Ku Yingisa Ku Va Ponisile
YESU KRESTE u lemukise hi ta ku herisiwa ka mafambiselo ya swilo ya Vayuda, lava ntsindza wa vona a ku ri tempele ya le Yerusalema. A nga vulanga leswaku ma ta fika rini. Kambe u hlamusele swiendlakalo leswi a swi ta humelela emahlweni ka ndzoviso wolowo. U khutaze vadyondzisiwa vakwe leswaku va tshama va rindzile ni leswaku va balekela khombo rero.
Yesu u profete a ku: “Loko mi vona Yerusalema wu rhendzeriwa hi mavuthu lama goveke, swi tiveni leswaku ku lovisiwa ka wona ku tshinele.” U tlhele a ku: “Loko mi vona nchumu lowu nyenyetsaka lowu onhetelaka . . . wu yime endhawini yo kwetsima, . . . kutani lava nga eYudiya a va balekele etintshaveni.” Yesu u khongotele vadyondzisiwa vakwe leswaku va nga tlheleli endzhaku va ya sirhelela swilo leswi vonakaka. A va fanele va baleka hi xihatla leswaku va kota ku pona.—Luka 21:20, 21; Matewu 24:15, 16.
Cestius Gallus u rhangele mavuthu ya Varhoma a ya hlasela Yerusalema hi 66 C.E. leswaku a herisa ku xandzuka loku a ku ri khale ku sungurile. U kale a nghena emutini kutani a rhendzela tempele. Ku ve ni mpfilumpfilu emutini wolowo. Lava va tshameke va rindzile va swi vonile leswaku khombo a ri ri kwala nyongeni. Kambe, xana a swi ta koteka ku baleka? Cestius Gallus u tlherise masocha yakwe swi nga rindzeriwanga. Loko vaxandzuki va Vayuda va ma vona ma tlhela, va ma hlongorisile. Wolowo a wu ri nkarhi wa kahle wa leswaku munhu a huma eYerusalema ni le Yudiya a baleka!
Haxawa xa kona, masocha ya Varhoma ma tlhele ma vuya, kambe se a ma ri ehansi ka Vespasian ni n’wana wakwe Titus. Tiko hinkwaro a ri hlaseriwe hi nyimpi. Eku sunguleni ka 70 C.E., Varhoma va ake rihlampfu ra timhandzi to tontswa ri rhendzela Yerusalema. Kutani a swi nga ha ta koteka ku baleka hikwalaho ka rihlampfu rero. (Luka 19:43, 44) Mintlawa ya vapfukeri leyi a yi ri emutini wolowo yi sungule ku dlayana. Vanhu lava a va sele va dlayiwe hi Varhoma kasi van’wana va yisiwe evuhlongeni. Muti ni tempele ya wona swi lovisiwe swi ku bi! Hi ku ya hi Josephus, n’wamatimu wa lembe-xidzana ro sungula wa Muyuda, Vayuda vo tlula miliyoni va xanisekile ivi va fa. Tempele yoleyo a ya ha pfuxiwanga.
Loko a ka ha ri ni Vakreste eYerusalema hi 70 C.E., a va ta va va dlayiwile kumbe va yisiwe evuhlongeni swin’we ni lavan’wana. Hambiswiritano, van’wamatimu va khale va vike leswaku Vakreste va yingise xitsundzuxo xa Xikwembu kutani va baleka eYerusalema ni le Yudiya va ya etintshaveni ta le vuxeni bya Nambu wa Yordani. Van’wana va ake ePella, le xifundzheni xa Periya. Loko va huma eYudiya va nambe va chuveka rihlampfu. Ku yingisa xitsundzuxo xa Yesu swi va ponisile.
Xana U Swi Tekela eNhlokweni Swilemukiso Leswi Humaka Eka Vanhu Lava Tshembekaka?
Endzhaku ko twa switsundzuxo swo hlayanyana leswi nga endlekangiki, vanhu vo tala a va ha swi tekeli enhlokweni switsundzuxo hinkwaswo. Hambiswiritano, ku yingisa switsundzuxo swi nga ku ponisa.
Hi 1975 le China, ku nyikeriwe switsundzuxo swa leswaku ku ta va ni ku tsekatseka ka misava. Vatirhela-mfumo va teke goza. Vanhu va balekile. Ku pone magidi ya vanhu.
Hi April 1991 le Swihlaleni swa Philippine, vanhu lava tshamaka eswimitanini leswi nga le maweni ya Ntshava ya Pinatubo va vike leswaku ntshava yi karhi yi hlanta nkahelo ni nkuma. Endzhaku ka loko vandla ra Philippine Institute of Volcanology and Seismology ri hete tin’hweti timbirhi ri ri karhi ri veke xiyimo xa ntshava tihlo, ri vule leswaku ntshava yi ta buluka rini na rini. Hi ku hatlisa, magidi ya vanhu va rhurhisiwile etikweni rero. Hi June 15, nimixo, ntshava yi hlante nkuma lowu funengeteke mpfhuka wa tikhilomitara ta nhungu, lowu heteleleke wu wele ehansi. Ku yingisa swi ponise magidi ya vanhu.
Bibele yi tsundzuxa hi makumu ya mafambiselo ya swilo lawa hi hanyaka eka wona. Sweswi hi hanya emasikwini lawa makumu ma nga ta fika ku nga ri khale. Leswi makumu ma tshinelaka, xana u tshama u rindzile? Xana u teka goza ro huma endhawini leyi nga ni khombo? Xana u hisekela ku tsundzuxa van’wana leswaku na vona va endla leswi fanaka?
[Xifaniso lexi nga eka tluka 20]
Ku yingisa xitsundzuxo swi ponise vo tala loko Ntshava ya Pinatubo yi hlanta nkuma wa vholkheno
[Xifaniso lexi nga eka tluka 21]
Vakreste lava yingiseke xitsundzuxo xa Yesu va ponile loko muti wa Yerusalema wu lovisiwa hi 70 C.E.