Ndzima 16

Xana I Swinene Ku Rila Hi Ndlela Leyi Ndzi Rilaka Ha Yona?

Hambileswi ndzima leyi yi vulavulaka ngopfu hi ku langutana ni ku feriwa hi mutswari, rungula leri tsariweke laha ri nga ha pfuna loko ku fe xirho xa ndyangu kumbe munghana lonkulu.

“Loko Manana a fa, ndzi titwe onge ndzi lahlekile naswona a ndzi nga pfuni nchumu. Hi yena loyi a a endla leswaku ndyangu wa ka hina wu va ni vun’we.”—Karyn.

KU FERIWA hi mutswari i nchumu wun’wana wo vava swinene evuton’wini. Endzhaku ka loko a file u nga ha boheka ku lwisana ni ku karhateka loku u nga si tshamaka u va na kona. Brian, loyi a a ri ni malembe ya 13 loko tata wa yena a dlayiwa hi vuvabyi bya mbilu u ri: “Hi vusiku lebyi hi tivisiweke ha byona, hi lo rila hi tlhela hi vukarhana ntsena.” Natalie, loyi a a ri ni malembe ya khume loko tata wa yena a dlayiwa hi vuvabyi bya khensa, u ri: “A ndzi pfilunganyekile lerova a ndzi nga twi ku vava.”

Loko vanhu va feriwile va titwa hi tindlela leti hambaneke. Hakunene, Bibele yi vula leswaku “un’wana ni un’wana” u ni “khombo rakwe ni ku vaviseka kakwe.” (2 Tikronika 6:29) Loko wa ha anakanya hi marito wolawo, ehleketa hi ndlela leyi rifu ra mutswari wa wena ri ku khumbeke ha yona. Laha hansi, hlamusela (1) ndlela leyi u titweke ha yona loko u byeriwa leswaku mutswari wa wena u file ni (2) ndlela leyi u titwaka ha yona sweswi.a

1 ․․․․․

2 ․․․․․

Kumbexana tinhlamulo ta wena ti kombisa leswaku gome leri a wu ri na rona ra hunguteka hi ndlela yo karhi. Leswi swi tolovelekile. Sweswo a swi vuli swona leswaku se u n’wi rivele mutswari wa wena. Kasi hi hala tlhelo, u nga ha kuma leswaku gome leri a a wu ri na rona a ri si hela kumbe se ri nyanyile. Kumbexana gome ra wena ri tinyika matimba ivi ri hunguteka ri tlhela ri nyanya swinene hi minkarhi leyi u nga yi langutelangiki. Leswi na swona swi tolovelekile—hambiloko swo humelela endzhaku ka malembe yo hlayanyana mutswari wa wena a file. Xivutiso lexi tlakukaka hi lexi nge, U nga ri tiyiselela njhani gome ra wena—ku nga khathariseki leswaku ri pfa ri tinyika matimba swinene kumbe se ri hungutekile?

U nga chavi ku rila! Ku rila swi pfuna munhu leswaku a hunguta gome. Hambiswiritano, u nga ha titwa ku fana na Alicia, loyi a feriweke hi mana wa yena loko a ri ni malembe ya 19. U ri: “A ndzi ehleketa leswaku loko vanhu va ndzi vona ndzi rila swinene, swi nga ha vonaka onge a ndzi na ripfumelo.” Kambe anakanya hi mhaka leyi: Yesu Kreste a a ri munhu la hetisekeke loyi a a ri ni ripfumelo lerikulu eka Xikwembu. Kambe u ‘humese mihloti’ loko ku fe munghana wa yena la rhandzekaka Lazaro. (Yohane 11:35) Hikwalaho u nga chavi ku rila. Sweswo a swi vuli swona leswaku a wu na ripfumelo! Alicia u ri: “Eku heteleleni, ndzi ririle swinene. A ndzi rila siku ni siku.”b

