VANTSHWA VA VUTISA
U Nga N’wi Hlawula Njhani Munhu Loyi U Nga N’wi Tekelelaka?
“Loko ndzi langutana ni swiphiqo exikolweni, a swi ndzi pfuna ku ehleketa hi munhu loyi ndzi n’wi xiximaka swinene loyi a langutaneke ni swiphiqo leswi fanaka. Kutani a ndzi ringeta ku landzelela xikombiso xakwe. Ku va ni munhu loyi ndzi nga n’wi tekelelaka swi endle swi olova ku langutana ni swiyimo swo tika.”—Haley.
Munhu loyi u lavaka ku n’wi tekelela a nga ku pfuna u papalata swiphiqo ni ku fikelela swilo leswi u swi lavaka evuton’wini. Lexi nga ku pfunaka u endla tano i ku hlawula munhu wa kahle loyi u nga n’wi tekelelaka.
Hikwalahokayini u fanele u hlawula hi vukheta?
Xiboho lexi u xi endlaka xo hlawula vanhu vo va tekelela xi ta khumba ndlela leyi u endlaka swilo hayona.
Bibele yi tsundzuxa Vakreste leswaku va fanele va xiyisisa lava nga swikombiso leswinene, yi ri: “Loko mi ri karhi mi xiyisisa vuyelo lebyinene bya ku tikhoma ka vona, tekelelani ripfumelo ra vona.”—Vaheveru 13:7.
Xitsundzuxo: Leswi xiboho xo hlawula munhu wo n’wi tekelela xi nga ku kucetelaka ku endla swilo swa kahle kumbe swo biha, i vutlhari ku hlawula loyi a nga ni vumunhu bya kahle, ku nga ri lava dumeke kumbe tintangha ta wena.
“Ndzi dyondze swo tala eka ndlela leyi makwerhu loyi a vuriwaka Adam a a tikhoma hayona, swin’we ni le ka mahanyelo yakwe hi ku angarhela. Ya hlamarisa ndlela leyi ndza ha tsundzukaka swilo leswi a swi endleke ni leswi a swi vuleke. A nga yi tivi ndlela leyi leswi a swi endleke swi ndzi khumbeke hayona.”—Colin.
Xiboho xo hlawula munhu wo n’wi tekelela xi ta khumba ndlela leyi u ehleketaka hayona ni ndlela leyi u titwaka hayona.
Bibele yi ri: “Mi nga xisiwi. Vanghana vo biha va onha mikhuva leyinene.”—1 Vakorinto 15:33.
Xitsundzuxo: Hlawula munhu loyi a nga ni vumunhu lebyinene, ku nga ri ndlela leyi a langutekaka hayona. Loko u nga endli tano, u nga tikuma u hlawule munhu loyi a nga ta ku endla u tisola.
“Ku tipimanisa ni vanhu van’wana lava u vonaka onge va saseke ngopfu swi ku endla u titwa u nga pfuni nchumu ni ku tivona u nga sasekanga. Swi nga ku endla u karhateka ngopfu hi ndlela leyi u langutekaka hayona.”—Tamara.
Swo anakanyisisa ha swona: Ku nga va ni khombo rihi loko u hlawula ku tekelela vanhu lava dumeke?
Swilo leswi u nga ta swi fikelela evuton’wini swi titshege hi xiboho lexi u xi endlaka sweswi xo hlawula vanhu lava u lavaka ku va tekelela.
Bibele yi ri: “Loyi a fambaka ni lavo tlhariha u ta tlhariha.”—Swivuriso 13:20.
Xitsundzuxo: Hlawula vanhu vo va tekelela lava nga ni vumunhu lebyi u tsakelaka ku va na byona. Loko u ri karhi u xiyisisa leswi va swi endlaka, u ta dyondza leswi nga ku pfunaka u fikelela leswi u swi lavaka evuton’wini.
Ematshan’weni yo vula u ku, ‘Ndzi lava ku va ni vutihlamuleri byo tala,’ u nga ha ku, ‘Ndzi lava ku va ni vutihlamuleri byo tala ku fana na Jane. Wa wu hlayisa nkarhi naswona u swi tekela enhlokweni swiavelo swakwe.’”—Miriam.
