisekeke. Xiya swiringanyeto swa mune leswi landzelaka:

● U nga tshiki nyama yi tin’okela.

Ndzawulo ya Vurimi ya le U.S.A yi ri: “Hambiloko [nyama] yi ri ni ayisi exikarhi ka yona loko yi n’oka, ehandle ka yona ku nga va ekhombyeni loko mahiselo ma ri exikarhi ka 4°C na 60°C—hikuva tibaktheriya ti andza hi xihatla eka mahiselo wolawo.” Kutani yi n’okise hi ku yi hoxa laha ku nga titimeliki ngopfu exigwitsirisini, eka microwave kumbe u yi loveka ematini yo titimela yi phutseriwe hi nchumu lowu nga pfutiki.

● Sweka swakudya swi wupfa.

Vandla ra Rihanyo ra Misava Hinkwayo ri vula leswaku “ku sweka swakudya swi wupfa swi dlaya switsongwatsongwana swo tala leswi nga ni khombo.” Loko u sweka swakudya, ngopfu-ngopfu supu ni xiculu, tiyiseka leswaku swa wupfa.a Leswi swi nga oloviki ku vona leswaku leswi u swi swekaka swi hisa ku fikela kwihi, vanhu vo tala va tirhisa xipima-mahiselo xa nyama (meat thermometer).

● Hatla u phamela.

Swakudya leswi swekiweke a swi fanelanga swi tshama ehandle nkarhi wo leha, hatla u swi phamela swi nga si onhaka. Veka swakudya swo titimela laha ku titimelaka naswona veka swakudya swo hisa laha ku hisaka. U nga veka nyama leya ha ku swekiwaka eka xitofu lexi kufumelaka.

● Swi veke kahle leswi saleke.

Anita, manana wa le Poland, u hatla a swi phamela swakudya leswi a swi swekeke. Loko ku ri ni leswi saleke u ri: “A ndzi teki nkarhi ku swi hoxa exigwitsirisini naswona ndzi swi avanyisa swi va swiphemu leswitsongo leswaku swi ta ndzi olovela ku swi n’okisa.” Loko u veke swakudya leswi saleke exigwitsirisini, swi dye ku nga si hundza masiku manharhu ku ya eka mune.

Loko u dya erhesiturente, u fanele u n’wi tshemba munhu la lunghiseleleke swakudya sweswo. Kutani, u nga wu sirhelela njhani ndyangu wa wena loko mi ya dya erhesiturente?

[Nhlamuselo ya le hansi]

[Bokisi leri nga eka tluka 6]

DYONDZISA VANA VA WENA: “Loko vana va mina va sweka swakudya, ndzi va tsundzuxa ku hlaya ni ku landzela swiletelo leswi nga eka nchumu lowu swi cheriweke eka wona.”—Yuk Ling wa le Hong Kong