Vulavula ni van’wana loko u titwa nandzu hileswi u feriweke. Karyn loyi a a ri ni malembe ya 13 loko mana wa yena a fa u ri: “Vusiku byin’wana ni byin’wana a ndzi ya ekamareni ra Manana ndzi fika ndzi n’wi ntswontswa ivi ndzi n’wi byela leswaku a etlela kahle. Kambe siku rin’wana a ndzi swi endlanga sweswo. Hi xa mundzuku xa kona, Manana u file. Hambileswi ndzi swi tivaka leswaku a ndzi fanelanga ndzi titwa nandzu hikwalaho ka leswi a feke, kambe ndzi titwa nandzu hileswi ndzi nga yangiki ndzi ya n’wi vona hi xa tolo xa kona nivusiku ni hikwalaho ka swiendlakalo swin’wana leswi endlekeke hi xa mundzuku xa kona nimixo. Tatana a a teke riendzo a fambe hi ntirho naswona a a lava leswaku mina na sesi wa mina hi tshamela ku ya kamba Manana. Kambe hi hlwele ku pfuka. Loko ndzi ya ekamareni ra Manana, a a nga ha hefemuli. Ndzi tisorile swinene hikuva a a ha hanya loko Tatana a famba!”

Kumbexana na wena u tivona nandzu ku fana na Karyn hikwalaho ka swilo leswi u honiseke ku swi endla. U nga ha tlhela u tirhwexa nandzu lowukulu hi ku ehleketa leswaku mutswari wa wena a a ta va a nga fanga loko a wu lo endla nchumu wo karhi. ‘Loko a ndzi khutaze Tatana ku ya eka dokodela.’ ‘Loko a ndzi lo hatla ndzi ya kamba Manana.’ Loko u karhatiwa hi mianakanyo yo tano, tsundzuka leswi: Swi tolovelekile ku tivona nandzu hi swilo leswi u navelaka onge loko a wu lo swi endla hi ndlela yin’wana a ku ta va ni vuyelo lebyinene. Ntiyiso wa mhaka hileswaku, a wu ta va u endle swilo hi ndlela yin’wana loko a wu swi tivile leswaku ku ta humelela yini. Kambe a wu nga swi tivi. Hikwalaho, a wu fanelanga u tivona nandzu. A hi wena u vangeke rifu ra mutswari wa wena!c

Hlamusela ndlela leyi u titwaka ha yona. Swivuriso 12:25 yi ri: “Marito lamanene ma ta ku tsakisa.” (Today’s English Version) Loko u nga hlamuseli van’wana ndlela leyi u titwaka ha yona u nga ha tikeriwa swinene hi ku tiyisela gome leri u nga na rona. Kasi loko wo vulavula ni munhu loyi u n’wi tshembaka malunghana ni ndlela leyi u twaka ku vava ha yona, swi nga endla leswaku u chaveleriwa hi “marito lamanene” loko u hlunamile.

Vulavula ni Xikwembu. A swi kanakanisi leswaku u ta titwa u antswa swinene endzhaku ko ‘chulula mbilu ya wena’ eka Yehovha Xikwembu hi xikhongelo. (Pisalema 62:8) Leri a hi endlelo ro karhi ntsena ro endla leswaku munhu a titwa a antswa. Loko u khongela, u kombela “Xikwembu xa nchavelelo hinkwawo, lexi hi chavelelaka enhlomulweni wa hina hinkwawo.” (2 Vakorinto 1:3, 4) Ndlela yin’wana leyi Xikwembu xi hi chavelelaka ha yona i ku tirhisa Rito ra xona, ku nga Bibele. (Varhoma 15:4) Ha yini u nga tshami u ri ni nxaxamelo wa matsalwa lama ku chavelelaka?d

Gome leri munhu a vaka na rona hikwalaho ka leswi a feriweke ri teka nkarhi ku hela. Kambe Bibele ya hi chavelela hikuva yi hi tiyisekisa leswaku emisaveni leyintshwa leyi Xikwembu xi tshembiseke leswaku xi ta yi tisa, “rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” (Nhlavutelo 21:3, 4) Na wena u nga ha kuma leswaku ku anakanyisisa hi switshembiso swoleswo swi ta ku pfuna leswaku u tiyisela gome ra ku feriwa hi mutswari.

