“Nyikela Nyingiso Eka Ndlela Leyi U Yingisaka Ha Yona”

KU YINGISA i xiphemu xa nkoka xa ku dyondza. Ku nga tlhela ku pfuna munhu leswaku a pona. Loko Yehovha a lunghiselela ku ntshunxa vanhu vakwe evuhlongeni le Egipta, u nyike Muxe swiletelo, kutani yena a byela vakulukumba va Israyele leswi va faneleke va swi endla, leswaku va ponisa mativula ya vona eka ntsumi leyi taka ni rifu. (Eks. 12:21-23) Hiloko vakulukumba va tiko va hundzisa rungula leri eka ndyangu wun’wana ni wun’wana. Leswi a swi endliwa hi nomu. Vanhu a va fanele va yingisisa. Xana va angurise ku yini? Bibele yi ri: “Vana va Israyele hinkwavo va endla hilaha Yehovha a leriseke Muxe na Aroni hakona. Va endle tano.” (Eks. 12:28, 50, 51) Hikwalaho ka sweswo, Vaisrayele va ponisiwe hi ndlela leyi hlamarisaka.

Namuntlha, Yehovha u hi endla hi lunghekela ntshunxeko lowukulu swinene. Ina, ndzetelo lowu a wu nyikelaka hi fanele hi wu yingisisa swinene. Ndzetelo wolowo wu nyikeriwa eminhlanganweni ya vandlha. Xana wa vuyeriwa eka minhlangano yo tano? Sweswo swi titshege ngopfu hi ndlela leyi u yingisaka ha yona.

Xana u kota ku tsundzuka tinhla-nkulu ta leswi dyondzisiweke eminhlanganweni? Xana i mukhuva wa wena leswaku vhiki ni vhiki, u lava tindlela to swi tirhisa evuton’wini bya wena leswi swi dyondzisiweke kumbe ku swi byela van’wana?

Lunghisa Mbilu Ya Wena

Leswaku hi vuyeriwa swinene eka vuleteri lebyi nyikeriwaka eminhlanganweni ya Vukreste, hi fanele hi lunghisa timbilu ta hina. Nkoka wa ku endla sweswo wu kandziyisiwa hi leswi humeleleke hi nkarhi wa ku fuma ka Hosi Yehoxafati wa le Yuda. Yehoxafati u byi seketele swinene vugandzeri bya ntiyiso. U “[suse] tindhawu leti tlakukeke ni timhandzi to kwetsima eYuda,” a byela ni tihosana, Valevhi ni vaprista leswaku va dyondzisa vanhu Nawu wa Yehovha emitini hinkwayo ya Yuda. Nilokoswiritano, “i tindhawu leti tlakukeke ntsena leti nga nyamalalangiki.” (2 Tikr. 17:6-9; 20:33) Ku gandzeriwa ka swikwembu swa mavunwa ni ku gandzela Yehovha hi ndlela leyi nga riki enawini, leyi a yi tirhisiwa etindhawini leti tlakukeke ta vahedeni, a swi dzime timitsu swinene lerova a swi kukuriwanga swi hela.

Hikwalaho ka yini ndzetelo lowu hleriweke hi Yehoxafati wu nga swi kotanga ku va ni nsusumeto wa nkarhi wo leha? Xiviko xi ya emahlweni xi ku: “Vanhu a va nga si lunghisa mbilu ya vona eka Xikwembu xa vatata wa vona.” Va swi twile kambe va tsandzeka ku endla hi ku pfumelelana na swona. Kumbexana a va vona ku ri ntirho wo tika ku ya etempeleni le Yerusalema leswaku va ya endla magandzelo. Kambe ntiyiso wa kona hi leswaku timbilu ta vona a ti nga susumetiwi hi ripfumelo.

Leswaku hi papalata ku tlhelela etindleleni ta misava ya Sathana, hi fanele hi lunghisa timbilu ta hina leswaku ti amukela ndzetelo lowu Yehovha a wu nyikelaka namuntlha. Njhani? Ndlela yin’wana ya nkoka i ku khongela. Hi fanele hi khongelela leswaku ndzetelo lowu Xikwembu xi hi nyikaka wona, hi wu amukela hi moya wa ku nkhensa. (Ps. 27:4; 95:2) Leswi swi ta endla leswaku hi tlangela matshalatshala ya vamakwerhu, lava va tiendlaka va kumeka leswaku Yehovha a va tirhisa ku dyondzisa vanhu vakwe, hambileswi va nga hetisekangiki. Swi ta hi susumetela ku nkhensa Yehovha hi swilo leswintshwa leswi hi swi dyondzaka swin’we ni nkarhi lowu hi wu kumaka wo engetela ku twisisa loku hi nga na kona hi timhaka leti hi tshameke hi ti dyondza. Hikwalaho ko navela ku endla ku rhandza ka Xikwembu hi ku helela, ha khongela hi ku: “Oho Yehovha, ndzi letele hi ndlela ya wena. . . . Endla mbilu ya mina yi va ni vun’we leswaku yi chava vito ra wena.”—Ps. 86:11.

