Vantshwa Va Vutisa

I Vanhu Va Njhani Lava Ndzi Va Tekaka Tanihi Swikombiso Leswinene?

Exihlokweni lexi u ta dyondza leswaku

HA YINI u lava vanhu lava nga swikombiso leswinene

U nga va kuma KWIHI

U nga xi tekelela NJHANI xikombiso xa vona

HA YINI U VA LAVA

MHAKA YA XIHERI: U tala ku tekelela vanhu lava u va rhandzaka. Sweswo ku nga va nchumu lowunene kumbe wo biha swi ya hileswaku i mani loyi u n’wi tekelelaka.

Leswi u swi lavaka: Vanhu lava nga swikombiso leswinene lava nga tekeleriwaka.—Vafilipiya 3:17.

Xiphiqo xa kona: Vanhu vo tala va lava ku tekelela vanhu lava dumeke—vayimbeleri, vatlangi va mintlango kumbe va tifilimi—hambiloko va nga ri na mahanyelo lamanene.

Mhaka yo anakanyisisa ha yona: Bibele yi fanisa vumunhu bya hina ni swiambalo. (Vakolosa 3:9, 10) Loko a wu ri eku xaveni ka swiambalo, xana a wu ta n’wi yingisa muxavisi loyi a nga ambalangiki kahle loko a ku byela leswaku u xava swiambalo swa njhani? Kutani, ha yini u yingisa munhu loyi a dumeke naswona a nga ni mahanyelo yo biha a ku byela ndlela leyi u faneleke u hanya ha yona? Ematshan’weni yo n’wi yingisa kumbe yo landzela ntshungu, ku hlawula vanhu lava nga swikombiso leswinene swi ta ku pfuna leswaku u (1) hlawula timfanelo leti u lavaka ku va na tona ni ku (2) tekelela vanhu lava kombisaka timfanelo teto.

U NGA VA KUMA KWIHI

Fungha swivulwa leswi landzelaka leswaku i ntiyiso kumbe i mavunwa.

1. Munhu loyi a nga xikombiso lexinene ku fanele ku ri munhu loyi u tshameke u hlangana na yena hi xiviri.

□I ntiyiso □I mavunwa

2. Munhu loyi a nga xikombiso lexinene u fanele a va loyi a hetisekeke.

□I ntiyiso □I mavunwa

3. U nga va ni vanhu vo tala lava u nga va tekaka tanihi swikombiso leswinene.

□I ntiyiso □I mavunwa

Tinhlamulo

1. I mavunwa. U nga hlawula hambi ku ri swikombiso leswinene leswi hanyeke khale. Exikarhi ka swona, leswinene ngopfu u nga swi kuma eBibeleni. Hi xikombiso, loko u hlaya ndzima 11 ya buku ya Vaheveru, u ta kuma leswaku muapostola Pawulo u boxe mavito ya vavanuna ni vavasati va 16 lava hi nga tekelelaka ripfumelo ra vona. Mhaka ya nkoka swinene hileswaku eka ndzima 12, Pawulo u khutaze Vakreste leswaku va “languta swinene-nene” eka Yesu va tlhela va n’wi tekelela. (Vaheveru 12:2) Yesu i xikombiso lexinene ngopfu eka hina.—Yohane 13:15.a

2. I mavunwa. I Yesu ntsena loyi a hetisekile hikuva Adamu a nga vanga na vona vana lava hetisekeke. (Varhoma 3:23) Hambi ku ri muprofeta Eliya loyi a a ri ni xivindzi, a a ri “munhu ku fana na hina.” (Yakobo 5:17, Bibele—Mahungu Lamanene) Hambi ku ri Meriyamu, Davhida, Yonasi, Marta na Petro a va fana na hina. Bibele yi vulavula hi swihoxo swa vona. Hambiswiritano, a va tikhome kahle etimhakeni to tala ta vutomi xisweswo va nga va swikombiso leswinene eka hina.

3. I ntiyiso. U nga va ni vanhu vo tala swinene lava u nga va tekaka tanihi swikombiso leswinene. Wo sungula u nga ha va u n’wi hlawule hileswi a gingiritekaka, wa vumbirhi u nga ha va u n’wi hlawule hileswi a nga ni mbilu yo leha kasi wa vunharhu u nga ha va u n’wi hlawule hileswi a nga heleriwiki hi ntshembo loko a langutana ni swiphiqo. (1 Vakorinto 12:28; Vaefesa 4:11, 12) Languta leswinene eka van’wana kutani u ta kuma timfanelo letinene leti va nga na tona leti u nga ti tekelelaka.—Vafilipiya 2:3.

U NGA XI TEKELELA NJHANI XIKOMBISO XA VONA

1. Xiyisisa Vanhu lava u nga va tekaka tanihi swikombiso leswinene. Muapostola Pawulo u byele Vakreste va lembe-xidzana ro sungula a ku: “Dyondzani hi ku langutisa lava hanyaka hi ndlela leyi hi mi kombeke yona.”—Vafilipiya 3:17, Holy Bible—Easy-to-Read Version.