[Tinhlamuselo ta le hansi]

MATSALWA

“[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:4.

XITSUNDZUXO

Tshama u ri ni buku leyi u tsalelaka tinhla ta wena eka yona. Ku tsala swilo leswi u swi ehleketaka hi mutswari wa wena la feke swi nga ku pfuna swinene leswaku u kota ku langutana ni gome.

XANA A WU SWI TIVA LESWAKU . . . ?

Ku rila a swi kombisi leswaku u tsanile. Hambi ku ri vavanuna lava nga ni xivindzi vo fana na Abrahama, Yosefa, Davhida na Yesu va ririle loko va feriwile.—Genesa 23:2; 50:1; 2 Samuwele 1:11, 12; 18:33; Yohane 11:35.

LESWI NDZI TIYIMISELEKE KU SWI ENDLA!

Loko ndzi ri ni gome swinene ndzi ta ․․․․․

Leswi ndzi lavaka ku vutisa mutswari wa mina la ha hanyaka hi mhaka leyi hi leswi ․․․․․

U NGA KU YINI?

● Ha yini swi ri swinene ku anakanyisisa hi swilo leswinene leswi u swi endleke swin’we ni mutswari wa wena la feke?

● Ha yini ku tsala swilo leswi u swi ehleketaka swi nga ku pfunaka leswaku u kota ku tiyisela gome rero?

[Marito lama tshahiweke exihlokweni lama nga eka tluka 112]

“A ndzi nga byeli munhu ndlela leyi a ndzi titwa ha yona. A swi ta va swi ndzi pfunile loko a ndzi byele van’wana ndlela leyi a ndzi titwa ha yona. A swi ta va swi antswise gome ra mina.”—David

[Bokisi/Xifaniso lexi nga eka tluka 113]

CHANTELLE

“Tatana u vabye malembe ya kwalomu ka ntlhanu naswona xiyimo xa yena a xi nyanya. A ndzi ri ni malembe ya 16 loko a tisunga. Endzhaku ka sweswo, Manana a a tshamela ku byela mina na buti wa mina hi swilo hinkwaswo leswi a swi endleka. U tlhele a hi pfumelela leswaku hi n’wi pfuna ku endla swiboho leswi khumbaka nkosi. Sweswo swi endle leswaku swilo swi hi olovela. Ndzi vona onge vana a va swi rhandzi ku tumbeteriwa swilo—ngopfu-ngopfu swilo leswikulu swo fana ni leswi. Loko nkarhi wu ri karhi wu famba, ndzi swi kotile ku vulavula hi ku ntshunxeka hi mhaka ya ku fa ka Tatana. Loko ndzi twa leswaku ndzi lava ku rila, a ndzi ya rilela endhawini yo karhi kumbe eka munghana wa mina. Leswi ndzi nga swi vulaka hileswaku: Loko u lava ku vulavula hi mhaka ya ku feriwa, vulavula ni ndyangu wa ka n’wina kumbe vanghana va wena. Endla swilo leswi nga ta ku pfuna leswaku u kota ku rila.”

[Bokisi/Xifaniso lexi nga eka matluka 113, 114]