Nyikela Nyingiso Swinene

I swinyingi swilo leswi nga hi kavanyetaka leswaku hi rhiya ndleve. Mianakanyo ya hina yi nga va yi pfilunganyiwe hi mivilelo. Pongo ni ku famba-famba ka vayingiseri kumbe pongo leri nga ehandle ka ndhawu ya minhlangano, ri nga hi kavanyeta. Switlhavi swa miri swi nga endla leswaku swi hi tikela ku nyikela nyingiso. Lava va nga ni vana lavatsongo hakanyingi va kavanyeteka. I yini lexi nga hi pfunaka leswaku nyingiso wa hina wu tshama wu ri enongonokweni?

Mahlo hi wona ma lawulaka nyingiso wa hina. Tirhisa mahlo ya wena leswaku ma ku pfuna ku nyikela nyingiso hi ku tshama u langute xivulavuri. Loko xi boxa ndzimana yo karhi ya Bibele—hambi ku ri leyi tolovelekeke—yi pfule kutani u fambisana na xona loko xi yi hlaya. Lwana ni mboyamelo wo hundzuluxela nhloko kun’wana ni kun’wana laha ku twalaka pongo kona kumbe ku languta vanhu lava famba-fambaka. Loko mahlo ya wena ma tshama ma langute swilo leswi kavanyetaka, u ta lahlekeriwa swinene hi leswi swi vuriwaka eplatifomo.

Loko ‘miehleketo yihi ni yihi leyi ku karhataka’ yi endla swi ku tikela ku nyikela nyingiso enongonokweni, khongela eka Yehovha leswaku u kuma ku rhula ka mianakanyo ni ku rhula ka mbilu, leswaku u ta kota ku nyikela nyingiso. (Ps. 94:19; Filp. 4:6, 7) Loko swi laveka, u nga ha khongela hi ku phindha-phindha. (Mat. 7:7, 8) Minhlangano ya vandlha i lunghiselelo ra Yehovha. U nga tiyiseka leswaku u lava u vuyeriwa eka yona.—1 Yoh. 5:14, 15.

Ku Yingisa Tinkulumo

Handle ko kanakana wa ha ti tsundzuka tinhla leti u ti rhandzeke loko u yingisela tinkulumo. Kambe ku yingisela nkulumo a swi katsi ku hlengeleta tinhla-nkulu ntsena. Nkulumo yi fana ni riendzo. Hambiloko ku nga ha va ni swilo leswi tsakisaka swo swi vona endleleni, lexi nga xa nkoka hi laha u yaka kona. Xivulavuri xi nga ha va xi ringeta ku endla leswaku vayingiseri va fikelela xiboho xo karhi kumbe xi va susumetela ku teka goza ro karhi.

Xiya nkulumo leyi Yoxuwa a yi nyikeleke emahlweni ka tiko ra Israyele, leyi tsariweke eka Yoxuwa 24:1-15. Xikongomelo xa yena a ku ri ku susumetela vanhu lava leswaku va nga xi landzuli xiyimo xa vona xa ku seketela vugandzeri bya ntiyiso hi ku tihambanisa hi ku helela ni vugandzeri bya swifaniso bya matiko lawa va akelaneke na wona. Hikwalaho ka yini leswi a swi ri swa nkoka swonghasi? Ku tala ka vugandzeri bya mavunwa ku byi xungete swinene vuxaka lebyinene exikarhi ka tiko na Yehovha. Vanhu va angule xikombelo xa Yoxuwa va ku: “A hi swinene eka hina ku siya Yehovha leswaku hi ya tirhela swikwembu swin’wana. . . . Hi ta tirhela Yehovha.” Naswona va endle tano!—Yox. 24:16, 18, 31.

Loko u ri karhi u yingisela nkulumo, ringeta ku twisisa xikongomelo xa yona. Xiya ndlela leyi tinhla leti vuriwaka hi xivulavuri ti pfunaka ha yona leswaku xikongomelo xexo xi fikeleriwa. Tivutise leswaku rungula ra kona ri lava leswaku wena u endla yini.

Ku Yingisa Hi Nkarhi Wa Mimbulavurisano

Dyondzo ya Xihondzo xo Rindza, Dyondzo ya Buku ya Vandlha ni tinkulumo tin’wana ta Nhlangano wa Ntirho ti fambisiwa hi ku tirhisa mbulavurisano wa swivutiso ni tinhlamulo, wa rungula leri kandziyisiweke, leri sekeriweke eBibeleni.

