Xana U Fanele Ku Byi Pfumela?

XANA wa pfumela eka Vunharhu-un’we ke? Vanhu vo tala eVujaganini va pfumela. Hikwalaho, byi ve dyondzo-nkulu ya tikereke hi malembe xidzana.

Hikwalaho ka leswi, a wu ta anakanya leswaku a ku nga ta va na ku kanakana ehenhleni ka byona. Kambe ku kona, naswona sweswinyana hambi ku ri van’wana va vaseketeri va byona va nyanyise njhekanjhekisano.

Ha yini nhloko-mhaka yo fana ni leyi yi nga fanelanga ku biwa hi makatla? Hikuva Yesu hi yexe u te: “Vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” Kutani vumundzuku bya hina hinkwabyo byi titshege hi ku tiva ka hina leswi Xikwembu xi nga swona hakunene, naswona sweswo swi vula ku kambisisa masungulo ya njhekanjhekisano wa Vunharhu-un’we. Hikwalaho, ha yini u nga ma kambisisi hi wexe?—Yohane 17:3.

Ku ni tinhlamuselo to hambana-hambana ta Vunharhu-un’we. Kambe hi ntolovelo dyondzo ya Vunharhu-un’we hi leswaku eka Xikwembu-nhloko ku ni vanhu vanharhu, Tatana, N’wana ni Moya lowo Kwetsima; kambe, loko va hlanganile va endla Xikwembu xin’we. Dyondzo leyi yi vula leswaku lava vanharhu va ringana, va ni matimba hinkwawo naswona a va vumbiwanga, va hume eka Xikwembu-nhloko hi laha ku nga heriki.

Hambi swi ri tano, van’wana va vula leswaku dyondzo ya Vunharhu-un’we i mavunwa, Xikwembu xa Matimba Hinkwawo xi yima xi ri xoxe tanihi munhu la hambaneke, la nga heriki ni la nga ni ntamu hinkwawo. Va vula leswaku Yesu eka vukona bya yena bya le mahlweni ka ku va munhu, ku fana ni tintsumi, a a ri munhu wa moya loyi a hambaneke loyi a vumbiweke hi Xikwembu, naswona hikwalaho ka xivangelo lexi u fanele a ve ni masungulo. Va dyondzisa leswaku Yesu a nga kalanga a ringana ni Xikwembu xa Matimba Hinkwawo hi langutelo rihi na rihi; hi minkarhi hinkwayo a a titsongahata eka Xikwembu naswona wa ha titsongahata. Va tlhela va pfumela leswaku moya lowo kwetsima a hi munhu kambe i moya wa Xikwembu, matimba ya xona lama tirhaka.

Vaseketeri va Vunharhu-un’we va vula leswaku a byi sekeriwanga eka mukhuva wa vukhongeri ntsena kambe ni le Bibeleni. Vaxopaxopi va dyondzo leyi va vula leswaku a hi dyondzo ya Bibele, buku yin’wana ya matimu yi tlhela yi ku: “Masungulo ya [Vunharhu-un’we] i ya vuhedeni hi laha ku heleleke.”—The Paganism in Our Christianity.

Loko Vunharhu-un’we byi ri ntiyiso, swa tsongahata eka Yesu ku vula leswaku a nga kalanga a ringana ni Xikwembu tanihi xiphemu xa Xikwembu-nhloko. Kambe loko Vunharhu-un’we byi ri mavunwa, swa tsongahata eka Xikwembu xa Matimba Hinkwawo ku vula leswaku un’wana u ringana na xona, naswona hi leswi nyanyisaka ngopfu ku vula Mariya leswaku i “Mana wa Xikwembu.” Loko Vunharhu-un’we byi ri mavunwa, swi delela Xikwembu ku vula hi laha swi xiyiweke ha kona eka buku leyi nge Catholicism: “Handle ka loko [vanhu] va hlayisa Ripfumelo leri ri tengile ni ku pfumala xivati, handle ko kanakana [va] ta heriseriwa makumu. Naswona Ripfumelo ra Khatoliki hi leri: hi gandzela Xikwembu xin’we hi Vunharhu-un’we.”

Manuku ke, ku ni swivangelo leswinene swa mhaka leyi ha yona u faneleke ku lava ku tiva ntiyiso ehenhleni ka Vunharhu-un’we. Kambe hi nga si kambisisa masungulo ya byona ni ku tivulela ka byona leswaku i ntiyiso, a swi ta va leswi pfunaka ku hlamusela dyondzo leyi hi ndlela leyi kongomeke swinene. Kahle-kahle, Vunharhu-un’we i yini ke? Xana vaseketeri va byona va byi hlamusela hi ndlela yihi?

Handle ka mfungho, Matsalwa ya Xiheveru lama tshahiweke ebroxareni leyi ma huma eka Bibele ya Xitsonga (BX) kasi ya Xigriki ya huma eka Testamente ya Mahungu Lamanene. Laha ku humelelaka NW endzhaku ka ku tshaha swi komba leswaku ku hundzuluxela ka kona i ka Bibele ya Xinghezi ya New World Translation of the Holy Scriptures—With References, Ntsariso wa 1984

[Swifaniso leswi nga eka tluka 2]

Eximatsini: Xifaniso xa Egipta xa gidi ra vumbirhi ra male- mbe (B.C.E.) Vunharhu-un’we bya Amon-Ra, Ramses II, na Mut. Exineneni: Xifaniso xa Vunharhu-un’we xa lembe xidzana ra vukhume-mune (C.E.) xa Yesu Kriste, Tatana ni moya lowo kwetsi-ma. Xiya, i vanhu vanharhu kambe va ni milenge ya mune ntsena.