LEAH

“Manana u hlaseriwe hi vuvabyi bya ku oma swirho loko ndzi ri ni malembe ya 19 naswona u fe endzhaku ka malembe manharhu. Endzhaku ka loko a file, a ndzi vona onge ndzi fanele ndzi va ni xivindzi. A swi ta n’wi tikela Tatana loko a ndzi nga vanga ni xivindzi. Loko ndzi kula, Manana a a tshama a ri na mina loko ndzi vabya kumbe loko ndzi nga titwi kahle. Ndzi tsundzuka ndlela leyi mavoko ya yena a ma ndzi khoma ha yona loko a ndzi kambela loko miri wa mina wu hisa. Minkarhi yo tala ndzi twa ku vava loko ndzi tsundzuxiwa leswaku a nga ha ri kona. A ndzi tolovele ku tumbeta ndlela leyi a ndzi titwa ha yona naswona sweswo a swi lulamanga. Kutani minkarhi yin’wana ndzi languta swifaniso swa yena leswaku ndzi ta rila. Ku vulavula ni vanghana va mina swa ndzi pfuna na swona. Bibele yi tshembisa leswaku vanhu lava feke va ta pfuxeriwa emisaveni leyi nga paradeyisi. (Yohane 5:28, 29) Loko ndzi anakanyisisa hi ntshembo wa ku tlhela ndzi vona Manana—ni loko ndzi anakanyisisa hi leswi ndzi faneleke ndzi swi endla leswaku ndzi va kona kwalaho—gome ra mina ra hunguteka.”

[Bokisi/Xifaniso lexi nga eka tluka 114]

BETHANY

“Ndzi navela onge loko a ndzi byele Tatana ndzi ku, ‘ndza ku rhandza.’ Ndza tiyiseka leswaku a ndzi n’wi rhandza kambe a ndzi tsundzuki ndzi n’wi byela naswona a ndzi ta swi tsakela ku n’wi byela. A ndzi ri ni malembe ya ntlhanu loko a fa. Tatana u hlaseriwe hi vuvabyi bya ku oma swirho loko a ha etlele naswona u tsutsumerisiwe exibedlhele. Loko ndzi pfuka hi xa mundzuku xa kona, ndzi twe leswaku u file. Endzhaku ka sweswo, a ndzi nga swi tsakeli ku vulavula hi Tatana kambe hi ku famba ka nkarhi a ndzi swi tsakela ku twa vanhu va vulavula ha yena hikuva sweswo swi ndzi pfunile leswaku ndzi n’wi tiva ku antswa. Vanhu lava feriweke hi mutswari wa vona ndzi nga va khutaza leswaku va wu tsakela swinene nkarhi lowu va vaka na wona ni mutswari wa vona nileswaku va swi tsala ehansi swilo leswi va tsakisaka leswaku va ta ka va nga swi rivali. Kutani endla hinkwaswo leswi u nga swi kotaka leswaku u tiyisa ripfumelo ra wena leswaku u ta va kona loko mutswari wa wena a pfuxiwa emisaveni leyintshwa ya Xikwembu.”

[Bokisi leri nga eka tluka 116]

Xitoloveto

Tsala Leswi U Swi Ehleketaka Laha

Xaxameta swilo swin’wana leswi tsakisaka leswi ku endlaka u tsundzuka mutswari wa wena. ․․․․․

Tsala swilo leswi u navelaka onge loko a wu swi byele mutswari wa wena loko a ha hanya. ․․․․․

Tianakanye u ri ni ndzisana leyi tivonaka nandzu swinene hi rifu ra mutswari wa n’wina. Tsala swilo leswi a wu ta swi vula eka ndzisana ya wena leswaku u yi chavelela. (Leswi swi nga tlhela swi ku pfuna leswaku u kota ku lawula ku titwa nandzu hileswi u feriweke.) ․․․․․

Tsala swilo swimbirhi kumbe swinharhu leswi u navelaka onge loko a wu swi tivile hi tatana kumbe hi mana wa wena la feke kutani endzhaku ka sweswo u kombela ku vulavula ha swona ni mutswari loyi a ha hanyaka. ․․․․․

Hlaya Mintirho 24:15. Xana ntshembo lowu hlamuseriweke eka ndzimana leyi wu ku pfuna njhani leswaku u kota ku langutana ni ku feriwa hi mutswari wa wena? ․․․․․

[Xifaniso lexi nga eka tluka 115]

Gome ra ku feriwa ri nga fana ni magandlati lama baka eribukweni swi nga languteriwanga