I Yini Lexi Nga Endlaka Leswaku Hi Va Ni Ntsako eNdyangwini

LESWI BIBELE YI SWI VULAKA

“Va tsaka lava twaka rito ra Xikwembu va tlhela va endla leswi ri swi vulaka!”—Luka 11:28, Bibele—Matsalwa Yo Kwetsima.

NDLELA LEYI SWESWO SWI NGA KU VUYERISAKA HA YONA

U ta kuma rirhandzu ra ntiyiso. —Vaefesa 5:28, 29.

U ta xiximiwa.—Vaefesa 5:33.

U ta titwa u sirhelelekile.—Marka 10:6-9.

XANA HI NGA SWI TSHEMBA HAKUNENE LESWI BIBELE YI SWI VULAKA?

Ina, hikwalaho ka swivangelo swimbirhi:

• Xikwembu hi xona Musunguri wa ndyangu. Bibele yi vula leswaku “vito ra ndyangu wun’wana ni wun’wana . . . ri [huma] eka” Yehovha Xikwembu. (Vaefesa 3:14, 15) Hi marito man’wana, ndyangu wu kona hileswi Yehovha a endleke leswaku wu va kona. Ha yini sweswo swi ri swa nkoka?

  Anakanya hi leswi: U le ku tiphineni hi swakudya swo xawula naswona u lava ku tiva leswi tirhisiweke ku swi sweka, xana i mani loyi u nga n’wi vutisaka? A swi kanakanisi leswaku u ta vutisa loyi a swi swekeke.

  Hilaha ku fanaka, leswaku hi kuma lexi endlaka leswaku hi va ni ntsako endyangwini, hi fanele hi lava switsundzuxo swa Yehovha, Musunguri wa ndyangu.—Genesa 2:18-24.

• Xikwembu xa khathala hi wena. Mindyangu yi endla kahle loko yi lava switsundzuxo swa Yehovha, leswi kumekaka eRitweni rakwe. Ha yini? “Hikuva xa khathala hi n’wina.” (1 Petro 5:6, 7) Yehovha wa ku rhandza—naswona mikarhi hinkwayo ndzayo yakwe ya tirha!—Swivuriso 3:5, 6; Esaya 48:17, 18.