Ku yingisa hi nkarhi wa mbulavurisano hi tindlela to karhi ku fana ni loko u hlanganyela eka bulo ro karhi. Leswaku u vuyeriwa swinene, rhiya ndleve. Ringeta ku vona leswaku mbulavurisano wolowo wu kongome kwihi. Xiya ndlela leyi mufambisi a kandziyisaka nhloko-mhaka ni tinhla-nkulu ha yona. Hlamula swivutiso swa yena emianakanyweni ya wena. Yingisela loko van’wana va ri karhi va hlamusela, va kombisa ndlela leyi rungula leri ri tirhaka ha yona. Ku teka rungula leri hi ku landza ndlela leyi van’wana va ri tekaka ha yona swi nga ku pfuna leswaku rungula leri u ri toloveleke u ri twisisa hi ndlela leyintshwa. Hoxa xandla eka mbulavurisano lowu hi ku phofula ripfumelo ra wena hi ku hlamula.—Rhom. 1:12.

Ku lunghiselela rungula leri averiweke ka ha ri emahlweni swi ta ku pfuna leswaku u katseka swinene eka mbulavurisano ni ku twisisa tinhlamulo ta van’wana. Loko swiyimo swa wena swi nga ku pfumeleli leswaku u ri lunghiselela kahle rungula leri, ringeta ku tinyika timinete ti nga ri tingani ta ku hlaya rungula leri u nga si ya eminhlanganweni. Loko wo endla tano u ta vuyeriwa swinene eka mbulavurisano lowu.

Ku Yingisa eTinhlengeletanweni Ni Le Mintsombanweni

Etinhlengeletanweni ni le mintsombanweni ku nga va ni swikavanyeto swo tala ku tlula eminhlanganweni ya vandlha. Leswi swi nga endla leswaku ku yingisa swi tika swinene. I yini lexi xi nga hi pfunaka?

Nchumu wa nkoka i ku va ni nkarhi lowu eneleke wa ku wisa ni vusiku. Loko nongonoko wu nga si sungula, siku na siku anakanyisisa hi nhloko-mhaka ya nongonoko. Languta xihloko xa nkulumo yin’wana ni yin’wana kutani u ringeta ku anakanya hi leswi nga ta nyikeriwa. Yi tirhise kahle Bibele ya wena. Vo tala va kuma leswaku ku tsala tinhla-nkulu hi ku komisa swa va pfuna leswaku mianakanyo ya vona yi tshama yi ri eka leswi vuriwaka. Tsala swiletelo leswi u kunguhataka ku swi tirhisa evuton’wini bya wena ni le vutirhelini. Bula hi tinhla ti nga ri tingani loko u ri karhi u ya ni ku vuya enhlengeletanweni siku rin’wana ni rin’wana. Leswi swi ta endla leswaku rungula leri ri dzika.

Ku Letela Vana Leswaku Va Yingisa

Vatswari lava va nga Vakreste va nga pfuna vana va vona—hambi ku ri tincece—ku ‘tlhariha leswaku va ta pona’ hi ku ta na vona eminhlanganweni ya vandlha, etinhlengeletanweni ni le mintsombanweni. (2 Tim. 3:15) Leswi ndlela leyi vana va titwaka ha yona ni ndlela leyi va nyikelaka nyingiso ha yona yi nga faniki, ku laveka vutlhari leswaku va pfuniwa ku dyondza ku rhiya ndleve. Swiringanyeto leswi landzelaka swi nga ha ku pfuna.

Ekaya, hlela minkarhi ya leswaku vana va wena lavatsongo va tshama va ku whii, va hlaya kumbe va languta swifaniso leswi nga etibukwini ta hina ta Vukreste. Eminhlanganweni, papalata ku hungasa vana hi switlangiso. Hilaha a swi ri ha kona eka Israyele wa khale, ni namuntlha, vana va va kona “leswaku va yingisa nileswaku va dyondza.” (Det. 31:12) Loko swi koteka, vatswari van’wana va nyika vana tikopi ta vona vini ta tibuku leti tirhisiwaka, hambiloko va ha ri vatsongo swinene. Loko vana va ya va kula, va pfune leswaku va lunghiselela tinkulumo leti lavaka tinhlamulo, leswaku va ta hlamula enkulumeni.

Matsalwa ma kombisa ku yelana lokukulu exikarhi ka ku yingisa Yehovha ni ku endla leswi a swi lavaka. Leswi swi kombisiwa hi marito lawa Muxe a ma byeleke tiko ra Israyele: “Ndzi veke vutomi ni rifu, nkateko ni ndzhukano emahlweni ka n’wina; mi fanele mi hlawula vutomi . . . hi ku rhandza Yehovha Xikwembu xa n’wina, hi ku yingisa rito rakwe ni ku n’wi namarhela.” (Det. 30:19, 20) Namuntlha, ku yingisa ndzetelo lowu Yehovha a hi nyikaka wona ni ku wu tirhisa hi ku tshembeka evuton’wini bya hina, swa laveka loko hi ta amukeriwa hi Xikwembu ni ku kuma mikateko ya vutomi lebyi nga heriki. Kutani ke, i swa nkoka leswaku hi yingisa xitsundzuxo xa Yesu: “Nyikelani nyingiso eka ndlela leyi mi yingisaka ha yona”!—Luka 8:18.