Ntiyiso wa mhaka: Loko u hlawula munhu lonene loyi u lavaka ku n’wi tekelela, swi ta ku pfuna u va ni vumunhu lebyi u byi lavaka.
Ku va ni munhu wa kahle loyi u lavaka ku n’wi tekelela, ku nga va ndlela yo olova yo fikelela swilo leswi u swi lavaka evuton’wini!
Tindlela to hlawula
U nga hlawula munhu loyi u lavaka ku n’wi tekelela hi ku tirhisa ndlela yin’we kumbe timbirhi eka leti nga laha hansi.
U nga hlawula vumunhu lebyi u lavaka ku antswisa eka byona ivi u kuma munhu loyi u n’wi xiximaka loyi a nga ni vumunhu byebyo.
U nga hlawula munhu loyi u n’wi xiximaka kutani u hlawula vumunhu lebyi a nga na byona lebyi u lavaka ku byi tekelela.
Xitoloveto lexi fambisanaka ni xihloko lexi xi ta ku pfuna leswaku u kota ku endla tano.
Vanhu lava u lavaka ku va tekelela va nga ha va:
Tintangha ta wena. “Munghana wa mina lonkulu hi un’wana wa vanhu lava ndzi lavaka ku va tekelela. Hambiloko a khomekile, u tinyika nkarhi wo kombisa ku khathala hi munhu un’wana. U ntsongo eka mina kambe u ni vumunhu lebyi ndzi nga riki na byona naswona swi ndzi endla ndzi lava ku n’wi tekelela.”—Miriam.
Vanhu lavakulu. Ku nga ha va vatswari va wena kumbe vamakwerhu lava u va tshembaka. “Ndzi vula ndzi nga tipfinyingi leswaku vatswari va mina hi vona ndzi lavaka ku va tekelela. Va ni vumunhu bya kahle swinene. Ndza swi vona swihoxo swa vona kambe ndzi tlhela ndzi swi xiya leswaku va ha tshembekile hambiloko va endla swihoxo swoleswo. Loko ndzi fika emalembeni ya vona, ndzi navela onge ku ngo vuriwa leswi fanaka hi mina.”—Annette.
Vanhu va le Bibeleni. “Hikwalaho ka swivangelo leswi hambaneke, ndzi hlawule vanhu vo hlayanyana va le Bibeleni lava ndzi lavaka ku va tekelela, vo tanihi Timotiya, Rhuti, Yobo, Petro ni xinhwanyetana xa Muisrayele. Loko ndzi ya ndzi dyondza hi vanhu va le Bibeleni, swi endla va va va xiviri eka mina. Ndzi tiphinile swinene hi ku hlaya marungula lama kumekaka eka buku leyi nge, Tekelela Ripfumelo Ra Vona swin’we ni ‘Swikombo Swa Vanhu Lava Nga Swikombiso Leswinene’ leswi kumekaka eka tivholumo timbirhi ta buku leyi nge, Swivutiso Leswi Vantshwa Va Swi Vutisaka.—Tinhlamulo Leti Tirhaka.—Melinda.
Xitsundzuxo: U nga hlawuli munhu un’we ntsena loyi u nga ta n’wi tekelela. Muapostola Pawulo u byele Vakrestekulobye a ku: “Mi xiyisisa lava fambaka hi ndlela leyi fambisanaka ni xikombiso lexi hi mi vekeleke xona.”—Vafilipiya 3:17.
Xana a wu swi tiva? U nga va xikombiso lexinene lexi vanhu van’wana va tsakelaka ku xi tekelela! Bibele yi ri: “Vana xikombiso lexinene eka lava tshembekaka, hi ku vulavula, hi ku tikhoma, hi rirhandzu, hi ripfumelo ni hi mahanyelo ya wena.”—1 Timotiya 4:12.
“U nga va u ri eku antswiseni ka vumunhu byo karhi kambe hi hala tlhelo u ri karhi u pfuna van’wana va antswisa vumunhu bya vona. A wu nge swi tivi leswaku i mani loyi a ku languteke naswona a wu nge swi tivi leswaku leswi u swi vulaka swi nga cinca vutomi bya munhu un’wana.”—Kiana.