2. Aka vuxaka na vona. Loko swi koteka, tinyike nkarhi wo tshama ni vanhu lava u va tekaka va ri swikombiso leswinene swa manguva lawa. Bibele yi ri: “Loyi a fambaka ni vanhu vo tlhariha u ta tlhariha.”—Swivuriso 13:20.

3. Ehleketisisa hi timfanelo letinene ta vanhu lava u va tekaka va ri swikombiso leswinene. Vaheveru 13:7 yi ri: ‘Loko u ri karhi u xiyisisa vuyelo bya ku tikhoma ka vona, tekelela ripfumelo ra vona.’

Xana se u swi lunghekerile ku endla tano? Tata xiphemu lexi nga laha hansi lexi vulavulaka hi magoza lawa u nga ma tekaka yo hlawula munhu loyi a nga vaka xikombiso lexinene eka wena.

Magoza Lawa U Nga Ma Tekaka

Hlawula mfanelo leyi u tsakelaka ku va na yona. (Xana u nga tsakela ku va munhu loyi a nga ni xinghana, loyi a hananaka, loyi a gingiritekaka, loyi a pfumelelanaka ni swiyimo ni loyi a tshembekaka?)

․․․․․

Hlawula munhu loyi a nga ni mfanelo leyi u nga tsakelaka ku yi hlakulela.b

․․․․․

Xikongomelo xa wena loko u hlawula munhu loyi u n’wi tekaka tanihi xikombiso lexinene eka wena a hi ku lava ku fana na yena hi ku helela. U ta hambeta u va ni timfanelo letinene to hlawuleka. Hambiswiritano, ku va ni vanhu lava u va tekaka tanihi swikombiso leswinene swi ta ku pfuna leswaku u antswisa vumunhu bya wena loko u ya u kula. Ku tekelela xikombiso xa vona swi ta tlhela swi ku pfuna leswaku na wena u va xikombiso lexinene eka van’wana.

Swihloko leswi engetelekeke leswi nga ebukwini leyi nge “Vantshwa Va Vutisa” swi kumeka eka Web site ya www.watchtower.org/ype

[Tinhlamuselo ta le hansi]

[Nhlamuselo ya xifaniso lexi nga eka tluka 21]

Kutani, ha yini u yingisa munhu loyi a dumeke naswona a nga ni mahanyelo yo biha a ku byela ndlela leyi u faneleke u hanya ha yona?

[Bokisi/Swifaniso leswi nga eka matluka 22, 23]

LESWI TINTANGHA TA WENA TI SWI VULAKA

Layla—Munghana wa mina Sandra u dzika eka swilo leswinene ntsena. Nakambe u yi tiva kahle Bibele. Hikwalaho ka sweswo, swi tikomba onge minkarhi hinkwayo wa yi tiva ndlela yo tlhantlha swiphiqo. Nkarhi wun’wana ni wun’wana ndza tiphofula eka yena loko ndzi ri ni xiphiqo lexikulu kumbe lexitsongo.

Terrence—Vanghana va mina Kyle na David a va yi tekeli ehansi mintlhaveko ya van’wana. Minkarhi hinkwayo va tshama va lunghekele ku pfuna vanhu hi swiphiqo swa vona, hambileswi na vona va nga ni swikarhato swa vona. Ndzi va teka tanihi swikombiso leswinene.

Emmaline—Manana i xikombiso lexinene eka mina. Bibele yakwe u yi tiva kahle naswona u tshama a lungheleke ku tirhisa nkarhi lowu n’wi pfulekelaka leswaku a vulavula ni vanhu hi ripfumelo rakwe. U pfumela leswaku ku chumayela a hi ndzhwalo kambe i lunghelo. Ndza n’wi xixima hikwalaho ka sweswo.

[Bokisi leri nga eka tluka 23]

HLAYA LESWI ENGETELEKEKE HI MHAKA LEYI!

Xana u lava mpfuno wo kuma vanhu lava nga swikombiso leswinene? Hlaya Vaheveru ndzima 11 ivi u hlawula un’wana wa vavanuna kumbe wa vavasati lava boxiweke kwalaho. Sungula ku dyondza hi munhu yoleyo hi xikongomelo xo lava ku tekelela timfanelo takwe leti rhandzekaka.

U nga kuma vanhu lava engeteleke lava nga swikombiso leswinene swa le Bibeleni eka Vholumo 1 na 2 ya buku leyi nge, Swivutiso Leswi Vantshwa Va Swi Vutisaka—Tinhlamulo Leti Tirhaka leyi kandziyisiweke hi Timbhoni ta Yehovha. Hlaya “Xikombo Xa Vanhu Lava Nga Swikombiso Leswinene” endzeni ka xifunengeto lexi nga emakumu ka vholumo ha yin’we.

[Bokisi leri nga eka tluka 23]

HA YINI U NGA VUTISI VATSWARI VA WENA?

Vulavula ni vatswari malunghana ni vanhu lava a va va teka tanihi swikombiso leswinene eka vona loko va ha ri vantshwa ni lava va va tekaka va ri swikombiso leswinene sweswi. Vatswari va wena swi va vuyerise njhani ku va ni vanhu lava nga swikombiso leswinene evuton’wini bya vona?