Vana Muyingiseri Lonene
1 Swi lava ku titshinya leswaku u rhiya ndleve hi vukheta. Nakambe swi lava leswaku muyingiseri a tiyimisela ku dyondza ni ku vuyeriwa eka leswi a swi tweke. Hikwalaho, Yesu u kandziyise xilaveko xa ku ‘nyikela nyingiso eka ndlela leyi hi yingisaka ha yona.’—Luka 8:18.
2 Leswi swi tirha ngopfu loko hi ri eminhlanganweni ya vandlha, etinhlengeletanweni ni le mintsombanweni. Leyi i minhlangano leyi hi faneleke hi rhiya ndleve hi vukheta eka yona. (Hev. 2:1) Hi leti tinhla tin’wana leti nga ku pfunaka leswaku u va muyingiseri lonene eminhlanganweni leyi ya Vukreste.
◼ Tlangela ntikelo wa minhlangano. Hi yona ndlela leyikulu leyi hi “dyondzisiwaka hi Yehovha” ha yona hi ku tirhisa “mulanguteri wo tshembeka.”—Esa. 54:13; Luka 12:42.
◼ Lunghiselela ka ha ri emahlweni. Dyondza rungula leri ku nga ta buriwa ha rona, naswona u nga rivali ku ta ni Bibele ya wena swin’we ni buku ya wena leyi dyondziwaka.
◼ Loko minhlangano yi ri karhi yi ya emahlweni, tikarhatele ku nyikela nyingiso swinene. Ku vulavula ni lava u tshameke na vona ni ku languta leswi vayingiseri van’wana va swi endlaka swi fanele ku papalatiwa. Ringeta ku nga kavanyetiwi hi ku ehleketa hi leswi u nga ta swi endla loko nhlangano wu hela kumbe ku anakanya hi timhaka tin’wana ta wena n’wini.
◼ Anakanyisisa hi leswi vuriwaka. Tivutise: ‘Xana leswi swi tirha njhani eka mina? Ndzi ta swi tirhisa loko swi te yini?’
◼ Tsala tinhla-nkulu ni tindzimana ta matsalwa hi ku komisa. Sweswo swi ku pfuna ku yisa mianakanyo ya wena eka leswi ku buriwaka hi swona ni ku ku pfuna ku tsundzuka tinhla-nkulu leswaku u ta ti tirhisa endzhaku ka nkarhi.
3 Dyondzisa Vana Va Wena Ku Yingisela: Vana va wu lava nkongomiso wa moya. (Det. 31:12) Eminkarhini ya khale, “hinkwavo lava nga kotaka ku yingisa” exikarhi ka vanhu va Xikwembu a va fanele ku rhiya ndleve loko ku ri karhi ku hlayiwa Nawu. (Neh. 8:1-3) Loko vatswari va rhiya ndleve eminhlanganweni, vana va vona va tala ku endla tano na vona. A hi vutlhari ku ta ni switlangiso kumbe tibuku ta ku sasekisa hi mivala leswaku vana va ta tshama va miyerile. Ku ya exihambukelweni swi nga fanelanga na kona ku kavanyeta ku yingisela ka vona. Leswi ‘vuphukuphuku byi tsimbiweke embilwini ya n’wana,’ vatswari va fanele ku lwa hi matimba leswaku vana va vona va tshamiseka va yingisela eminhlanganweni.—Swiv. 22:15.
4 Hi ku va vayingiseri lavanene, hi kombisa leswaku entiyisweni hi tlharihile naswona hi lava ku “amukela swiletelo leswi engetelekeke.”—Swiv. 1:5.