Vungoma Ni Vuloyi A Swi Fanelanga

Sathana u lava leswaku u endla mintirho ya vungoma. Vo tala va phahla vakokwana kumbe mimoya leswaku yi va sirhelela. Va endla leswi hikwalaho ka leswi va chavaka vanhu va le xivandleni xa moya. Va vehela swingwavila kumbe vuhlalu bya vungoma. Va nwa “mirhi” va tlhela va titota hi yona emirini wa vona, va ri ni ntshembo wa leswaku yi ni matimba ya vungoma. Vanhu van’wana va tisirhelela hi ku biya miti ya vona. Van’wana va “khendla” leswaku va humelela ebindzwini, loko va tsala swikambelo exikolweni kumbe etimhakeni ta ku rhandzana.

Ndlela leyinene ngopfu yo tisirhelela eka Sathana i ku va munghana wa Yehovha. Yehovha Xikwembu ni tintsumi ta yena va ni matimba swinene ku tlula Sathana ni madimona ya yena. (Yakobo 2:​19; Nhlavutelo 12:⁠9) Yehovha u hisekela ku kombisa matimba ya yena eka vanghana va yena​—⁠lava va tshembekaka hakunene eka yena.​—⁠2 Tikronika 16:⁠9.

Rito ra Xikwembu ri ri: “Mi nga tshuki mi endla masalamusi.” Yehovha wa ma nyenya masalamusi ni vuloyi hikuva swiendlo swoleswo swi nga endla leswaku munhu a lawuriwa hi matimba ya Sathana Diyavulosi hi ku kongoma.​—⁠Levhitika 19:​26.